Read Kernewek Yeremia 39 Bible Online

Yeremia 39 - Kernewek bible

Yeremia 39

¹Y'n nawves blydhen a Sedekia myghtern Yuda, y'n degves mis, y teuth Nebukadnessar myghtern Babylon hag oll y lu ha gul esedhva warnedhi;

²y'n unnegves blydhen a Sedekia, y'n peswora mis, yn nawves dydh an mis, aswa a veu terrys yn fos y'n sita.

³Ena oll pennsevigyon myghtern Babylon a dheuth a-ji, hag esedha y'n yet kres, hwath Nergal-sareser, Samgar-nebo, Sarsekim an Rabsaris, Nergal-sareser an Rabmag, hag oll an bennsevigyon arall a vyghtern Babylon.

⁴Ha pan y's gwelas Sedekia myghtern Yuda hag oll an soudoryon, i a fias, ha mos yn-mes a'n sita y'n nos, dre fordh lowarth an myghtern, der an yet ynter an dhiw fos; hag ev eth war-tu ha'n Araba.

⁵Mes lu an Kaldeanys a's pursiwyas, ha tremena dres Sedekia yn plenys Yeriko; ha pan y'n kemmersons, i a'n dros dhe Nebukadnessar myghtern Babylon, dhe Ribla, yn pow Hamath; hag ev a ros breus warnodho

⁶Ena myghtern Babylon a ladhas mebyon Sedekia a-rag y dhewlagas; ynwedh myghtern Babylon a ladhas oll pennsevigyon Yuda.

⁷Ena ev a dhallhas dewlagas Sedekia ha'y gelmi gans kadonyow, dh'y gemmeres dhe Babylon.

⁸An Kaldeanys a loskas chi an myghtern ha chiow an bobel gans tan, hag i a dorras fosow Yerusalem.

⁹Ena Nebuzaradan kapten an withysi a dhug yn divroedh dhe Babylon remenant an bobel o gesys y'n sita, ha'n re a gilfias dhodho, ha remenant an bobel re beu gesys.

¹⁰Mes Nebuzaradan kapten an withysi a asas boghosogyon an bobel, na's tevo travyth, yn pow Yuda, ha ri dhedha gwinlannow ha parkow y'n keth prys.

¹¹Lemmyn Nebukadnessar myghtern Babylon a ros gorhemmynn a-dro dhe Yeremia dhe Nebuzaradan kapten an withysi, ow leverel,

¹²Kemmer ev ha'y dhyghtya yn ta, ha na wra dregynn dhodho; mes gwra ganso par dell wovynn orthis.

¹³Ytho Nebuzaradan kapten an withysi a dhannvonas, ha Nebushazban an Rabsaris,[34] Nergal-sareser an Rabmag, hag oll pennsevigyon myghtern Babylon,

¹⁴hag i a dhannvonas dhe gemmeres Yeremia yn-mes a glos an prison, ha'y ri yn charj Gedalia mab Ahikam mab Shafan dhe vos degys dhe dre. Ytho ev a drigas yn mysk y bobel.

¹⁵Lemmyn ger an ARLOEDH a dheuth dhe Yeremia pan veu degeys yn klos an prison, ow leverel:

¹⁶Ke ha kewsel dhe Ebed-melek an Ethiopek, ow leverel, Yndellma y lever ARLOEDH an luyow, Duw Ysrael: Otta, my a dhre ow ger war an sita ma rag drog, a-der rag da, hag i a vydh kollenwys a-ragowgh y'n jydh na.

¹⁷Mes my a'th saw y'n jydh na, yn-medh an ARLOEDH, ha ny vydhydh res yn leuv an wer a berthydh own anedha.

¹⁸Rag my a'th teliver yn sur, ha ny goedhydh der an kledha, mes dha vewnans a vydh preydh dhis, drefenn ty dhe fydhya ynnov, yn-medh an ARLOEDH.