Read Kernewek Yeremia 4 Bible Online

Yeremia 4 - Kernewek bible

Yeremia 4

¹Mar tehwelydh, A Ysrael, yn-medh an ARLOEDH, mar tehwelydh dhymm: ha mar korrydh dha daklow kasadow yn-mes a'm golok, heb mos yn sowdhan na fella,

²ha mar tedh ‘Dell vew an ARLOEDH!’ yn gwirder, yn breus, hag yn ewnder, ena an kenedhlow a wra omvenniga ynno, ha bostya ynno.

³Rag yndellma y lever an ARLOEDH dhe wer Yuda ha Yerusalem: Gonedhewgh agas tir anerys, ha na hesiwgh yn mysk an spern.

⁴Omdrodreghewgh dhe'n ARLOEDH ha kemmerewgh dhe-ves kudhgenn agas kolonn, hwi wer Yuda ha trigoryon Yerusalem, ma nag ello ow honnar yn-mes avel tan, ha leski, heb denvyth dh'y dhifeudhi, drefenn drogedh agas gwriansow.

⁵Derivewgh yn Yuda, ha deklaryewgh yn Yerusalem, ha leverel: Hwythewgh an hirgorn y'n tir; kriewgh yn ughel ha leverewgh, ‘Omguntellewgh, hag entryn y'n sitys kerys!’

⁶Drehevewgh baner war-tu ha Sion: hwilewgh sawder, na wortewgh: rag my a dhre droktra a'n gogledh, ha distruyans meur.

⁷An lew yw devedhys yn-bann a-dhiworth y brysk, hag yma distruer an kenedhlow war y fordh: ev yw gyllys yn-rag a-dhiworth y dyller dhe wul dha dir ynyal; ha dha sitys a vydh gwastys, heb annedhyas.

⁸Rakhenna omwrogysiwgh gans yskar, kynewgh hag oulyewgh: ‘Ny dreylyas ahanan sorr fers an ARLOEDH.’

⁹Hag y hwyrvydh y'n jydh na, yn-medh an ARLOEDH, kolonn an myghtern na dhe goll, ha kolonn an bennternedh; krena a wra an oferysi, ha dyegrys vydh an brofoesi.

¹⁰Ena my a leveris, ‘Ogh A Arloedh DUW! Yn sur ty re doellas an bobel ma ha Yerusalem, ow leverel, “Kres a'gas bydh”; mes seulabrys an kledha a dhrehedh bys y'n enev.’[5]

¹¹Y'n termyn na y fydh leverys dhe'n bobel ma ha dhe Yerusalem: Gwyns toemm a'n ugheldiryow moel y'n gwylvos war-tu ha myrgh ow fobel, mes ny vydh dhe groedra, na dhe lanhe;

¹²gwyns leun a'n tylleryow na a wra dos dhe'm arghadow:[6] lemmyn ynwedh yth esov ow ri breus er aga fynn.

¹³Otta, ev a yskynn avel kommol, ha'y jarettow a vydh avel korwyns: y vergh yw uskissa ages eryon. Go-ni! rag diswrys on ni.

¹⁴A Yerusalem, golgh dha golonn a-dhiworth drogedh, may fi selwys. Pes termyn y hwra dha brederow koeg godriga genes?

¹⁵Rag lev a dhiskler a-dhiworth Dan, ha dyllo galar a-dhiworth menydh Efraym.

¹⁶Menegewgh dhe'n kenedhlow, ‘Ottava’; dyllewgh erbynn Yerusalem, ‘Yma eskerens[7] ow tos a bow pell, hag i a lev erbynn sitys Yuda.

¹⁷Avel gwithysi park, ymons i a-dro dhedhi; drefenn i dhe vos diwostydh er ow fynn, yn-medh an ARLOEDH.

¹⁸Dha fordh ha'th wriansow re dhros an traow ma warnas: hemm yw dha dhrogedh,[8] ass yw hwerow! re dhrehedhas bys y'th kolonn.’

¹⁹Ow holodhyon, ow holodhyon! my a omwen yn payn, fosow ow holonn a lamm; ow holonn a wra tros ynnov; ny allav tewel; rag my re glewas son an hirgorn, ow enev re glewas an tros a vresel.[9]

²⁰Distruyans a siw distruyans; rag oll an tir yw diswrys: distowgh ow thyldow yw diswrys, ha'm kroglennow yn hwers.

²¹Pes termyn y hwelav an baner, ha klewes son an hirgorn?

²²‘Rag ow fobel yw foll, ny'm aswonnsons; fleghes wokki yns, ny's teves konvedhes: konnyk yns dhe wul drogober, mes dhe wul da ny's teves skentoleth.’

²³My a viras war an nor, hag, otta heb furv o, ha gwag; ha war an nevow ha ny's tevo golow.

²⁴My a viras war an menydhyow, hag, otta yth esens ow krena, hag yth esa an breow oll kryghyllys.

²⁵My a viras, hag otta nyns esa den, hag oll ydhyn an nevow re fisa.

²⁶My a viras, hag ott an tir feyth o gwylvos, hag oll y sitys o terrys a-rag an ARLOEDH, hag a-rag y sorr fers.

²⁷Rag yndella an ARLOEDH re leveris: An tir oll a vydh ynyal; mes hwath ny wrav vy kowldhistrui.

²⁸Drefenn henna an nor a wra kyni, ha'n nevow a-ugh a vydh du: rag my re'n leveris, my re'n mynnas, ha ny'm bydh edrek, na ny gildennav a-dhiworto.

²⁹An sita oll a wra fia rag tros an varghogyon ha'n sethoryon; i a wra mos y'n kaswydh, hag yskynna war an kerrek: pub sita a vydh eskesys, ha ny wra triga denvyth ynna

³⁰Ha ty, gwastys, pandr'a wredh, owth omwiska yn kogh, owth omdakla gans tegennow owrek, ow liwa dha dhewlagas gans antimoni, yn euver yth omwredh teg; dha garoryon a'th tispres, i a hwila dha vewnans.

³¹Rag my re glewas lev avel benyn yn lavur, ha'n gloesow avelli hi neb a dhineyth hy hynsa flogh, lev myrgh Sion, ow tyena rag anall, ow lesa hy diwleuv, ‘Go-vy! Klamdera a wrav drefenn ladhoryon.’