Read Kernewek Yeremia 40 Bible Online

Yeremia 40 - Kernewek bible

Yeremia 40

¹An ger hag a dheuth dhe Yeremia a-dhiworth an ARLOEDH wosa Nebuzaradan kapten an withysi y asa dhe vos a-dhiworth Rama, pan y'n kemmeras yn kadonyow gans oll kethyon Yerusalem ha Yuda esa ow pos divres dhe Babylon.

²Kapten an withysi a gemmeras Yeremia ha leverel dhodho, ‘An ARLOEDH dha Dhuw re dharganas an drog ma war an tyller ma;

³ha lemmyn an ARLOEDH a'n dros, ha gul war-lergh an pyth a leveris, drefenn hwi dhe begha erbynn an ARLOEDH ha ny woslewsowgh y lev. Rakhenna an dra ma yw devedhys warnowgh.

⁴Lemmyn mir, my re'th rydhhas hedhyw a'n kadonyow war dha dhiwleuv. Mars yw da genes dos genev dhe Babylon, deus, ha my a'th with yn ta; mes mar nyns yw da genes dos genev dhe Babylon, ny dal dhis dos. Mir, yma oll an tir a-ragos; plepynag a hevel dhis bos da hag ewn, ke di.

⁵Mar kortydh, ena dehwel dhe Gedalia mab Ahikam mab Shafan, a veu gwrys governour trevow Yuda gans myghtern Babylon, ha gorta ganso yn mysk an bobel; po ke plepynag yth hevel ewn dhe vos di.’ Ytho kapten an withysi a ros dhodho ewnrann a voes ha ro, ha'y asa dhe vos.

⁶Ena Yeremia eth dhe Gedalia mab Ahikam, dhe Mispa, ha gortos ganso yn mysk an bobel o gesys y'n tir.

⁷Pan glewas oll pennsevigyon an luyow, esa y'n gwel, i ha'ga gwer, myghtern Babylon dhe wul Gedalia mab Ahikam governour an tir ha ri yn y jarj gwer, gwragedh ha fleghes, boghosogyon an tir na veu kemmerys yn kethneth dhe Babylon,

⁸i a dheuth dhe Gedalia, dhe Mispa, Yshmael mab Nethania, Yohanan mab Kareagh, Seraya mab Tanhumeth, mebyon Efay an Netofathyas, Yezania mab an Maakathyas, i ha'ga gwer.

⁹Ha Gedalia mab Ahikam mab Shafan a dos dhedha ha dh'aga gwer, ow leverel, ‘Na vedhewgh ownek dhe servya an Kaldeanys. Gortewgh y'n tir ha servya myghtern Babylon, hag y fydh da genowgh.

¹⁰Ha my, otta, my a drig yn Mispa dhe servya an Kaldeanys a dheu dhyn; mes hwi, kuntellewgh gwin, ha frutys hav, hag oyl, ha'ga gorra yn agas lestri, ha trigewgh yn agas sitys re gemmersowgh.’

¹¹Keffrys pan glewas an Yedhewon esa yn Moab hag yn mysk an Ammonysi hag yn Edom hag yn oll an powyow, myghtern Babylon dhe asa remenant yn Yuda ha settya warnedha Gedalia mab Ahikam mab Shafan,

¹²ena oll an Yedhewon a dhehwelis dhiworth oll an tylleryow le may fons skattrys, ha dos dhe bow Yuda, dhe Gedalia, dhe Mispa; hag i a guntellas gwin ha frutys hav yn palster.

¹³Lemmyn Yohanan mab Kareagh hag oll pennsevigyon an luyow y'n gwel a dheuth dhe Gedalia, dhe Mispa,

¹⁴ha leverel dhodho, ‘A wodhes Baalis myghtern an Ammonysi dhe dhannvon Yshmael mab Nethania dhe'th ladha?’ Mes ny's krysis Gedalia mab Ahikam.

¹⁵Ena Yohanan mab Kareagh a gewsis dhe Gedalia yn Mispa yn-dann gel, ow leverel, ‘Gas vy dhe vos, my a'th pys, ha my a ladh Yshmael mab Nethania, ha ny wodhvydh denvyth. Prag y'th ledhydh may fydh skattrys oll an Yedhewon yw kuntellys a-dro dhis, ha remenant Yuda a verow?’

¹⁶Mes Gedalia mab Ahikam a leveris dhe Yohanan mab Kareagh, ‘Ny wredh tra a'n par ma, rag ty a wowlever a-dro dhe Yshmael.’