Read Kernewek Yeremia 41 Bible Online

Yeremia 41 - Kernewek bible

Yeremia 41

¹Y'n seythves mis, Yshmael mab Nethania mab Elishama, a'n teylu ryel, onan a bennsevigyon an myghtern, a dheuth ha deg gwer ganso dhe Gedalia mab Ahikam, dhe Mispa, hag ena i a dhybris bara war-barth yn Mispa.

²Yshmael mab Nethania, ha'n deg gwer esa ganso, a sevis ha gweskel Gedalia mab Ahikam mab Shefan gans an kledha ha'y ladha, ev neb a veu gwrys governour an tir gans myghtern Babylon.

³Yshmael a ladhas oll an Yedhewon esa gans Gedalia yn Mispa ynwedh, ha soudoryon an Kaldeanys esa ena.

⁴Hag y'n jydh wosa ev dhe ladha Gedalia, kyns denvyth dh'y wodhvos,

⁵gwer a dheuth a-dhiworth Shekem ha Shilo ha Samaria, ha'ga barvow treghys ha'ga dillas fregys, ha'ga horf treghys, gans offrynnow greun ha frankynkys yn aga leuv, dh'aga dri dhe ji an ARLOEDH.

⁶Hag Yshmael mab Nethania eth yn-mes a-dhiworth Mispa dh'aga metya, owth oela hag ev ow tos. Pan vetyas gansa ev a leveris dhedha, ‘Dewgh dhe Gedalia mab Ahikam.’

⁷Pan dhrehedhsons kres an sita, Yshmael mab Nethania ha'n wer ganso a's ladhas, ha'ga thewlel yn dowrargh.

⁸Mes yth esa deg gwer kevys yn aga mysk neb a leveris dhe Yshmael, ‘Na'gan ladh, rag ni a'gan beus y'n parkow tresoryow kudhys a waneth, heydh, oyl ha mel.’ Ytho ev a hedhis, ha ny's ladhas war-barth gans aga breder.

⁹Lemmyn an dowrargh le may tewlis Yshmael korfow an wer re ladhas drefenn Gedalia o an dowrargh gwrys gans Asa an myghtern rag own Baasha myghtern Ysrael; Yshmael mab Nethania a'n lenwis gans an re ledhys.

¹⁰Ena Yshmael a dhug yn-mes yn kethneth remenant oll an bobel esa yn Mispa, hwath myrghes an myghtern, neb a ros Nebuzaradan kapten an withysi yn charj Gedalia mab Ahikam. Yshmael mab Nethania a's kemmeras dhe-ves yn kethneth hag omdenna rag treusi dhe'n Ammonysi.

¹¹Mes pan glewas Yohanan mab Kareagh, hag oll pennsevigyon an luyow esa ganso, a oll an drog a veu gwrys gans Yshmael mab Nethania,

¹²i a gemmeras oll aga gwer ha mos dhe omladh erbynn Yshmael mab Nethania. I a'n kavas ryb an poll meur usi yn Gibeon.

¹³Ha pan welas oll an bobel esa gans Yshmael Yohanan mab Kareagh hag oll an bennsevigyon esa ganso, lowen ens.

¹⁴Ytho oll an bobel a wrussa Yshmael aga hemmeres dhe-ves yn kethneth a-dhiworth Mispa a dreylyas a-dro ha dehweles, ha mos dhe Yohanan mab Kareagh.

¹⁵Mes Yshmael mab Nethania a dhienkas a-dhiworth Yohanan gans eth gour, ha mos dhe'n Ammonysi.

¹⁶Ena Yohanan mab Kareagh hag oll pennsevigyon an luyow esa ganso a gemmeras remenant an bobel a veu kemmerys yn kethneth gans Yshmael mab Nethania a-dhiworth Mispa wosa ev dhe ladha Gedalia mab Ahikam, soudoryon, benynes, fleghes ha spadhesigyon, neb a wrug Yonathan aga dri a-dhiworth Gibeon.

¹⁷Hag i eth yn-kerdh, ha gortos yn Geruth Kimham ogas dhe Bethlehem, ow mynnes mos dhe Ejyp

¹⁸drefenn an Kaldeanys; rag own a's tevo anedha, drefenn Yshmael mab Nethania dhe ladha Gedalia mab Ahikam, neb a veu gwrys governour y'n tir gans myghtern Babylon.