Read Kernewek Yeremia 46 Bible Online

Yeremia 46 - Kernewek bible

Yeremia 46

¹Ger an ARLOEDH hag a dheuth dhe Yeremia an profoes a-dro dhe'n kenedhlow.

²A-dro dhe Ejyp, a-dro dhe lu Faro Neko, myghtern Ejyp, esa ryb an avon Ewfrates yn Karkemish hag a veu fethys gans Nebukadnessar myghtern Babylon y'n peswora blydhen a Yehoyakim mab Yosia myghtern Yuda:

³Pareusiwgh bokler ha skoes ha nesiwgh dhe'n vatel!

⁴Hernessyewgh an vergh; yskynnewgh, marghogyon! Kemmerewgh agas savleow gans agas basnettow, gwrewgh dh'agas lonsow lentri, gwiskewgh agas kaspowsyow.

⁵Prag y's gwelis dyegrys ha treylys war-dhelergh? Aga breselyoryon yw gweskys, ha re fias yn fisten, heb mires war-dhelergh; yma euth a bub tu, yn-medh an ARLOEDH.

⁶Na wres an buan fia na'n kasor diank; dhe'n gogledh ryb an avon Ewfrates i re drebuchyas ha koedha.

⁷Piw yw hemma, usi ow sevel avel an Nil, avel avonyow gans aga dowrow yn hwythfians?

⁸Ejyp a sev avel an Nil, avel avonyow gans aga dowrow yn hwythfians. Ev a leveris, My a sev, my a gudh an nor, my a dhistru an sitys ha'ga annedhysi.

⁹Yn-rag, hwi vergh, ha fyski yn fuskok, hwi jarettow! Gas an vreselyoryon dhe vos yn-rag: gwer Ethiopia ha Put hag a dheg an skoes, gwer Lud hag a denn an warak.

¹⁰Rag hemm yw dydh an Arloedh, DUW an luyow, dydh a dhial, dhe dyli dial war y eskerens. An kledha a dhevor hag a vydh gwalghys, ha medhwys gans aga goes. Rag an Arloedh, DUW an luyow, a'n jeves sakrifis yn tir an gogledh ryb an avon Ewfrates.

¹¹Ke yn-bann dhe Gilead ha kemmer balsam, A wyrghes, vyrgh Ejyp! Yn euver ty a wra devnydh a'th vedhegnethow; ny'gas beus yaghheans.

¹²An kenedhlow re glewas a'th veth, ha'th kri re lenwis an nor; rag kasor re drebuchyas erbynn kasor; ha'n dhew re goedhas war-barth.

¹³An ger a gewsis an ARLOEDH dhe Yeremia an profoes a-dro dhe dhevedhyans Nebukadnessar myghtern Babylon dhe weskel pow Ejyp:

¹⁴Diskleryewgh yn Ejyp, ha gwarnya yn Migdol; gwarnyewgh yn Nof hag yn Tahpanhes; leverewgh, ‘Kemmer dha savla, ha bydh parys, rag an kledha a dhevor an re a-dro dhis.’

¹⁵Prag yth yw Apis[36] prosternys? Prag na wrug dha darow sevel fast? — drefenn an ARLOEDH dh'y herdhya dhe-ves.

¹⁶Dha lu a drebuchyas[37] ha koedha, ha leverel an eyl dh'y gila, ‘Dewgh, dehwelyn dh'agan pobel agan honan ha dhe dir agan genesigva, drefenn kledha an arwasker.’

¹⁷Gelwewgh hanow Faro myghtern Ejyp, ‘Braggyer neb a gollas y jons.’

¹⁸Dell vewav, yn-medh an Myghtern, ha'y hanow ARLOEDH an luyow, nebonan a dheu kepar ha Tabor y'n menydhyow, ha kepar ha Karmel ryb an mor.

¹⁹Pareus ragos fardellow divroedh, ty annedhyas, myrgh Ejyp! Rag Nof a vydh gwastys hag y fydh distruys, heb annedhyas.

²⁰Denewes pur deg yw Ejyp mes yma kelyon margh ow tos er hy fynn a'n gogledh

²¹Ynwedh hy gwer arvethys yn hy kres yw avel leughi peskys; rag i ynwedh re dreylyas ha fia war-barth, ny sevsons; rag dydh aga therroes re dheuth warnedha, ha termyn aga hessydhyans.

²²Ejyp a wra son kepar ha sarf ow slynkya dhe-ves; rag hy eskar a geskerdh gans lu,[38] ha dos er hy fynn gans boelyow, avel an re a dregh gwydh.

²³I a derr hy hoeswik, yn-medh an ARLOEDH, kynth yw re dew dhe hwithra, drefenn aga bos moy niverus ages an lokustes, heb nivera yns i.

²⁴Myrgh Ejyp a vydh gorrys dhe veth; hi a vydh livrys yn leuv pobel an gogledh.

²⁵ARLOEDH an luyow, Duw Ysrael, a leveris: Otta, my a dhre kessydhyans war Amon a Thebes, ha Faro, hag Ejyp, ha'ga duwow ha'ga myghternedh, war Faro ha'n re a fydh ynno.

²⁶My a's liver yn leuv an re a hwila aga bewnans, dhe Nebukadnessar myghtern Babylon ha'y wesyon. A-wosa Ejyp a vydh annedhys avel y'n dydhyow koth, yn-medh an ARLOEDH.

²⁷Mes ty, na vydh ownek, ow gwas Yakob, ha na vydh digolonnek, A Ysrael; rag my a'th saw a-bell, ha'th has a-dhiworth tir aga hethneth. Yakob a dhehwel ha bos yn powes hag attes, ha nagonan ny worr own ynno.

²⁸Ha ty, na vydh ownek, ow gwas Yakob, yn-medh an ARLOEDH, rag yth esov genes. My a wra diwedh dhe oll an kenedhlow le ma'th skattris, mes ny wrav dha leun dhistrui. My a'th kessydh yn ewn musur, mes ny wrav dha asa heb kessydhyans yn tien.