Read Kernewek Yeremia 48 Bible Online

Yeremia 48 - Kernewek bible

Yeremia 48

¹A-dro dhe Moab. Yndellma y lever ARLOEDH an luyow, Duw Ysrael: Go-ev, Nebo, gwastys yw! Kiryathaym yw gorrys dhe veth ha kemmerys; Misgab yw methek hag a berth euth.

²Ny vydh namoy gormel a Moab. Yn Heshbon i re dewlis drog er hy fynn: ‘Dewgh, treghyn hi dhe-ves ma na vo kenedhel!’ Hwi ynwedh, A Madmen, a vydh diswrys; an kledha a'th pursiw.

³Lev kri a-dhiworth Horonaym: ‘Ynyalder, ha distruyans meur!’

⁴‘Moab yw distruys!’ a gri hy re vyghan.

⁵Rag y'n fordh-yskynna dhe Luhith i a yn-bann owth oela yn hwerow; rag y'n fordh yn-nans dhe Horonaym an eskar re glewas kri a angoes rag an distruyans.

⁶Fiewgh, omsawyewgh, ha bedhewgh avel asen gwyls y'n difeyth.

⁷Rag drefenn ty dhe fydhya y'th dinasow[39] hag y'th tresoryow, ty ynwedh a vydh kemmerys; Kemosh a yn divroedh, war-barth gans y oferysi ha'y bennsevigyon.

⁸An distruer a dheu dhe bub sita, ha ny dhiank sita vyth; an nans a dhe goll, ha'n ughelgompesenn a vydh distruys, par dell gewsis an ARLOEDH.

⁹Gorrewgh hoelan war Moab, rag hi a vydh magoryow; hy threvow a vydh ynyal, heb annedhyas ynni.

¹⁰Mollethys yw ev neb yw diek ow kul ober an ARLOEDH, ha mollethys yw ev neb a with y gledha dhiworth skoellya goes.

¹¹Moab re beu attes a'y yowynkneth, sedhys avel gwin war y wodhes; ny veu gwakhes a lester dhe lester, na nyns eth yn divroedh; ytho y vlas re wortas ynno, ha nyns yw y sawer chanjys.

¹²Rakhenna, ott, an dydhyow a dheu, yn-medh an ARLOEDH, pan dhannvonav dhodho rennysi-gwin dh'y dreuslestra, hag i a wakha y lestri, ha terri y sethow yn darnow.

¹³Ha Moab a'n jevydh meth a Kemosh, dell borthas chi Ysrael meth a Bethel, may trestsons ynno.

¹⁴Fatell yllowgh leverel, ‘Kasoryon alloesek on ni, ha gwer nerthek rag an vresel’?

¹⁵Distruer Moab ha'y sitys re dheuth yn-bann, ha'y wer yowynk dhewisys res eth yn-nans dhe'n ladhva, yn-medh an Myghtern, ARLOEDH an luyow yw y hanow.

¹⁶Yma terroes Moab yn ogas ha'y anfeusi a nes yn uskis.

¹⁷Kynewgh warnodho, hwi oll yn y gyrghynn, ha peub a aswonn y hanow; leverewgh, ‘Ass yw terrys an dernwelenn alloesek, an vagel splann!’

¹⁸Diyskynn a'n golewder, hag esedh war an dor kras, ty annedhyades, myrgh Dibon! Rag distruer Moab re dheuth yn-bann er dha bynn; ev re dhistruis dha dinasow.

¹⁹Sav ryb an fordh ha mires, ty annedhyades Aroer! Govynn orto ev neb a fi ha'n venyn neb a dhienk; lavar, ‘Pandr'a hwarva?’

²⁰Moab yw gorrys dhe veth, rag hy bos terrys; kynewgh hag oelewgh! Leverewgh e yn Arnon, Moab dhe vos gwastys.

²¹Barn re dheuth war an ughelgompesenn, war Holon, ha Yahasa ha Mefaath,

²²ha Dibon, ha Nebo, ha Beth-dibathaym,

²³ha Kiryathaym, ha Beth-gamul, ha Beth-meon,

²⁴ha Kerioth, ha Bosra, ha war oll an sitys a bow Moab, pell hag ogas.

²⁵Korn Moab yw treghys dhe-ves, ha'y bregh yw terrys, yn-medh an ARLOEDH.

²⁶Gwrewgh dhodho bos medhow, drefenn ev dhe omvoghhe erbynn an ARLOEDH; gesiwgh Moab dhe omlagenna yn y hwyj y honan; hag ev ynwedh a vydh ges.

²⁷A nyns o Ysrael ges dhis, kyn nag o kevys yn mysk ladron? rag peskweyth may kewssys anodho ty a shakyas dha benn!

²⁸Gesiwgh an sitys, ha trigewgh y'n garrek, hwi annedhysi Moab! Bedhewgh avel an golomm a neyth yn amal ganow kownans.

²⁹Ni re glewas a woeth Moab — ha pur woethus yw ev — a'y ughelder, ha'y woeth ha'y valghder, hag a'y golonn howtyn.

³⁰My a woer y sorr, yn-medh an ARLOEDH; y vraslavarow yw fals, y weythresow yw fals.

³¹Ytho my a oul rag Moab; my a gri rag Moab oll; rag gwer Kir-heres my a gyn.

³²Moy es an oelva rag Yazer my a oel ragos, ty winwydhenn Sibma. Dha skorrennow a ystynnas a-dreus dhe'n mor, devedhys bys Yazer; war dha frutys hav ha trevas dha wingreun an distruer ew goedhas.

³³Heudhder ha lowena yw kemmerys dhe-ves a'n tir feyth a Moab; my re wrug dhe hedhi gwin a'n gwinwaskow; ny drett denvyth gans garmow lowender; an arm ny vydh garm a lowender.

³⁴Son aga kri a dheu dhiworth Heshbon bys Eleale, bys Yahas, dhiworth Soar bys Horonaym hag Eglath-shelishia. Rag hwath dowrow Nimrim yw devedhys ha bos difeyth.

³⁵Ha my a dhre diwedh yn Moab, yn-medh an ARLOEDH, dhodho ev neb a offrynn sakrifis yn tyller ughel ha leski offrynnow dh'aga duwow.

³⁶Ytho ow holonn a gyn rag Moab avel pibow, hag ow holonn a sen avel pibow rag gwer Kir-heres; rag an rychys re gavsons yw gyllys.

³⁷Rag pub penn a vydh moel ha pub barv treghys dhe-ves; war bub leuv y fydh skwardyow, hag yskar war an klunyow.

³⁸War do pub chi yn Moab, hag yn hy stretow nyns eus marnas kynvann; rag my re dorras Moab avel lester nag eus hwans anodho, yn-medh an ARLOEDH.

³⁹Ass yw hi terrys! Ass wrons kyni! Ass wrug Moab treylya hy heyn yn meth! Ytho Moab yw devedhys ha bos ges hag euth dhe beub yn y gyrghynn.

⁴⁰Rag yndellma y lever an ARLOEDH: Otta, ev a nij yn-nans avel er, ha lesa y dhiwaskell erbynn Moab;

⁴¹an sitys a vydh kemmerys ha'n dinasow dalghennys. Kolonn kasoryon Moab y'n jydh na a vydh kepar ha kolonn benyn yn hy gwelivesi.

⁴²Moab a vydh distruys ma na vydh pobel na fella, drefenn ev dhe omvoghhe erbynn an ARLOEDH.

⁴³Yma own, pytt, ha maglenn a-ragos, ty annedhyas Moab! yn-medh an ARLOEDH.

⁴⁴Seul a fi a'n browagh a goedh y'n pytt, ha seul a glamber yn-mes a'n pytt a vydh kechys y'n vaglenn. Rag my a dhre an traow ma war Moab yn blydhen aga hessydhyans, yn-medh an ARLOEDH.

⁴⁵Yn skeus Heshbon fowesigyon a hedhis, heb nerth; rag tan a dheuth yn-mes a Heshbon, flamm yn-mes a ji Sihon; ev a dhistruis tal Moab, ha kurun penn mebyon an tervans.

⁴⁶Go-jy, Moab! Pobel Kemosh res eth dhe goll, rag agas mebyon yw kemmerys yn keth, ha'th vyrghes yn kethneth.

⁴⁷Mes my a dreyl kethneth Moab y'n dydhyow diwettha, yn-medh an ARLOEDH. Bys hemma yma an varn war Moab.