Read Kernewek Yeremia 49 Bible Online

Yeremia 49 - Kernewek bible

Yeremia 49

¹A-dro dhe'n Ammonysi. Yndellma y lever an ARLOEDH: A nyns eus mebyon dhe Ysrael? A nyns eus her dhodho? Prag ytho yth eritas Milkom Gad ha'y bobel re annedhis yn y sitys?

²Rakhenna ott, an dydhyow a dheu, yn-medh an ARLOEDH, pan wrav an arm a vatel dhe vos klewys erbynn Rabba a'n Ammonysi; y fydh krug difeyth, ha'y threvow a vydh leskys gans tan; ena Ysrael a dhiserit an re a wrug y dhiserita ev, yn-medh an ARLOEDH.

³Oul, A Heshbon, rag Ay yw gwastys! Kriewgh, A vyrghes Rabba, Omwrogysiwgh gans yskar, galarewgh, ha poenyewgh omma hag ena ryb an keow. Rag Milkom a yn divroedh, war-barth gans y oferysi ha'y bennsevigyon.

⁴Prag y fostydh y'th nerth[40]? Dha nerth a deudh dhe-ves, A vyrgh dhislen. Ty a fydhyas y'th tresoryow, ow leverel, ‘Piw a dheu er ow fynn?’

⁵Otta, my a dhre euth warnas, yn-medh an Arloedh, DUW an luyow, a-dhiworth oll dha gentrevogyon; ha hwi a vydh skattrys, sket, heb denvyth dhe guntell an fowesigyon.

⁶Hag a-wosa my a dreyl kethneth an Ammonysi, yn-medh an ARLOEDH.

⁷A-dro dhe Edom. Yndellma y lever an ARLOEDH: A nyns eus furneth na fella yn Teman? Yw kusul an dhoethyon gyllys dhe goll? Yw pedrys aga furneth?

⁸Fiewgh, treylyewgh agas keyn, trigewgh isel, annedhysi Dedan! Rag my a dhre terroes Esaw warnodho, pan y'n kessydhyav.

⁹Mar teffa dhis kuntelloryon grappys, a ny assens rann? Mar teffa ladron y'n nos, a ny byllsens unnsel an pyth a ve lowr ragdha?

¹⁰Mes my, my re dhestryppyas Esaw, my re dhiskudhas y dylleryow kudh, ha ny yll omgudha. Y has yw distruys, y neskerens ha'y gentrevogyon; nyns usi namoy.

¹¹Gas dha omdhivasow, my a's gwith yn few; ha gas dha wedhwesow dhe fydhya ynnov.

¹²Rag yndellma y lever an ARLOEDH: Otta, seul na veu breusys dhe eva an hanaf a dal hwath y eva, ytho a vydhydh ty heb kessydhyans vyth? Ny vydhydh heb kessydhyans; res yw dhis y eva.

¹³Rag my re dos re'm honan, yn-medh an ARLOEDH, y fydh Bosra euth ha skorn ha difeyth ha molleth; ha'y sitys oll a vydh magoryow bys vykken.

¹⁴My re glewas nowodhow dhiworth an ARLOEDH, ha kannas re beu dannvenys yn mysk an kenedhlow: ‘Omguntellewgh war-barth ha dewgh er hy fynn, ha sevewgh dhe'n vatel!’

¹⁵Rag otta, my a'th wra an lyha yn mysk an kenedhlow, ha dispresys gans denses.

¹⁶An browagh gwrys genes ha goeth dha golonn re's toellas, ty usi trigys yn folsyow an garrek, neb a syns ughelder an vre. Kyn hwredh dha neyth mar ughel ages an er, alena my a'th tre dhe'n leur, yn-medh an ARLOEDH.

¹⁷Ynwedh Edom a vydh ynyal; peub a dremen dresti a gemmer skruth ha hwibana drefenn oll hy flagys.

¹⁸Par dell veu Sodom ha Gomorra ha'ga hentrevogyon domhwelys, yn-medh an ARLOEDH, ny vydh denvyth trigys ena, na ny vydh nagonan ynni avel alyon.

¹⁹Avel lew ow tos a-dhiworth kaswydh an Yordan erbynn peurva a dhur der an vlydhen, a-dhesempis my a jas Edom yn-mes anedhi distowgh; ha my a apoynt warnedhi piwpynag a dhewisav. Rag piw yw haval dhymm? Piw a yll ow gelwel dhe ri akont? Piw yw an bugel a yll sevel a-ragov?

²⁰Ytho klewewgh kusul an ARLOEDH erbynn Edom ha'y dowlow re formyas erbynn annedhysi Teman: Yn sur an lyha a'n flokk a vydh draylys dhe-ves; yn sur ev a wra aga feurva ynyal ragdha.

²¹Orth son aga hoedh, an nor a gren; son aga kri a vydh klewys orth an Mor Rudh.

²²Otta, ev a yskynn ha nija avel an er ha lesa y dhiwaskell war Bosra, ha kolonn breselyoryon Edom y'n jydh na a vydh avel kolonn benyn yn hy gwelivesi.

²³A-dro dhe Damaskus. Hamath hag Arpad a's teves meth, drefenn i dhe glewes yeyn nowodhow; i a deudh yn own, troblys yns avel an mor na yll bos kosel.

²⁴Damaskus yw devedhys ha bos gwann, hi re dreylyas dhe fia, ha skruth re's dalghennas, angoes ha gloesow re's synsis, avel benyn yn hy gwelivesi.

²⁵Ass yw forsakys an sita a vri, an dre lowenek!

²⁶Rakhenna hy gwer yowynk a goedh yn hy stretow, hag oll hy soudoryon a vydh distruys an jydh na, yn-medh ARLOEDH an luyow.

²⁷Ha my a enow tan orth fos Damaskus, hag a gowllesk lysyow Ben-hadad.

²⁸A-dro dhe Kedar ha gwlaskordhow Hasor a wrug Nebukadnessar myghtern Babylon aga fetha. Yndellma y lever an ARLOEDH: Sevewgh, kewgh yn-bann erbynn Kedar, ha distruewgh pobel an duryen.

²⁹I a gemmer aga thyldow ha'ga flokkys, aga kroglennow hag oll aga gwara; i a gemmer aga hawrvergh dh'aga honan, hag i a gri dhedha: ‘Yma euth a bub tu!’

³⁰Fiewgh, gwandrewgh pell dhe-ves, trigewgh yn tylleryow down, hwi annedhysi Hasor! yn-medh an ARLOEDH. Rag Nebukadnessar myghtern Babylon re dewlis towl er agas pynn ha gul entent er agas pynn.

³¹Sevewgh, kewgh yn-bann erbynn kenedhel attes, eus trigys yn tiagha, yn-medh an ARLOEDH, na's teves yetow na barrys, usi trigys hy honan.

³²Aga hawrvergh a vydh preydh, aga greow a warthek pyllans. My a skatter dhe bub gwyns an re a's teves talyow moel, ha my a dhre terroes er aga fynn a bub tu, yn-medh an ARLOEDH.

³³Hasor a vydh godegh owrgeun, difeyth bys vykken; ny vydh trigys denvyth ena, na ny vydh nagonan ynni avel alyon.

³⁴Ger an ARLOEDH a dheuth dhe Yeremia an profoes a-dro dhe Elam, yn dalleth reyn myghtern Sedekia myghtern Yuda.

³⁵Yndellma y lever ARLOEDH an luyow: My a derr gwarak Elam, penn aga nerth;

³⁶ha my a dhre war Elam an peswar gwyns a beswar korn nev; ha my a's skatter dhe oll an gwynsow ma, ha ny vydh kenedhel vyth dhedhi ma na dheu dhodho fowesigyon Elam.

³⁷My a worr euth yn Elam a-rag aga eskerens, hag a-rag an re a hwila aga bewnans; my a dhre anfeusi warnedha, ow sorr fers, yn-medh an ARLOEDH. My a dhannvon an kledha war aga lergh, bys pan wrav diwedh dhedha;

³⁸ha my a sett ow thron yn Elam, ha distrui aga myghtern ha'ga fennsevigyon, yn-medh an ARLOEDH.

³⁹Mes y'n dydhyow diwettha my a dhre arta kethneth Elam, yn-medh an ARLOEDH.