Read Kernewek Yeremia 5 Bible Online

Yeremia 5 - Kernewek bible

Yeremia 5

¹Gwandrewgh a-dro dre stretow Yerusalem, gwelewgh lemmyn, ha godhvydhewgh, ha hwilewgh yn hy plenys, mar kyllowgh kavoes gour, mars eus nebonan a wra breus, a hwila gwirder; ha my a's gav.

²Kyn leverons, ‘Dell vew an ARLOEDH’, yn sur i a de yn fals.

³A ARLOEDH, a nyns yw dha lagas war an gwirder? ty re's gweskis mes ny wodhevons payn; ty re's diswrug, mes i re naghas degemmeres dyskybleth: i re wrug aga fasow kalessa ages karrek; i re naghas dehweles.

⁴Ytho my a leveris, ‘Yn sur boghosek yw an re ma; gokki yns: rag ny wodhons fordh an ARLOEDH, na breus aga Duw.

⁵My a wra mos dhe'n dus veur, ha kewsel orta; rag i re wodhva fordh an ARLOEDH, ha breus aga Duw.’ Mes i keffrys re dorras an yew, ha terri an kolmow.

⁶Rakhenna lew yn-mes a'n goeswik a's ladh, ha bleydh a'n gwylvos a's diswra, lewpard a wra goelyas war aga sitys: pubonan neb a wra mos yn-mes alena a vydh skwardys dhe demmyn: drefenn aga threuspassow yw lies, ha'ga hildroyow yw moghhes.

⁷Fatell wrav vy gava hemma dhis? Dha fleghes re'm eskasas, ha ti re dhuwow nag yw duwow mann: My a's magas dhe walgh, i a wrug avoutri, hag omguntell yn routhow dhe jiow[10] horys.

⁸Avel mergh krev leunvegys ens y'n myttin: peub ow kryghias war-lergh gwreg y gentrevek.

⁹A ny wrav aga hessydhya drefenn an traow ma? yn-medh an ARLOEDH: hag a ny vydh ow enev diellys war genedhel a'n par ma?

¹⁰Kewgh yn-bann dre rewyow hy gwinbrennyer, ha distrui; mes na wra diwedh leun: tennewgh dhe-ves hy barrennow: rag nyns yns i dhe'n ARLOEDH.

¹¹Rag chi Ysrael ha chi Yuda re beu fest traytus er ow fynn, yn-medh an ARLOEDH.

¹²I re naghas an ARLOEDH, ha leverel, ‘Ny wra ev travyth; na ny wra drogedh dos warnan; ny welyn ni naneyl kledha na divoetter.’

¹³An brofoesi a vydh avel gwyns; ha nyns usi an ger ynna; yndellma y fydh gwrys dhedha.

¹⁴Rakhenna yndellma y lever an ARLOEDH, Duw an luyow, Drefenn hwi dhe gewsel an ger ma, otta, my a wra ow geryow tan y'th ganow, ha'n bobel ma prenn, ha'n tan a wra aga devorya.

¹⁵Otta, my a dhre warnowgh kenedhel a bellder, A ji Ysrael, yn-medh an ARLOEDH: kenedhel yw neb a dhur, kenedhel goth, kenedhel anedhi na wodhes hy yeth, na konvedhes an pyth a leverons.

¹⁶Aga goen-sethow yw avel bedh igor, kasoryon alloesek yns pub huni.

¹⁷I a wra dybri dha drevas, ha'th vara, a dalvia bos dybrys gans dha vebyon ha'th vyrghes: i a wra dybri dha flokkys ha'th greow; i a wra dybri dha winbrennyer ha'th figys; i a wra terri dhe demmyn dha sitys kerys, ynna may fydhsys, der an kledha.

¹⁸Mes hwath y'n dydhyow na, yn-medh an ARLOEDH, ny wrav diwedh leun genowgh.

¹⁹Hag y hwyrvydh, pan leverowgh, ‘Prag y hwra an ARLOEDH an traow ma dhyn?’ ena ty a worthyp dhedha, ‘Par dell wrussowgh ow eskasa, ha servya duwow estren yn agas tir, yndellma hwi a serv estrenyon yn tir nag eus dhywgh.’

²⁰Diskleryewgh hemma yn chi Yakob, ha'y dhyllo yn Yuda, ow leverel,

²¹Klewewgh hemma lemmyn, A bobel dhiboell, ha heb konvedhes; neb a's teves lagasow ha ny welons; neb a's teves skovornow, ha ny glewons.

²²A ny berthowgh own ahanav? yn-medh an ARLOEDH: a ny grenowgh a-ragov? My re worras an tewes avel or dhe'n mor, ordenans heb diwedh, ma na yll y dremena: an tonnow a sev yn trosek, mes ny's teves an galloes; kyn tarennons, ny yllons tremena dresto.

²³Mes an bobel ma a's teves kolonn yw gorth ha diwostydh; i re dreylyas a-denewen ha gyllys yns.

²⁴Ny leverons yn aga holonn, ‘Gwren ni perthi own a'n ARLOEDH agan Duw, neb a re an glaw, ha'n kynsa ha'n diwettha, yn y dermyn: ev a with ragon seythunyow ordenys an drevas.’

²⁵Agas drogoberow re dreylyas an traow ma dhe-ves, ha'gas peghosow re withas dader a-dhiworthowgh.

²⁶Rag kevys yw tebeles yn mysk ow fobel : i a gontrewayt ow skolkya kepar hag edhnoryon, i a sett antell, i a dhalghenn gwer.

²⁷Par dell yw kowell leun a ydhyn, yndellma aga chiow yw leun a doell: rakhenna i a dheu ha dos meur, ha tevi kevoethek.

²⁸Tevys tew yns, ha korfek. Nyns eus finweth dh'aga drog wriansow; ny vreusons gans gwirvreus ken an omdhivas, may siwenno; ha gwir an edhommogyon ny vreusons.

²⁹A ny wrav aga hessydhya drefenn an traow ma? yn-medh an ARLOEDH, a ny vydh ow enev diellys war genedhel a'n par ma?

³⁰Tra varthys ha skruthus yw hwarvedhys y'n tir;

³¹An brofoesi a brofoes yn fals, an oferysi a wovern herwydh aga awtorita aga honan;[11] ha'm pobel a gar y vos yndella: mes pandr'a wrewgh pan dheu an diwedh?