Read Kernewek Yeremia 50 Bible Online

Yeremia 50 - Kernewek bible

Yeremia 50

¹An ger a gewsis an ARLOEDH a-dro dhe Babylon, a-dro dhe bow an Kaldeanys, dre Yeremia an profoes:

²Diskleryewgh yn mysk an kenedhlow ha derivewgh, sevewgh baner ha derivewgh, na'n kudhewgh, leverewgh: Babylon yw kemmerys, Bel yw gorrys dhe veth, Merodak yw dyegrys. Hy imajys yw gorrys dhe veth, hy idolyow yw digolonnek.

³Rag yn-mes a'n gogledh y teu kenedhel er hy fynn, a wra hy thir ynyal, ha ny drig denvyth ynno, ha den ha best a fi dhe-ves.

⁴Y'n dydhyow na hag y'n termyn na, yn-medh an ARLOEDH, pobel Ysrael a dheu, i ha pobel Yuda war-barth; i a dheu yn unn oela ow hwilas an ARLOEDH aga Duw.

⁵I a wovynn an fordh dhe Sion ha'ga fasow treylys war-tu hag ev, hag i a dheu ow leverel, ‘Dewgh ha glena agan honan dhe'n ARLOEDH gans kevambos bys vykken, na vydh ankevys.’

⁶Ow fobel re beu deves kellys; aga bugeledh re's ledyas yn stray, orth aga threylya dhe-ves war an menydhyow; i res eth a'n menydh dhe'n vre, i re ankovas aga horlann.

⁷Peub a's kavas re's devoryas, ha'ga eskerens re leveris, ‘Nyns on kablus, drefenn i dhe begha erbynn an ARLOEDH, an gwir beurva, ha govenek aga thasow, an ARLOEDH.’

⁸Fiewgh a gres Babylon, kewgh dhe bow an Kaldeanys, ha bedhewgh avel boghes a-rag an flokk.

⁹Rag otta, my a dhifun kuntelles a genedhlow meur a dir an gogledh, ha'ga dri yn-bann erbynn Babylon; hag i a omsett yn aray er hy fynn; alena hi a vydh kemmerys. Aga sethow yw avel kasor sleygh na dhehwel gwag y leuv.

¹⁰Kaldea a vydh pyllys; ha peub a's pyll a vydh gwalghys, yn-medh an ARLOEDH.

¹¹Drefenn hwi dhe lowenhe, drefenn hwi dhe vos fest heudhik, hwi dhistruoryon ow ertach, kyn terlemmowgh avel denewes y'n aswels, ha kryghias avel mergh krev,

¹²agas mamm a's tevydh meth glan, ha hi a'gas dineythis a vydh diskrassyes. Otta, hi a vydh an lyha a'n kenedhlow, ynyal, syghtir, ha difeythtir.

¹³Drefenn sorr an ARLOEDH ny vydh hi annedhys, mes y fydh ynyal kowal; pubonan usi ow mos ryb Babylon a gemmer skruth ha hwibana orth oll hy flaow.

¹⁴Omsettyewgh yn aray erbynn Babylon oll a-dro; hwi oll neb a bleg an warak, tennewgh orti, na sparyewgh sethow, rag hi re beghas erbynn an ARLOEDH.

¹⁵Germewgh orti a bub tenewen, ‘Hi re omros; hy thouryow yw koedhys, hy fosow yw tewlys dhe'n dor.’ Rag hemm yw dial an ARLOEDH: diellewgh warnedhi, gwrewgh dhedhi an pyth a wrug hi.

¹⁶Treghewgh an gonador dhiworth Babylon, hag ev neb a handel an gromman yn prys mysi; drefenn kledha an arwasker i oll a dhehwel dh'aga fobel aga honan, hag i oll a fi dh'aga thir aga honan.

¹⁷Ysrael yw davas skattrys; lewyon re's fesyas. Yn kynsa, myghtern Assyria a's devoryas ha lemmyn y'n diwedh, Nebukadnessar myghtern Babylon re gnias hy eskern.

¹⁸Ytho, yndellma y lever ARLOEDH an luyow, Duw Ysrael: My a gessydh myghtern Babylon ha'y dir, par dell gessydhis myghtern Assyria.

¹⁹My a dhri Ysrael arta dh'y beurva, hag ev a voes war Karmel hag yn Bashan, ha war vreow Efraym hag yn Gilead y nown a vydh gwalghys.

²⁰Y'n dydhyow na hag y'n termyn na, yn-medh an ARLOEDH, anewnder Ysrael a vydh hwithrys ha ny vydh nagonan; ha peghosow Yuda, ha ny vydh kevys nagonan; rag my a av an re a wrav aga gasa.

²¹Ke yn-bann erbynn tir Merathaym, hag erbynn annedhysi Pekod, ha'ga gorladha, ha'ga sakra dhe dhistruyans leun, yn-medh an ARLOEDH; gwra pup-tra re worhemmynnis dhis.

²²Yma tros an vatel y'n tir, ha distruyans meur!

²³Ass yw morthol oll an nor treghys ha terrys! Ass yw Babylon devedhys ha bos euth yn mysk an kenedhlow!

²⁴My a settyas maglenn ragos ha ty a veu kechys, A Babylon, mes ny wodhyes; ty a veu kevys ha dalghennys drefenn ty dhe strivya erbynn an ARLOEDH.

²⁵An ARLOEDH re igoras y arvji, ha dri yn-mes arvow y sorr, rag hemm yw oberenn an ARLOEDH Duw an luyow yn tir an Kaldeanys.

²⁶Dewgh er hy fynn a bub tu; igerewgh hy greunjiow; bernyewgh hi avel graghellow greun, ha'y distrui glan; bedhes travyth gesys anedhi.

²⁷Ledhewgh oll hy lodhnow, gesiwgh i dhe vones yn-nans dhe'n ladhva. Go-i, aga dydh yw devedhys, termyn aga hessydhyans!

²⁸Klewir son an re a fi, hag a skap yn-mes a bow Babylon, dhe dheklarya yn Sion dial an ARLOEDH agan Duw, dial rag y dempel.

²⁹Gelwewgh sethoryon erbynn Babylon, oll an re a bleg an warak. Kampyewgh oll a-dro dhedhi; na esiwgh denvyth dhe dhiank. Attelewgh dhedhi war-lergh hy gweythresow; kepar dell wrug hi, gwrewgh dhedhi — rag hi re eryas an ARLOEDH yn falgh, an Sans a Ysrael.

³⁰Rakhenna hy gwer yowynk a goedh yn hy flenys, hag oll hy breselyoryon a vydh distruys y'n jydh na, yn-medh an ARLOEDH.

³¹Otta, yth esov er dha bynn, A dhen balgh, yn-medh an ARLOEDH, Duw an luyow; rag dha dhydh yw devedhys, an termyn ma'th kessydhyav.

³²An den balgh a drebuch ha koedha, heb denvyth dh'y dhrehevel, ha my a enow tan yn y sitys, hag a gowllesk pup-tra a-dro dhodho.

³³Yndellma y lever ARLOEDH an luyow: Mebyon Ysrael ha mebyon Yuda o arweskys war-barth; hag oll a's kemmeras yn kethneth a's synsis fast ha nagha gasa dhedha mos.

³⁴Aga Dasprenyas yw krev; ARLOEDH an luyow yw y hanow. Ev a bled aga hen yn sur, may rollo powes dhe'n tir, mes ankres dhe annedhysi Babylon.

³⁵Kledha erbynn an Kaldeanys, yn-medh an ARLOEDH, hag erbynn annedhysi Babylon, hag erbynn hy fennsevigyon ha'y gwer dhoeth!

³⁶Kledha erbynn an goelyogyon,[41] mayth ellons ha bos fellyon! Kledha erbynn hy breselyoryon, may fons lenwys a euth!

³⁷Kledha erbynn hy mergh ha'y charettow, hag erbynn oll an soudoryon estren yn hy mysk, mayth ellons ha bos avel benynes! Kledha erbynn oll hy thresoryow, may fons pyllys!

³⁸Syghor erbynn hy dowrow, may fons desyghys! Rag yth yw tir a imajys gravys, hag i yw foll yn aga idolyow.

³⁹Rakhenna enyvales gwyls a vydh trigys gans an owrgeun ha strusyow a vydh trigys ynni; ny vydh hi peblys arta bys vykken, na annedhys a henedh dhe henedh.

⁴⁰Par dell dhomhwelas Duw Sodom ha Gomorra ha'ga hentrevogyon, yn-medh an ARLOEDH, yndellma ny vydh denvyth trigys ena, na ny vydh denvyth ena avel alyon.

⁴¹Otta, yma pobel ow tos a'n gogledh; kenedhel veur ha lies myghtern a dhrehav a-dhiworth pella rannow an nor.

⁴²I a syns an warak ha'n guw, i yw fell ha ny dhiskwedhons truedh. Aga lev a romm avel an mor; i a varghogeth war vergh, settys yn aray avel gour rag batel, er dha bynn, A vyrgh Babylon!

⁴³Myghtern Babylon a glewas nowodhow anedha, ha'y dhiwleuv a goedhas diweres; angoes a'n dalghennas, ha gloesow avel benyn yn gwelivos.

⁴⁴Otta, ev a dheu avel lew a-dhiworth pryskwydh an Yordan erbynn peurva a dhur der an vlydhen, mes a-dhesempis my a's fes dhe-ves anedhi; ha my a orden warnedhi piwpynag a dhewisav. Rag piw yw avelov? Piw a yll ow gelwel? Piw yw an bugel a yll sevel a-ragov?

⁴⁵Ytho klewewgh kusul an ARLOEDH erbynn Babylon, ha'n porposys re wrug ev erbynn tir an Kaldeanys: Yn sur an lyha a'n flokk a vydh draylys dhe-ves; yn sur ev a wra aga feurva ynyal ragdha.

⁴⁶An nor a gren orth an galow ‘Kemmerys yw Babylon!’ ha'n kri a vydh klewys yn mysk an kenedhlow.