Read Kernewek Yeremia 52 Bible Online

Yeremia 52 - Kernewek bible

Yeremia 52

¹Sekedia a'n jevo unn bloedh warn ugens pan dhallathas reynya; ev a reynyas unnek blydhen yn Yerusalem. Hanow y vamm o Hamutal myrgh Yeremia a Libna.

²Ev a wrug an drog yn golok an ARLOEDH, poran kepar dell wrug Yehoyakim.

³Yn hwir, mar vras o sorr an ARLOEDH erbynn Yerusalem ha Yuda ma's tewlis mes a'y lok. Sedekia a rebellyas erbynn myghtern Babylon.

⁴Hag yn nawves blydhen y reyn, y'n degves mis, yn degves dydh an mis, Nebukadnessar myghtern Babylon a dheuth gans oll y lu erbynn Yerusalem, hag i a gampyas a-dro dhedhi; i a dhrehevis touryow-esedhva er y bynn oll a-dro.

⁵Ytho esedhva a veu gorrys a-dro an sita bys y'n unnegves blydhen a vyghtern Sedekia.

⁶Y'n nawves dydh a'n peswora mis an divoetter o mar sevur y'n sita ma nag esa boes rag pobel an tir.

⁷Ena aswa a veu gwrys yn fos an sita; hag oll an soudoryon a fias ha mos yn-mes a'n sita yn nos dre fordh an yet ynter an dhiw fos, ryb lowarth an myghtern, kynth esa an Kaldeanys oll a-dro dhe'n sita. I eth war-tu ha'n Araba.

⁸Mes lu an Kaldeanys a bursiwyas an myghtern, ha tremena dres Sedekia yn plenys Yeriko; hag oll y lu a veu skattrys a-dhiworto.

⁹Ena i a dhalghennas y'n myghtern ha'y dhri dhe vyghtern Babylon dhe Ribla yn pow Hamath, hag ev a ros breus warnodho.

¹⁰Myghtern Babylon a ladhas mebyon Sedekia a-rag y dhewlagas, hag ev a ladhas ynwedh oll pennsevigyon Yuda yn Ribla.

¹¹Ena ev a worras yn-mes dewlagas Sedekia, ha'y gelmi yn kadonyow; ha myghtern Babylon a'n dhug dhe Babylon, ha'y worra yn prison bys yn dydh y vernans.

¹²Y'n pympes mis, yn degves dydh an mis, hag a veu nownsegves blydhen Nebukadnessar myghtern Babylon, y teuth Nebuzaradan, kapten an withysi a servya myghtern Babylon, bys yn Yerusalem.

¹³Ev a loskas chi an ARLOEDH, ha chi an myghtern, hag oll chiow Yerusalem; pub chi meur ev a loskas gans tan.

¹⁴Oll lu an Kaldeanys esa gans kapten an withysi a dorras oll an fosow a-dro dhe Yerusalem.

¹⁵Ena Nebuzaradan kapten an withysi a dhug yn divroedh re a'n dus voghosek ha remenant an bobel re beu gesys y'n sita, ha'n gilfowesigyon re gilfisa dhe vyghtern Babylon, war-barth gans remenant an greftoryon.

¹⁶Mes Nebuzaradan kapten an withysi a asas nebes an dus voghosek a'n tir dhe vos gonedhysi gwinlannow hag aradroryon.

¹⁷An kolovenyow a vrons esa yn chi an ARLOEDH, ha'n synsellow, ha'n mor a vrons esa yn chi an ARLOEDH, an Kaldeanys a dorras dhe demmyn, ha doen oll an brons dhe Babylon.

¹⁸I a gemmeras dhe-ves an kalteryow, an reuvow, an gwelsigow-porv, an basonyow, an loyow-ledan, hag oll an lestri a vrons may hwrens menystra gansa.

¹⁹Kapten an withysi a gemmeras an pojeryow ynwedh, an padellow-tan, an basonyow, an kalteryow, an golowbrennyer, ha'n bollow-offrynn, ha'n re owrek ha'n re arghansek.

²⁰An dhew goloven, an unn mor, ha'n dewdhek tarow a vrons esa yn-dann an selyow, a wrussa myghtern Solomon rag chi an ARLOEDH — an brons a oll an lestri ma o dres poesa.

²¹Hag a-dro dhe'n kolovenyow, ughelder an unn goloven o etek kevelin, ha'y gompas o dewdhek kevelin; kow o ha'y dewder o peswar bys.

²²Ha warnodho yth esa penn a vrons; ughelder unn penn o pymp kevelin; roesweyth ha greunavalow, oll yn brons, a gylghyas penn an goloven. An nessa koloven a'n jevo an keth, gans greunavalow.

²³Yth esa hwetek greunaval ha peswar-ugens dhe'n tenwennow; sommenn an greunavalow a veu kans war an roesweyth a-derdro.

²⁴Kapten an withysi a gemmeras Seraya an pennoferyas, an nessa oferyas Sefania, ha'n tri gwithyas a'n treudhow;

²⁵hag a-dhiworth an sita ev a gemmeras unn soedhek re bia kaslewydh an vreselyoryon, ha seyth gour a gonsel an myghtern a veu kevys y'n sita; ha pennskrifennyas kaslewydh an lu neb a'n jevo charj a elwel pobel an tir yn-bann dhe'n lu; ha tri-ugens gour a bobel an tir a veu kevys a-ji dhe'n sita.

²⁶Ha Nebuzaradan kapten an withysi a's kemmeras, ha'ga dri dhe vyghtern Babylon dhe Ribla.

²⁷Ha myghtern Babylon a's gweskis, ha'ga gorra dhe'n mernans yn Ribla yn pow Hamath. Ytho Yuda eth yn divroedh yn-mes a'y dir.

²⁸Hemm yw an niver a dus a veu kemmerys yn divroedh gans Nebukadnessar: y'n seythves blydhen, tri mil Yedhow ha tri warn ugens;

²⁹y'n etegves blydhen a Nebukadnessar ev a gemmeras yn divroedh a-dhiworth Yerusalem eth kans den ha dewdhek warn ugens.

³⁰Y'n tressa blydhen warn ugens a Nebukadnessar, Nebuzaradan kapten an withysi a gemmeras yn divroedh seyth kans den pymp ha dew-ugens; oll an dus o peswar mil hwegh kans.

³¹Y'n seytegves blydhen warn ugens a divroedh Yehoyakin myghtern Yuda, y'n dewdhegves mis, y'n pympes dydh warn ugens a'n mis, Evil-merodak myghtern Babylon, y'n vlydhen may tallathas reynya, a dhrehevis penn Yekoyakin myghtern Yuda, ha'y dhri yn-mes a'n prison;

³²ev a gewsis dhodho yn kuv, ha ri dhodho esedh a-ugh esedhow an vyghternedh erell esa ganso yn Babylon.

³³Ytho Yekoyakin a worras a-denewen y dhillas prison, ha pub dydh a'y vewnans ev a dhybri bara a-ragdho.

³⁴Rag y alowans, alowans pub-dydhyek a veu res dhodho gans myghtern Babylon hedre vo bew, bys yn dydh y vernans.