Read Kernewek Yeremia 8 Bible Online

Yeremia 8 - Kernewek bible

Yeremia 8

¹Y'n termyn na, yn-medh an ARLOEDH, i a dhre yn-mes eskern myghternedh Yuda, hag eskern y bennsevigyon, hag eskern an oferysi, hag eskern an brofoesi, hag eskern annedhysi Yerusalem, yn-mes a'ga bedhow:

²hag i a's les a-rag an howl ha'n loer, hag oll lu an nevow, re wrussons aga hara ha'ga servya, ha kerdhes war aga lergh, ha'ga hwilas ha'ga gordhya; ny vydhons kuntellys, nag ynkleudhys; i a vydh avel teyl war enep an nor.

³Mernans a vydh dewisys kyns es bewnans gans oll an re gesys a'n tebel deylu ma, neb a worta yn oll an tylleryow le ma's herdhis, yn-medh ARLOEDH an luyow.

⁴Ty a lever dhedha: Yndellma y lever an ARLOEDH: Pan wra tus koedha, a ny wrons i sevel arta? Mar kwra nebonan treylya, a ny dhehwel?

⁵Ytho prag y hwrug an bobel ma, Yerusalem, treylya yn kildennans pup-prys? I a syns fast dhe doell, i a nagh dehweles.

⁶My a woslowas ha klewes, mes ny gewsons yn ewn: ny goedhas denvyth yn edrek a'y dhrogedh, ow leverel, ‘Pandr'a wrug vy’? I oll a dreyl dh'aga resegva, par dell fysk margh sket dhe'n vatel.

⁷Hwath an hwibon y'n nevow a aswonn y dermynyow; ha'n durenn ha'n wennel ha'n aran a aswonn termyn aga devedhyans; mes ny aswonn ow fobel vy breus an ARLOEDH.

⁸Fatell yllowgh leverel, ‘Fur on, hag yma lagha an ARLOEDH genen’? Otta, hi re beu treylys yn gow gans pluvenn wowek an skribys.

⁹Yma meth dhe'n dus fur, dyegrys yns ha kechys: otta, i re naghas ger an ARLOEDH, ha pana furneth eus dhedha?

¹⁰Ytho my a re aga gwragedh dhe re erell ha'ga farkow dhe'n re a's erit: rag pubonan a'n lyha dhe'n moyha yw kemmerys gans krefni; a'n profoes bys y'n oferyas pubonan a dhyght yn fals.

¹¹Rag i re sawyas goli myrgh ow fobel gans skavder, ow leverel, ‘Kres, kres’, pan nag eus kres.

¹²Esa meth dhedha pan wrussons pyth kasadow? Na, ny's tevo meth vytholl, na ny's tevo rudha. Ytho i a wra koedha yn mysk an re a goedh: yn termyn aga hessydhyans i a vydh domhwelys, yn-medh an ARLOEDH.

¹³My a's kuntell yn leun,[15] yn-medh an ARLOEDH: ny vydh gwinreun war an gwinbrenn, na ny vydh figys war an figbrenn, ha'n del a wedher; ha'n pyth a res dhedha a dremen a-dhiworta.

¹⁴Prag yth on esedhys stag? Omguntellewgh, hag entryn y'n sitys kerys, ha merwel ena: rag an ARLOEDH agan Duw re'gan daskorras dhe'n mernans, ha ri dhyn dowr gwenonek dhe eva, drefenn ni dhe begha erbynn an ARLOEDH.

¹⁵Agan govenek a veu kres, mes nyns esa dader; termyn yeghes, hag otta browagh.

¹⁶Ronkow aga mergh a veu klewys a-dhiworth Dan: orth son kryghias aga mergh krev an tir kowal a grenas; i re dheuth ha gwastya an tir, ha pup-tra eus ynno: an sita ha'n re usi trigys ynni.

¹⁷Rag, otta, my a dhannvon serf, nadres, yn agas mysk, na yll bos husys, hag i a'gas brath, yn-medh an ARLOEDH.

¹⁸Nyns eus eli rag ow anken;[16] ow holonn yw klav.

¹⁹Otta, lev kri myrgh ow fobel dre hys ha les an tir: ‘A nyns usi an ARLOEDH yn Sion? A nyns usi hy myghtern ynni?’ ‘Prag y hwrussons ow frovokya dhe sorr gans aga imajys gravys ha'ga idolys estren koeg?’

²⁰‘An drevas yw tremenys, an hav yw gorfennys, ha nyns on ni sawys.’

²¹Rag pystik myrgh ow fobel yth ov pystigys; kyni a wrav; euth re'm dalghennas.

²²A nyns eus balsam yn Gilead? a nyns eus medhek ena? Ytho prag nag eus yaghheans rag myrgh ow fobel?