Read Kernewek Yeremia 9 Bible Online

Yeremia 9 - Kernewek bible

Yeremia 9

¹Unnweyth a pe ow fenn dowrow, ha'm dewlagas fenten a dhagrow, mayth oellen dydh ha nos rag an re ledhys a vyrgh ow fobel![17]

²A pe dhymm harber an dremenysi y'n gwylvos may tiberthiv a'm pobel, ha mos anedha! Rag avoutroryon yns i oll, kuntelles a draytours.[18]

³I a bleg aga thaves avel aga gwarak rag gowyow: nyns yns kolonnek rag gwiryonedh war an nor; rag yth ons a dhrogedh dhe dhrogedh, ha ny'm aswonnons, yn-medh an ARLOEDH.

⁴Bedhewgh war peub a'y gentrevek, ha na fydhewgh yn broder vyth: rag pub broder yw purra toeller, ha pub kentrevek a wra kerdhes gans sklanderyow.

⁵Hag i a wra toella peub y gentrevek, ha ny wrons kewsel an gwiryonedh: i re dhyskas aga thaves dhe gewsel gowyow, ny yllons koedha yn edrek.

⁶Hys-ha-hys toell war doell, i a nagh ow aswonn, yn-medh an ARLOEDH.

⁷Yndella ytho y lever ARLOEDH an luyow: Otta, my a's purha ha'ga frevi; rag fatell allav gul ken drefenn myrgh ow fobel?

⁸Aga thaves yw avel seth varwel; kewsel toell a wra: den a lever geryow kres dh'y gentrevek der y anow, mes yn y golonn kontrewaytya a wra.

⁹A ny wrav vy aga hessydhya drefenn an traow ma? yn-medh an ARLOEDH: a ny vydh ow enev diellys war genedhel a'n par ma?

¹⁰Rag an menydhyow my a dhalleth oela ha kyni, ha rag peurvaow an gwylvos y hwrav kynvann, rag leskys yns, ma na yll nagonan tremena; na ny yll tus klewes son an gwarthek; hag ydhyn an nev ha'n bestes re fias; gyllys yns.

¹¹Ha my a wra dhe Yerusalem bos kalsow meyn, ha fow owrgeun; ha my a wra dhe sitys Yuda bos ynyal, heb annedhyas.

¹²Piw yw an gour doeth, a yll konvedhes hemma, may kewsis ganow an ARLOEDH dhodho, ma'n disklerro? Prag yth yw an tir diswrys ha gwastys kepar ha gwylvos, ma na dremen denvyth?

¹³Hag yn-medh an ARLOEDH: Rag i re forsakyas ow lagha a settis a-ragdha, ha ny vons gostydh dhe'm lev, na kerdhes ynni,

¹⁴mes kerdhes war-lergh gorthter aga holonn aga honan, ha war-lergh an Baalim, hag a dhyskas aga thasow dhedha.

¹⁵Rakhenna yndellma y lever ARLOEDH an luyow, Duw Ysrael: Otta, my a vag an bobel ma gans fuelenn, ha ri dhedha dowr gwenonek dhe eva.

¹⁶My a wra aga heskar yn mysk an kenedhlow, na aswonnis naneyl i na'ga thasow: ha my a wra dannvon kledha war aga lergh bys pan y's diswrav yn tien.

¹⁷Yndellma y lever ARLOEDH an luyow: Bedhewgh avisys, ha kriewgh war an kynoresow, may teffons; ha dannvenewgh war-lergh an kynoresow konnyk, may teffons:

¹⁸Gwrens i fistena, ha kemmeres yn-bann kynvann ragon, may tiverro agan lagasow gans dagrow ha may frosso kreghyn agan lagasow gans dowr.

¹⁹Rag lev kynvann yw klewys yn-mes a Sion, ‘Ass on ni diswrys! meth meur a'gan beus, drefenn ni dhe asa an tir, drefenn i dhe dewlel dhe'n dor agan annedhow.’

²⁰Ytho klewewgh ger an ARLOEDH, hwi venynes, ha gwres agas skovarn degemmeres an ger a'y anow, ha dyskewgh kynvann dh'agas myrghes, ha peub dh'y hentrevek galargan:

²¹‘Ankow re dheuth yn-bann dh'agan fenestri, hag entra yn agan lysyow, dhe dreghi an fleghes dhiworth an stretys, ha'n wer yowynk dhiworth an plenys.’

²²Kows, Yndellma y lever an ARLOEDH: ‘Hwath korfow tus a wra koedha avel teyl war an mes, avel an dhramm war-lergh an myser, ha nagonan ny's kuntell.’

²³Yndellma y lever an ARLOEDH: Na esiwgh an den fur dhe vostya yn y furneth, na na esiwgh an den krev dhe vostya yn y grevder, na na esiwgh an den rych dhe vostya yn y rychys:

²⁴Mes gesiwgh an re a vost dhe vostya yn hemma, ev dhe'm konvedhes hag aswonn, ow bos an ARLOEDH; a wra tregeredh, gwirvreus, hag ewnder war an nor: rag y'n traow ma my a lowenha, yn-medh an ARLOEDH.

²⁵Otta, yma an dydhyow ow tos, yn-medh an ARLOEDH, may kessydhyav oll an re yw trodreghys unnsel y'n kudhgenn;

²⁶Ejyp, ha Yuda, hag Edom, ha an Ammonysi, ha mebyon Moab, hag oll an re ma'th yw treghys blew aga thalyow; rag oll an kenedhlow ma yw antrodreghys, hag oll chi Ysrael yw antrodreghys y'n golonn.