Read Kernewek Kynvannow 1 Bible Online

Kynvannow 1 - Kernewek bible

Kynvannow 1

¹1 Ass yw an sita owth esedha digoweth hag o leun a dus! Ass yw hi gyllys kepar ha gwedhwes, hag o meur y'n kenedhlow! Neb o pennseviges y'n powyow re beu gorrys yn keth dhe hwel krev.

²Oela a wra hi truan nosweyth, ha'y dagrow war hy diwvogh; Nyns eus dhedhi konforter vyth a'y haroryon oll; Pubonan a'y howetha re's toellas, i re dheuth ha bos hy eskerens.

³Yuda res eth yn divroedh wosa galar ha wosa gwasonieth kales; hi a drig yn mysk an kenedhlow; mes ny gyv powesva; hy helghysi oll re settyas dalghenn ynni yn kres hy foenvos.

⁴Yma fordhow Sion ow kyni, rag ny dheu denvyth dhe'n goelyow; oll hy yetys yw forsakys, hy oferysi a hanas; grevys yw hy gwyrghesow, hag yma dhedhi hwerowder.

⁵Hy eskerens re dheuth ha bos penn, siwen yw hy envi, rag an ARLOEDH re's grevyas drefenn myns hy threuspassow; hy fleghes res eth yn kethneth a-rag an eskar.

⁶Omdennys yw dhiworth myrgh Sion oll hy meuredh, hy fennsevigyon yw kepar ha kerwys na yllons kavoes peurva; i a fias dhe'n fo heb galloes a-rag an helghyas.

⁷Yerusalem a berth kov, yn dydhyow hy anken ha'y diannetter, a'y fythow desirys oll a's tevo y'n dydhyow koth. Pan goedhas hy fobel yn dorn an eskar, heb denvyth a's gweressa, an eskerens a's gwelas, ha gul ges a'y therroes.

⁸Yerusalem re beghas dres eghenn, ha rakhenna res eth ha bos avlan; pubonan neb a's gordhya a's dispres, rag i re welas hy noethedh; kyni ynwedh a wra hi, ha treylya dhe-ves.

⁹Yth esa hy avlander yn hy lostennow, ny ombrederi a'y thenkys; rakhenna marthys veu hy therroes, nyns esa dhedhi konforter vyth. ‘Gwel, A ARLOEDH, ow anken, rag an eskar re dryghis!’

¹⁰An eskar re ystynnas y dhorn war oll hy fythow drudh; rag hi re welas an kenedhlow dhe entra yn hy thyller sans, an re a dhifennsys jy orta mayth entrons y'th kuntelles.

¹¹Hy fobel oll a gyn hag i ow hwilas bara; i a werth aga thresoryow rag boes may hwrellons dh'aga horf dasvewa. ‘Gwel, A ARLOEDH, ha mir, rag dispresys ov vy.’

¹²A ny vern travyth, oll hwi a dremen? Mirewgh, ha gweles mars eus ahwer kepar ha'm ahwer vy, a veu gorrys warnav, ma'm grevyas an ARLOEDH ganso yn dydh y sorr fers.

¹³A-wartha ev a dhannvonas tan; hag yth eth bys y'm eskern yn town; ev a lesas roes rag ow threys, ha'm treylya war-dhelergh; re'm gasas dyegrys, klamderys oll an jydh.

¹⁴Kelmys veu ow threuspassow warnav avel yew; gans y leuv y fons nedhys war-barth ha gorrys war ow honna,[1] ow kul dhe'm nerth fyllel; an Arloedh re'm ros yn diwla tus ma na allav sevel.

¹⁵An ARLOEDH re dewlis diwdhorn dhe-ves oll ow thus krev y'm mysk; ev a guntellas lu er ow fynn rag brewi flour ow gwer yowynk; an Arloedh re drettyas kepar hag yn gwinwask war an wyrghes, myrgh Yuda.

¹⁶Rag an re ma yth oelav dagrow; ow lagas a dhinwa dowr; rag pell ahanav yw neb a'm konfortyo, ow kul dhe'm enev dasvewa; ow mebyon yw forsakys, rag an eskar re dryghis.

¹⁷Sion a ystynn hy diwleuv; nyns eus dhedhi konforter vyth; an ARLOEDH re erghis erbynn Yakob may fo y gentrevogyon y eskerens; Yerusalem res eth ha bos tra avlan yn aga mysk.

¹⁸Gwiryon yw an ARLOEDH, drefenn ow bos diwostydh erbynn y anow; klewewgh, my a'gas pys, hwi boblow oll, ha mirewgh orth ow galar; ow gwyrghesow ha'm gwer yowynk res eth yn kethneth.

¹⁹My a grias war ow haroryon mes i a'm toellas; ow oferysi ha'm henavogyon re verwis y'n sita, hag i ow hwilas boes rag gul dh'aga enev dasvewa.

²⁰Mir, A ARLOEDH, ha grevys ov vy; ow holodhyon yw troblys, ow holonn yw treylys ynnov, rag diwostydh dres eghenn re beuv. A-ves, an kledha a ladh an fleghes, a-ji nyns eus saw mernans.

²¹I re glewas fatell wrug vy kyni; nyns eus dhymm konforter vyth. Oll ow eskerens a glewas a'm anken; lowen yns i drefenn ty dhe wul henna. Doroy an jydh a dherivsys, ha bedhens i kepar dell ov vy.

²²Des oll aga drogober a-ragos; ha gwra dhedha kepar dell wrussys dhymmo vy drefenn oll ow threuspassow; rag pals yw ow hanasow hag yma ow holonn ow klamdera.