Read Kernewek Kynvannow 4 Bible Online

Kynvannow 4 - Kernewek bible

Kynvannow 4

¹Ass yw an owr tewlhes, ass yw treylys an owr pur! Meyn an sentri yw skattrys orth penn pub stret.

²Mebyon dhrudh Sion, talvedhys kepar hag owr fin — Ass yns i akontys kepar ha sethow pri, ober diwla priweythor!

³Ynwedh owrgeun a ri aga bronn ha gasa aga helyn dhe sugna, mes myrgh ow fobel yw gyllys fell kepar ha strusyow y'n difeythtir.

⁴Taves an baban ow tena a len orth y stevnik gans syghes, fleghigow a bys bara, nyns eus neb a'n re dhedha.

⁵Myns a'n jevo sandow denti seuladhydh a dhe goll y'n stretys, myns a veu meythrys war goghlin a len orth teylegi.

⁶Brassa yw kessydhyans myrgh ow fobel ages an kessydhyans rag pegh Sodom, a veu domhwelys yn unn lamm, kyn na veu leuv vyth gorrys warnedhi.

⁷Glanna o hy nazirysi ages an ergh, kanna ages leth, ruttha aga horf ages koral, aga fisment kepar ha saffir.

⁸Lemmyn moy du yw aga fas ages hylgedh, nyns yns i aswonnys y'n stretys. Aga kroghen a len orth aga eskern, ha gwedhrys yw kepar ha prenn.

⁹Gwynnvys an re yw ledhys gans an kledha drefenn fowt askorr an gwel.

¹⁰Diwla benynes truedhek re vrojyas aga fleghes aga honan, gyllys yns i yn boes dhedha yn terroes myrgh ow fobel.

¹¹An ARLOEDH re gowlwrug y sorr, ha dyllo y sorr fers, hag enowi tan yn Sion a dhevoryas hy selyow.

¹²Ny wrug myghternedh an nor krysi, na trigoryon vyth a'n norvys y to eskar hag envi bys yn porthow Yerusalem.

¹³Y feu rag pegh hy frofoesi, drefenn kammwriansow hy oferysi hag a skoell goes an dus wiryon a-berth ynni.

¹⁴I a wandras dall y'n stretys, mostys vons gans goes bys ma na allas denvyth tochya aga dillas.

¹⁵‘Dhe-ves! Avlan!’ a veu kriys warnedha. ‘Dhe-ves! Dhe-ves! Na dochyewgh!’ Ytho i a fias dhe'n fo ha gwandra. Y leverys y'n kenedhlow, ‘Na wrens i triga omma namoy.’

¹⁶Fas an ARLOEDH re wrug aga skattra, ny vir orta namoy, ny enorsons fasow oferysi, ny faversons henavogyon.

¹⁷Hwath agan dewlagas a fyllis, ow kortos difres yn euver; yn agan goelva ni a woelyas rag kenedhel na allas sawya.

¹⁸I a holyas war agan lergh bys ma na yllyn kerdhes yn agan stretys; yth esa agan diwedh ow tos nes, kowlwrys veu agan dydhyow, rag agan diwedh re dhothya.

¹⁹Skaffa veu agan helghysi ages eryon an nevow; war an menydhyow i a'gan chasyas, y'n difeythtir i a'gan kontrewaytyas.

²⁰Untys an ARLOEDH, anall agan dewfrik, a veu kechys yn aga antylli, may leversyn anodho ‘Yn-dann y skeus y fewyn ni yn mysk an kenedhlow.’

²¹Lowenha ha bydh heudhik, A vyrgh Edom, neb a drig yn pow Us, ynwedh dhiso jy tremena a wra an hanaf. Medhwys vydhydh, ha ty a lommha dha honan.

²²Kowlwrys yw kessydhyans dha sherewneth, a vyrgh Sion, ny wra ev dha witha yn divroedh na fella; ev re wrug dha gessydhya drefenn dha sherewneth, a vyrgh Edom, ha diskudha dha beghosow.