Read Kernewek Baruk 2 Bible Online

Baruk 2 - Kernewek bible

Baruk 2

¹Ytho, an Arloedh a afydhyas y er a gewsis er agan pynn hag erbynn agan breusysi a vreusi Ysrael hag erbynn agan myghternedh hag erbynn agan pennsevigyon hag erbynn an dus a Ysrael ha Yuda.

²Yn-dann an nev oll, ny veu gwrys taklow a'n par ma dell wrug ev yn Yerusalem, herwydh an pyth yw skrifys yn lagha Moyses,

³may tyb'sen, an eyl kig y vab hag y gila kig y vyrgh.

⁴Hag ev re's delivras dhe vos gostydh dhe oll an gwlaskordhow usi a-dro dhyn, ha mewl hag ynyalder yn mysk oll an poblow yn agan kyrghynn, y'n tylleryow may hwrug an Arloedh aga skattra.

⁵Yndella tewlys dhe'n leur yth esens a-der drehevys yn-bann, drefenn ni dhe begha erbynn an Arloedh agan Duw rag ny woslowsyn orth y lev.

⁶Dhe'n Arloedh agan Duw yma ewnder, mes yma meth a'n fas ragon ni ha'gan tasow kepar dell eus y'n jydh hedhyw.

⁷Oll an drogow ma a wrug an Arloedh godros ragon re dheuth warnan.

⁸Hwath ny bysyn favour an Arloedh, ow treylya dhe-ves, peub ahanan, a-dhiworth prederow y golonn dhrog.

⁹Ha'n Arloedh a woelyas war an drogow, ha'n Arloedh re's dros warnan, rag an Arloedh yw gwiryon yn oll y oberow a worhemmynnis dhyn.

¹⁰Hwath, ny woslowsyn dh'y lev, dhe gerdhes yn ordenansow an Arloedh a settyas a-ragon.

¹¹Ha lemmyn, A Arloedh, Duw Ysrael, neb a dhros dha bobel yn-mes a bow Ejyp dre leuv grev ha gans sinys ha marthusyon ha gans galloes meur ha bregh ystynnys, ha re wrug dhis hanow kepar dell yw y'n jydh hedhyw,

¹²ni re beghas, ni re beu ongrassyes, ni re wrug kamm, A Arloedh agan Duw, erbynn oll dha ordenansow.

¹³Gas dha sorr dhe dreylya dhe-ves a-dhiworthyn, rag yth eson gesys, boghes agan niver, yn mysk an kenedhlow ma'gan skattrsys ynna.

¹⁴Klew, A Arloedh, agan pysadow ha'gan govynnadow hag a-barth dhis dha honan, deliver ni, ha gront dhyn favour yn wel an re re'gan hembronkas bys yn divroedh;

¹⁵rag may hwodhvo an norvys oll, ty dhe vos an Arloedh agan Duw, rag Ysrael ha'y henedh yw gelwys gans dha hanow.

¹⁶A Arloedh, mir yn-nans a-dhiworth dha drigva sans ha preder ahanan. Pleg dha skovarn, A Arloedh, ha klew;

¹⁷igor dha dhewlagas, A Arloedh, ha mir; rag an re tremenys usi y'n bedh, may feu aga enev kemmerys a-dhiworth aga horf, ny askrifons dhe'n Arloedh naneyl wormel nag ewnder,

¹⁸mes an enev yw grevys yn feur hag a wra mos a-derdro yn unn warrgromma ha gwann, ha'n lagas ow fyllel ha'n enev nownek, a askrif dhis gormel hag ewnder, A Arloedh.

¹⁹Rag, nyns yw drefenn oberow gwiryon pynag a'gan tasow po a'gan myghternedh y tren ni a-dheragos agan pysadow rag mersi, A Arloedh agan Duw.

²⁰Rag ty re dhannvonas dha sorr ha'th konnar warnan, kepar dell gewssys dre dha wesyon an brofoesi, ow leverel:

²¹Yndellma y lever an Arloedh: Plegyowgh agas diwskoedh dhe servya myghtern Babylon, ha hwi a drig y'n tir a res dh'agas tasow.

²²Mes, mar ny vynnowgh klewes lev an Arloedh dhe servya myghtern Babylon,

²³my a wra dhe hedhi a-dhiworth sitys Yuda hag a-dhiworth an ranndir a-dro dhe Yerusalem, lev lowender ha lev joy, lev an gour pries ha lev an venyn bries, ha'n tir oll a vydh ynyalder heb annedhysi ynno.

²⁴Mes ny obaysyn dha lev, dhe servya myghtern Babylon, ha ty re gompoesas dha eryow a gewssys dre dha wesyon an brofoesi, y fedha eskern a'gan myghternedh hag eskern a'gan tasow dres yn-mes a'ga bedh;

²⁵hag otta, i re beu tewlys yn-mes dhe doemmder an jydh, ha dhe rew an nos, hag i a verwis yn anken meur, dre dhivoetter ha kledha ha pla.

²⁶Ha'n chi henwys gans dha hanow, ty re'n gwrug kepar dell yw y'n jydh hedhyw, drefenn sherewynsi chi Ysrael ha chi Yuda.

²⁷Hwath, ty re'gan dyghtyas, A Arloedh agan Duw, yn oll dha guvder, hag yn oll dha druedh meur,

²⁸kepar dell leversys dre dha was Moyses y'n jydh ma'n gorhemmynnsys dhe skrifa dha lagha yn lok mebyon Ysrael, ow leverel,

²⁹‘Mar ny obayowgh ow lev, an routh pur vras ma a vydh, yn hwir, treylys dhe niver byghan yn mysk an kenedhlow ma's skattrav ynna.

³⁰Rag my a woer, na'm obayons, rag pobel kales hy hilbenn yns i. Mes yn tir aga divroedh, i a dheu dh'aga skians,

³¹hag i a woer ow bos an Arloedh aga Duw. My a re dhedha kolonn ha diwskovarn a woslow;

³²hag i a'm gormel yn tir aga divroedh, ha perthi kov a'm hanow,

³³ha treylya a-dhiworth aga gorthter ha'ga drogoberow, rag i a berth kov a fordhow a'ga thasow neb a beghas a-dherag an Arloedh.

³⁴My a's dre arta dhe'n tir a des y ri dh'aga thasow, dhe Abraham ha dhe Ysak ha dhe Yakob, hag i a'n rewl, hag my a's ynkress ha ny vydhons tanowhes.

³⁵My a wra kevambos bys vykken gansa dhe vos aga Duw hag i a vydh ow fobel ha nevra namoy ny removyav ow fobel Ysrael a-dhiworth an tir a ros vy dhedha.’