Read Kernewek Baruk 3 Bible Online

Baruk 3 - Kernewek bible

Baruk 3

¹A Arloedh ollgalloesek, Duw Ysrael, an enev yn angoes ha'n spyrys moredhek a arm dhis.

²Klew, A Arloedh, ha kemmer mersi, rag ni re beghas a-dheragos.

³Rag ty a esedh y'th tron bys vykken, ha ni yw diswrys bys vykken.

⁴A Arloedh ollgalloesek, Duw Ysrael, klew lemmyn pysadow an re varow a Ysrael, ha mebyon an re a beghas a-dheragos, neb na woslowas orth lev agan Duw, may serghis terroesow dhyn.

⁵Na borth kov a dhrogoberow agan tasow, mes y'n termyn ma, porth kov a'th halloes ha'th hanow.

⁶Rag an Arloedh agan Duw osta, ha ni a'th wormel, A Arloedh.

⁷Rag ty re worras an own ahanas yn agan kolonn, rag may halwsen war dha hanow, ha ni a'th wormel yn agan divroedh, rag ni re worras dhe-ves a-dhiworth agan kolonn oll drogoberow agan tasow neb a beghas a-dheragos.

⁸Otta, yth eson ni hedhyw yn agan divroedh may hwrussys agan skattra dhe vos keredhys ha mollethys ha kessydhys rag oll drogoberow agan tasow neb a forsakyas an Arloedh agan Duw.

⁹Klew gorhemmynnow bewnans, a Ysrael, goslowewgh ha dyskewgh konvedhes.

¹⁰Prag yth yw, a Ysrael, prag yth yw dha vos yn tir dha eskerens, ty dhe vos ow kothhe yn pow astranj, ty dhe vos defolys gans an re tremenys,

¹¹ty dhe vos niverys yn mysk an re usi yn ifarn?

¹²Ty re forsakys an fenten a furneth.

¹³Rag, mar kerdhses yn fordh Duw ty a via ow triga yn kres bys vykken.

¹⁴Dysk ple'ma doethter, ple'ma nerth, ple'ma konvedhes, rag may hwodhvi, yn kettermyn, ple'ma hirder a dhydhyow ha bewnans, ple'ma golow rag an dhewlagas, ha kres.

¹⁵Piw re gavas hy le? Ha piw re entras hy thresorvaow?

¹⁶Ple'ma pennsevigyon an kenedhlow ha'n re yw arlydhi dres bestes an norvys;

¹⁷an re a sport gans ydhyn an ayr, hag a with arghans hag owr ragdha aga honan, may hwra tus fydhya ynna, ha nyns eus penn dh'aga hovaytis;

¹⁸an re a dowl towl dhe gavoes arghans, hag yw prederus, ha nyns eus ol a'ga oberow?

¹⁹Gyllys glan yns, gyllys yn-nans dhe ifarn, ha re erell re dhrehevis yn aga le.

²⁰Henedhow nowydh re welas an golow ha re drigas war an norvys; mes ny dhys'sons an fordh dhe skians,

²¹na konvedhes hy hynsyow na settya dalghenn ynni. Aga mebyon re wandras pell dhiworth aga fordh.[1]

²²Ny veu klewys son anedhi yn Kanan, na ny veu hi gwelys yn Teman;

²³mebyon Hagar neb a hwila konvedhes war an norvys, marchons Merran ha Teman, an rakkoryon ha'n re a hwila konvedhes, ny dhys'sons an fordh dhe furneth, na ri preder dh'y hynsyow.

²⁴A Ysrael, ass yw meur chi Duw! Hag ass yw efan an tiredh a bew ev!

²⁵Meur yw, ha heb or, ughel yw ha heb musur.

²⁶An gewri a veu dineythys ena, neb o gerys-da a henys, meur yn ughelder, konnyk yn bresel.

²⁷Ny's dewisas Duw, na ri dhedha an fordh dhe skians;

²⁸ytho, i a veu distruys drefenn na's teva doethter, i eth dhe goll dre aga foli.

²⁹Piw res eth yn-bann yn nev ha'y hemmeres, ha'y dri yn-nans a-dhiworth an kommol?

³⁰Piw res eth a-dreus dhe'n mor ha'y havoes, hag a's pren a owr pur?

³¹Denvyth ny woer hy fordh na ny'n jeves bern a-dro dh'y hyns.

³²Mes ev neb a woer pup-tra oll a's goer, ev a's kavas dre y gonvedhes. Ev neb a bareusis an norvys rag oll termyn, a'n lenwis gans kreaturs peswar-troesek;

³³ev neb a dhannvon yn-rag an golow, ha mos a wra, ev a'n gelwis, hag ev a'n obayas ow krena;

³⁴an ster a derlentris yn aga goelyow ha lowen ens; ev a's gelwis hag i a leveris ‘Ottani!’ I a derlentris gans lowena ragdho ev neb a's gwrussa.

³⁵Hemm yw agan Duw, nagonan arall ny yll bos kehevelys dhodho.

³⁶Ev a gavas an fordh dien dhe skians ha'y ri dhe Yakob y was, ha dhe Ysrael y veurgerys.

³⁷A-wosa hi a omdhiskwedhas war an norvys ha triga yn mysk mab-den.