Read Kernewek Baruk 6 Bible Online

Baruk 6 - Kernewek bible

Baruk 6

¹[3] Dasskrif a lyther a wrug Yeremia y dhannvon dhe'n re a vedha hembrenkys yn divroedh dhe Babylon gamans myghtern an Babylonianys, dhe dherivas dhedha an messaj par dell via erghys dhodho gans Duw.

²Rag peghosow re wrussowgh a-dherag Duw, hwi a vydh hembrenkys yn divroedh dhe Babylon gans Nebukadnessar myghtern an Babylonianys.

³Rakhenna, wosa dos dhe Babylon hwi a drig ena lies blydhen, ha rag termyn hir, bys seyth henedh; ha wosa henna my a'gas dre dhe-ves alena yn kres.

⁴Lemmyn yn Babylon hwi a wel duwow gwrys a arghans hag owr ha prenn, usi degys war dhiwskoedh dus hag a wra dhe'n kenedhlow perthi own anedha.

⁵Ytho, gwaytyewgh na wryllowgh dos ha bos kammenn kepar ha'n estrenyon, na perthi own anedha, pan welowgh an routh a-dheragdha hag a-dryv dhedha, orth aga gordhya.

⁶Mes leverewgh yn agas kolonn, ‘Ty yw neb a res dhyn y wordhya.’

⁷Rag yma ow el genowgh, hag yma ev ow kwitha war agas enevow.

⁸Rag aga thaves yw levenhes gans an krefter, hag i aga honan yw gorlownys gans owr hag arghans; hwath fals yns ha ny's teves kewsel.

⁹Hag ow kemmeres owr, i a wra kurunyow rag pennow aga duwow, kepar dell ve rag mowes neb a gar bos afinys.

¹⁰Treweythyow ynwedh an oferysi a gemmer a-dhiworth aga duwow owr hag arghans, ha'y spena warnedha aga honan.

¹¹Hag i a re nebes anodho dhe'n horys-tempel; hag i a's gwisk kepar ha tus gans dillasennow, an duwow ma a arghans hag owr ha prenn.

¹²Mes, ny yll an duwow ma omsawya aga honan a-dhiworth kesknians ha goedhanes, kyn fons gwiskys yn goenyow purpur.

¹³I a lanha aga fas dre reson a bolter an tempel, yw tew warnedha.

¹⁴Onan anedha a syns ternwelenn, par dell ve breusyas rannvro, mes ny yll gorra dhe'n mernans nagonan a wra y offendya.

¹⁵Ev a'n jeves ynwedh yn y leuv dhyghow dagyer ha boel: mes ny yll ev delivra y honan a-dhiworth bresel ha ladron.

¹⁶Ytho gans henna kler yw nag yns duwow: rakhenna na berthewgh own anedha.

¹⁷Rag kepar dell yw lester den diles pan yw terrys, yndella ynwedh yw gans aga duwow, wosa i dhe vos settys yn-bann y'n tempel. Aga dewlagas yw leun a bolter dre dreys an re a enter ynno.

¹⁸Kepar dell yw an yetys degeys a bub tu war dhen neb re wrug kamm erbynn an myghtern, par dell ve dampnys dhe'n mernans, yn kepar maner an oferysi a fast aga themplow gans darasow, florennow ha barrys, ma na vons pyllys gans ladron.

¹⁹I a enow lugern, moy es dell wrons ragdha aga honan, kyn na yll aga duwow gweles nagonan anedha.

²⁰Kepar hag onan a gebrow an tempel yns, mes y leverir bos aga holonn kniys gans an pryves a slynk yn-mes a'n dor; ha pan y's debrons, ha'ga dillasennow, ny wrons y attendya.

²¹Aga fas re beu duhes gans an mog hag a dheu yn-mes a'n tempel.

²²War aga horf ha penn a esedh eskelli-kroghen, gwennili hag ydhyn, ha'n kathes ynwedh.

²³Dre hemma hwi a woer nag yns duwow: rakhenna na berthewgh own anedha.

²⁴Yn despit dhe'n owr a wiskons rag tekter, ny yllons terlentri marnas nebonan a lanha dhe-ves an wossen, rag hwath pan esens ow pos teudhys ny wrens y attendya.

²⁵An taklow ma yw prenys na fors an kost, mes nyns eus anall ynna.

²⁶Ymons i degys war dhiwskoedh tus, drefenn na's teves treys, yndellma i a dhiskudh dhe vab-den aga bos koeg.

²⁷Ha'n re a's serv yw methek, rag mar koedhons dhe'n leur nep-prys, ny yllons sevel arta dredha aga honan; na ny yllons gwaya aga honan mara's settyer a'ga sav; na ny yllons sevel a'ga sav dredha aga honan. Ha mars yns i disevys, ny yllons omsettya kompes. I a worr rohow a-dheragdha kepar dell ve a-dherag an re varow.

²⁸Aga oferysi a werth an taklow offrynnys dhedha, hag usya an mona ragdha i aga honan. Yn kepar maner aga gwragedh a gyfeyth rann anodho yn hoelan; mes dhe'n voghosogyon ha'n re diweres, ny rons travyth anodho.

²⁹Benynes yn aga amseryow misyek ha benynes yn gwelivos a yll tochya aga offrynnow. Hwi a woer dre an taklow ma nag yns duwow; na berthewgh own anedha.

³⁰Rag fatell yllons bos gelwys duwow? Benynes a sett boes a-dherag an duwow a arghans hag owr ha prenn;

³¹ha'n oferysi a esedh yn aga thempel, gans aga dillas skwardys, ha blew aga fenn ha barv treghys dhe-ves, ha travyth war aga fenn.

³²I a vedhygel ha garma a-dherag aga duwow kepar dell wra tus orth goel ynkleudhyans rag den marow.

³³Ha'n oferysi ynwedh a gemmer rann a dhillas aga duwow dhe dhillasa aga gwragedh ha fleghes.

³⁴Mars usi gwrys dhedha po drog po da, ny yllons y attyli: ny yllons settya myghtern yn-bann na'y worra dhe'n leur.

³⁵Yn kepar maner, ny yllons ri rychys nag arghans: kyn hwrello den ambos dhedha ha ny'n gwith, ny yllons y hwilas dhiworto.

³⁶Ny yllons sawya den dhiworth mernans na delivra an den gwann dhiworth an den krev.

³⁷Ny yllons daswul gwel dhe'n dall, na gweres den neb usi yn ahwer.

³⁸Ny yllons kemmeres truedh a wedhwes, na gul da dhe omdhivas.

³⁹Aga duwow a brenn hag usi gorlownys gans owr ha gans arghans, yw haval dhe veyn dhiworth an menydh: ha'n re neb a's gordh a berth meth.

⁴⁰Fatell yll den tybi ha leverel aga bos duwow, pan wra an Kaldeanys aga honan aga disenora?

⁴¹Rag pan welons den avlavar na'n jeves kewsel, i a'n dre ha pysi war Bel may kewsso an den, kepar ha pan alla konvedhes.

⁴²Hwath ny yllons konvedhes hemma aga honan, ha'ga gasa; rag ny's teves skians.

⁴³Ha'n benynes gans kerdyn yn aga hyrghynn owth esedha y'n skochfordhow, a lesk talgh rag ynkys; mes mar kwrella onan anedha, hembrenkys dhe-ves gans neb tremenyas, growedha ganso, hi a wra ges a'n venyn rybdhi, drefenn nag o hi mar dennvosek avelli hi hy honan, na ny veu hy hordenn terrys.

⁴⁴Pypynag yw gwrys ragdha yw fals; ytho fatell yllir tybi po leverel aga bos duwow?

⁴⁵Gwrys gans seri prenn hag owroryon yns; ny yllons bos travyth saw unnsel an pyth a vynn an kreftwas aga bos.

⁴⁶Hag i aga honan neb a's gwrug yn sur ny vewons pur hir; rakhenna fatell yll an taklow gwrys gansa bos duwow?

⁴⁷Rag i re asas gowyow ha keredhyow rag an re a dheu a-wosa.

⁴⁸Rag pan dheu bresel po pla warnedha, an oferysi a omgusul war-barth a-dro dhe'n tyller may hallons kudha aga honan ha'ga duwow gansa.

⁴⁹Ytho prag y fyll tus dhe weles nag yns duwow, rag ny yllons sawya aga honan dhiworth bresel na dhiworth pla?

⁵⁰Rag pan welir nag yns saw a brenn, ha gorlownys gans arghans hag owr, y fydh konvedhys alemma rag aga bos fals.

⁵¹Hag y fydh apert dhe oll an kenedhlow ha'n vyghternedh nag yns duwow, mes ober diwla tus, ha nag eus ober Duw ynna.

⁵²Piw ytho, a yll fyllel dhe wodhvos nag yns duwow?

⁵³Rag ny yllons settya myghtern yn-bann y'n tir na ri glaw dhe dus.

⁵⁴Ny yllons breusi aga hen aga honan, na delivra den may feu kamm gwrys dhodho; rag ny's teves galloes; i yw kepar ha brini yntra nev ha nor.

⁵⁵Pan goedh tan war ji an duwow a brenn, po gorlownys gans owr po gans arghans, aga oferysi a fi dhe'n fo ha skapya; mes an duwow aga honan a vydh kowlleskys kepar ha kebrow.

⁵⁶Ny yllons sevel orth myghtern vyth po eskerens. Fatell yllir tybi po leverel aga bos duwow?

⁵⁷Ny yll duwow a brenn, ha gorlownys gans arghans hag owr, skapya dhiworth naneyl ladron na robbyoryon.

⁵⁸Aga owr, hag arghans, ha dillas may mons i dillasys ynna, an re neb yw krev a's kemmer ha mones dhe-ves gansa, ha ny yllons gweres aga honan.

⁵⁹Rakhenna gwell yw bos myghtern neb a dhiskwa y golonnekter, po lester dhe les yn chi, a serv edhomm y berghenn, ages bos an fals dhuwow ma; gwell hwath bos daras yn chi hag a with saw an taklow usi ynno, ages fals dhuwow a'n par na; gwell ynwedh koloven a brenn yn palys, ages an fals dhuwow fals ma.

⁶⁰Rag howl, loer, ha ster, ow terlentri ha dannvenys dhe wul aga gonisyow, yw gostydh.

⁶¹Yn kepar maner an lughesenn, pan lughes, yw es dhe weles; hag y'n keth vaner an gwyns a hwyth yn pub bro.

⁶²Ha pan worhemmynn Duw an kommol dhe vones dres an bys oll, i a wra kepar dell yw erghys dhedha.

⁶³Ha'n tan dannvenys a-wartha dhe dhistrui breow ha koesow a wra kepar dell yw erghys dhodho. Mes nyns yw an idolys ma haval dhedha naneyl yn semlans na galloes.

⁶⁴Rakhenna, ny yll bos naneyl tybys na leverys aga bos duwow, rag ny yllons breusi ken, na gul da dhe dus.

⁶⁵Ytho rag hwi dhe wodhvos nag yns duwow, na berthewgh own anedha.

⁶⁶Rag ny yllons mollethi na benniga myghternedh.

⁶⁷Ny yllons diskwedhes arwoedhyow y'n nevow yn mysk an kenedhlow, na splanna kepar ha'n howl, na ri golow kepar ha'n loer.

⁶⁸An bestes yw gwell agessa; rag i a yll fia yn-dann woskes, ha gweres aga honan.

⁶⁹Ytho nyns yw apert dhyn kammenn aga bos duwow; rakhenna na berthewgh own anedha.

⁷⁰Rag kepar ha boekka yn lowarth kukumbrow na with travyth, yndella yw aga duwow a brenn, gorlownys gans owr hag arghans.

⁷¹Y'n keth vaner aga duwow a brenn, gorlownys gans arghans hag owr, yw haval dhe spernenn yn lowarth, mayth esedh pub ydhyn warnedhi; ynwedh haval yw dhe gorf marow tewlys y'n tewlder.

⁷²Ha hwi a woer nag yns duwow dre an purpur ha'n sendal splann ow pedri warnedha; hag i aga honan wortiwedh a vydh dybrys, hag a vydh mewl y'n tir.

⁷³Gwell rakhenna yw den gwiryon na'n jeves idolys vyth, rag ev a vydh pell a-dhiworth mewl.