Read Kernewek Kan an Tri Mab 1 Bible Online

Kan an Tri Mab 1 - Kernewek bible

Kan an Tri Mab 1

¹[24] Hag yth esens ow kerdhes a-dro yn kres an flammow, ow kana hymnys dhe Dhuw hag ow penniga an Arloedh.[1]

²[25] Hag ow sevel yn-bann, Azaria a bysis yndellma, hag owth igeri y anow yn kres an tan, ev a leveris:

³[26] Bennigys osta, A Arloedh, Duw agan tasow ha dhe vos gormelys: ha glorifiys yw dha hanow bys vykken.

⁴[27] Rag ewn osta yn pup-tra a wrussys dhyn ni; gwir yw oll dha wriansow, ha kompes yw dha fordhow, hag oll dha vreusow yw gwir.

⁵[28] Breusow gwiryon re wrussys yn pup-tra oll a dhresys warnan, ha war Yerusalem, sita sans agan tasow; rag yn gwiryonedh ha breus ty re dhros warnan oll an taklow ma drefenn agan peghosow.

⁶[29] Rag ni re beghas ha terri dha lagha, ow treylya dhe-ves dhiworthis; yn pup-tra ni re beghas yn feur.

⁷[30] Ny woslowsyn orth dha worhemmynnow, na'ga gwitha, na gul dell worhemmynnsys dhyn, may pe da ragon ni.

⁸[31] Ha pup-tra a dhresys warnan, ha pup-tra a wrussys dhyn ni, yn gwirvreus gwir y's gwrussys.

⁹[32] Ty a'gan ros yn diwleuv eskerens dhilagha, diskryjygyon a-has, ha dhe vyghtern kammhynsek, an gwettha y'n norvys oll.

¹⁰[33] Ha lemmyn ny yllyn igeri agan ganow; re dheuth bismer ha keredh dhe'th wesyon, ha dhe'n re a'th wordh.

¹¹[34] A-barth dha hanow, na'gan gas yn tien, ha na dorr dha gevambos.

¹²[35] Na dreyl dha dregeredh dhiworthyn, a-barth Abraham dha garadow, hag a-barth Ysak dha was, hag a-barth Ysrael dha sans:

¹³[36] leversys dhedha, owth ambosa ynkressya aga has kepar ha ster an nev ha kepar ha'n tewes war an vorlann.

¹⁴[37] Rag ni, A Arloedh, re dheuth ha bos moy distyr es an kenedhlow oll, ha dres isel on ni hedhyw yn oll an norvys drefenn agan peghosow.

¹⁵[38] Y'n termyn ma nyns eus dhyn na penntern, na profoes, na hembrenkyas, nag offrynn leskys, na sakrifis, nag oblashyon, nag ynkys, na tyller dhe wul offrynn a-dheragos, ha kavoes tregeredh.

¹⁶[39] Mes gans kolonn keudhesik ha gans spyrys uvel gas ni dhe vos degemmerys, kepar dell ve gans offrynnow leskys a hordhes ha lodhnow, hag avel deg-milyow a eyn tew;

¹⁷[40] yndella re bo agan sakrifis gwrys a-dheragos hedhyw, ha gront may hwryllyn dha holya oll yn tien; rag ny vydh konfondys an re a worr aga threst ynnos.

¹⁸[41] Lemmyn ni a'th hol a leun golonn; ni a'th own, ha hwilas dha fas.

¹⁹[42] Na wra agan shamya, mes dyght genen herwydh dha garadewder, ha herwydh dha dregeredh meur.

²⁰[43] Delirv ni ynwedh herwydh dha wriansow barthusek, ha ro glori dhe'th hanow, A Arloedh;

²¹[44] Ha gwra dhedha bos konfondys, oll an re a dhiskwedh droktra dhe'th wesyon, ha perthens i meth yn oll aga nerth ha galloes, ha re bo aga nell terrys.

²²[45] Konvedhens ty dhe vos an Arloedh, an unn Duw, gloryus dres oll an norvys.

²³[46] Lemmyn ny hedhi gwesyon an myghtern, neb a's tewlis ynni, toemmhe an fornes gans naftha ha pyg ha garrow lin ha kewydh;

²⁴[47] ha'n flamm a frosas a-ugh an fornes naw kevelin ha dew-ugens,

²⁵[48] hag omlesa, ha leski an Kaldeanys a veu kechys a-dro dhe'n fornes.

²⁶[49] Mes el an Arloedh a dhiyskynnas y'n fornes war-barth gans an re a-dro dhe Azaria, ha fesya flamm an tan a-dhiworth an fornes;

²⁷[50] ha gul dhe gres an fornes bos kepar dell esa gwyns leyth ow hwibana dredhi. Ny wrug an tan aga thochya mann, na'ga grevya na'ga throbla.

²⁸[51] Ena, an tri kepar ha gans unn ganow a ganmolas ha glorifia ha benniga Duw y'n fornes, ow leverel,

²⁹[52] Bennigys osta, A Arloedh, Duw agan tasow: ha dhe vos gormelys hag ughelhes dres oll bys vykken;

³⁰ha bennigys yw dha hanow gloryus ha sans; ha dhe vos gormelys hag ughelhes dres oll bys vykken.

³¹[53] Bennigys osta yn dha dempel sans ha gloryus: ha dhe vos kanmelys ha glorifiys dres oll bys vykken.

³²[55] Bennigys osta neb a hwither an downderyow a-dhiwar dha se war an cherubim: ha dhe vos gormelys hag ughelhes dres oll bys vykken.

³³[54] Bennigys osta war se dha vyghternses: ha dhe vos kanmelys hag ughelhes dres oll bys vykken.

³⁴[56] Bennigys osta y'n ebron a nev: ha dhe vos kanmelys ha glorifiys bys vykken.

³⁵[57] Bennigewgh an Arloedh, oll hwi oberow an Arloedh: kanmelewgh ev hag ughelhewgh ev dres oll bys vykken.

³⁶[59] A hwi nevow, bennigewgh an Arloedh: kanmelewgh ev hag ughelhewgh ev dres oll bys vykken.

³⁷[58] A hwi eledh an Arloedh, bennigewgh an Arloedh: kanmelewgh ev hag ughelhewgh ev dres oll bys vykken.

³⁸[60] A hwi dhowrow oll a-ugh an nev, bennigewgh an Arloedh: kanmelewgh ev hag ughelhewgh ev dres oll bys vykken.

³⁹[61] Bennigewgh an Arloedh, hwi botestas oll: kanmelewgh ev hag ughelhewgh ev dres oll bys vykken.

⁴⁰[62] A hwi howl ha loer, bennigewgh an Arloedh: kanmelewgh ev hag ughelhewgh ev dres oll bys vykken.

⁴¹[63] A hwi ster an nev, bennigewgh an Arloedh: kanmelewgh ev hag ughelhewgh ev dres oll bys vykken.

⁴²[64] Bennigewgh an Arloedh, A bub kowas ha gluth: kanmelewgh ev hag ughelhewgh ev dres oll bys vykken.

⁴³A hwi wynsow oll, bennigewgh an Arloedh: kanmelewgh ev hag ughelhewgh ev dres oll bys vykken.

⁴⁴[66] A hwi dan ha toemmder bennigewgh an Arloedh: kanmelewgh ev hag ughelhewgh ev dres oll bys vykken.

⁴⁵[67] A hwi yeynder ha toemmder, bennigewgh an Arloedh: kanmelewgh ev hag ughelhewgh ev dres oll bys vykken.

⁴⁶A hwi luthow ha kowasow a ergh, bennigewgh an Arloedh: kanmelewgh ev hag ughelhewgh ev dres oll bys vykken.

⁴⁷[71] A hwi nosow ha dydhyow, bennigewgh an Arloedh: kanmelewgh ev hag ughelhewgh ev dres oll bys vykken.

⁴⁸[72] A hwi wolow ha tewlder, bennigewgh an Arloedh: kanmelewgh ev hag ughelhewgh ev dres oll bys vykken.

⁴⁹A hwi rew ha yeynder, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁰A hwi loesrewyow hag ergh, bennigewgh an Arloedh: kanmelewgh ev hag ughelhewgh ev dres oll bys vykken.

⁵¹A hwi lughes ha kommol, bennigewgh an Arloedh: kanmelewgh ev hag ughelhewgh ev dres oll bys vykken.

⁵²[74] Benniges an norvys an Arloedh: kanmeles ev hag ughelhes ev dres oll bys vykken.

⁵³[75] A hwi venydhyow ha breow, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁴[76] A bup-tra a dyv war an dor, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁵[77] A hwi fentynyow, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁶[78] A hwi voryow hag avonyow, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁷[79] A hwi vorviles, ha pup-tra eus ow kwaya y'n dowrow, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁸[80] A hwi oll ydhyn an ayr, bennigewgh an Arloedh: kanmelewgh ev hag ughelhewgh ev dres oll bys vykken.

⁵⁹[81] A hwi vestes ha bughes, bennigewgh an Arloedh: kanmelewgh ev hag ughelhewgh ev dres oll bys vykken.

⁶⁰[82] A hwi vebyon dus, bennigewgh an Arloedh: kanmelewgh ev hag ughelhewgh ev dres oll bys vykken.

⁶¹[83] A Ysrael, bennigewgh an Arloedh: kanmelewgh ev hag ughelhewgh ev dres oll bys vykken.

⁶²[84] A hwi oferysi an Arloedh, bennigewgh an Arloedh: kanmelewgh ev hag ughelhewgh ev dres oll bys vykken.

⁶³[85] A hwi wesyon an Arloedh, bennigewgh an Arloedh: kanmelewgh ev hag ughelhewgh ev dres oll bys vykken.

⁶⁴[86] A hwi spyrysyon hag enevow a'n re wiryon, bennigewgh an Arloedh: kanmelewgh ev hag ughelhewgh ev dres oll bys vykken.

⁶⁵[87] A hwi dus sans hag uvel agas kolonn, bennigewgh an Arloedh: kanmelewgh ev hag ughelhewgh ev dres oll bys vykken.

⁶⁶[88] A Hanania, Azaria ha Mishael, bennigewgh an Arloedh: kanmelewgh ev hag ughelhewgh ev dres oll bys vykken. Rag ev re'gan delivras dhiworth ifarn, ha'gan sawya dhiworth leuv ankow, ha'gan delivra dhiworth kres an fornes ha'n flamm ow leski: dhiworth kres an tan y hwrug ev agan delivra.

⁶⁷[89] Rewgh grasyans dhe'n Arloedh, drefenn ev dhe vos da; rag y dregeredh a dhur bys vykken.

⁶⁸[90] Hwi oll neb a wordh an Arloedh, bennigewgh an Duw a dhuwow, kanmelewgh ev ha rewgh grasyans dhodho: rag y dregeredh a dhur bys vykken.[2]