Read Kernewek Susanna 1 Bible Online

Susanna 1 - Kernewek bible

Susanna 1

¹Y feu gour trigys yn Babylon, Yoakim y hanow.[1]

²Ev a gemmeras gwreg, Susanna hy hanow, myrgh Hilkia; teg dres eghenn o hi, ha hi a berthi own a'n Arloedh.

³Hy herens o gwiryon, hag i a dhyskas aga myrgh herwydh lagha Moyses.

⁴Yoakim o pur wolusek, hag yth esa dhodho lowarth ryb y ji. Yth esa an Yedhewon ow tos dhodho yn fenowgh, rag bos ev an moyha enorys anedha i oll.

⁵An vlydhen na, dew henavek a veu apoyntys avel breusysi. Anedha an Arloedh a lavarsa, ‘Droktra a dheuth yn-mes a Babylon, dhiworth henavogyon a veu breusysi, ow koverna an bobel dell dybis.’

⁶Yth esa an re ma yn fenowgh yn chi Yoakim, ha myns a's teva ken dhe vos breusys a dho dhedha.

⁷Pan omdennens an dus yn hanter-dydh, y fedha Susanna owth entra yn lowarth hy gour dhe gerdhes a-dro.

⁸An dhew henavek a wre hy gweles pub dydh, owth entra dhe gerdhes; hag i a dhallathas hy drokhwansa.

⁹I a stummas aga brys aga honan, ha treylya aga dewlagas dhe-ves, ma na virrens orth nev, na perthi kov a wirvreus.

¹⁰Aga dew a veu gwenys gans lust rygdhi, mes ny lavarsons an eyl dh'y gila a'ga ankres,

¹¹rag methek ens a dhiskwedhes aga drokhwans, i dhe vynnes growedha gensi.

¹²I a aspia yn tiwysyk pub dydh rag hy gweles.

¹³Ena yn-medhons an eyl dh'y gila, ‘Deun ni tre, rag prys li yw.’ Hag ow mos yn-mes, i a dhibarthas an eyl a'y gila.

¹⁴Mes ow treylya arta, i a dheuth war-barth; ha wosa govynn an eyl a'y gila an skila, i a aswonnis aga drokhwans. Ena war-barth i a apoyntyas termyn may hallens hy throvya a'y honan.

¹⁵Y hwarva, hag i owth aspia gluw rag dydh gwiw, yth entras hi kepar ha kyns gans diw vaghteth hepken, ha hi a vynnas omwolghi y'n lowarth, rag toemm o an jydh.

¹⁶Ny veu denvyth ena marnas an dhew henavek omgudhys, orth hy aspia.

¹⁷Yn-medh hi dhe'n maghtethyon, ‘Drewgh dhymm olew hag unyent, ha degewgh darasow an lowarth, may hallav omwolghi.’

¹⁸I a wrug dell leveris, hag i a dhegeas darasow an lowarth, ha mos yn-mes der an daras-tenewen, dhe dhri an taklow a vynnas; mes ny welsons an henavogyon, rag kudhys vons.

¹⁹Kettell eth an maghtethyon yn-mes, an dhew henavek a sevis ha poenya dhedhi.

²⁰Yn-medhons, ‘Mir, darasow an lowarth yw degeys, ha ny yll denvyth agan gweles. Hwansek bras on ni dhis; ytho assent genen ha growedh genen.

²¹Mar ny vynnydh, ni a dheg dustuni er dha bynn, bos gour yowynk genes, ha hemm yw an reson ty dhe dhannvon an vaghtethyon yn-mes a-dhiworthis.’

²²Susanna a hanasas yn town ha leverel, ‘Maglennys ov a bub tu. Mar kwrav hemma, mernans vydh dhymm. Ha mar ny'n gwrav, ny allav skapya yn-mes a'gas diwleuv.

²³Gwell yw genev na'n gwrav, mes koedha yn agas diwleuv, es pegha yn golok an Arloedh.’

²⁴Ena Susanna a grias gans lev ughel, ha'n dhew henavek a armas ynwedh er hy fynn,

²⁵hag onan anedha a boenyas, dhe igeri darasow an lowarth.

²⁶Pan glewas tus an chi an garma y'n lowarth, i a fyskas a-ji der an daras-tenewen dhe weles pandr'a hwarva dhedhi.

²⁷Ha pan leveris an henavogyon aga hwedhel, methek bras veu an wesyon, rag bythkweth ny via leverys travyth a'n par na a-dro dhe Susanna.

²⁸Ternos, pan dheuth an dus war-barth dh'y gour Yoakim, an dhew henavek a dheuth, leun a'ga drokpreder erbynn Susanna, dh'y gorra dhe'n mernans.

²⁹Yn-medhons a-rag an dus, ‘Dannvenewgh war-lergh Susanna myrgh Hilkia, gwreg Yoakim.’ Ytho i a dhannvonas,

³⁰ha hi a dheuth gans hy herens, hy fleghes ha'y neskerens oll.

³¹Lemmyn Susanna o pur vleudh, ha teg hy semlans.

³²An debeles a erghis hi dhe vos disvaylys, rag maylys o hi, rag may fons lenwys a'y thekter.

³³Mes an re esa gensi, hag oll myns a's gwelas a oelas.

³⁴Ena an dhew henavek a sevis yn mysk an dus, ha gorra aga diwleuv war hy fenn.

³⁵Hi a oelas, hag a viras troha nev, rag hy holonn a drestyas y'n Arloedh.

³⁶Yn-medh an henavogyon, ‘Pan esen ni ow kerdhes y'n lowarth agan honan, hi a entras gans diw vaghteth, ha degea darasow an lowarth, ha dannvon an maghtethyon dhe-ves.

³⁷Ena gour yowynk, neb o kudhys, a dheuth dhedhi, ha growedha gensi.

³⁸Yth esen ni yn korn an lowarth, ha pan welsyn an droktra ni a boenyas dhedha.

³⁹Kyn y's gwelsyn ow krowedha war-barth, ny yllsyn y gachya, rag kreffa veu ageson; hag owth igeri an darasow, ev a lammas yn-mes.

⁴⁰Mes ni a synsys an venyn ma, ha govynn, piw o an gour yowynk,

⁴¹mes ny vynnas leverel dhyn. Hemm yw agan dustuni.’ Ha'n kuntelles a's krysis, rag i dhe vos henavogyon a'n bobel, ha breusysi; hag i a's dampnyas dhe'n mernans.

⁴²Ena Susanna a grias gans lev ughel, ow leverel, ‘A Dhuw heb diwedh, neb a aswonn an kevrinyow, neb a woer pup-tra oll kyns y hwarvos:

⁴³ty a woer i dhe dhoen fals dhustuni er ow fynn. Ha lemmyn my a verow, kyn na wrug vy travyth a'n taklow ma'm kuhudhas an re ma yn spitus.’

⁴⁴Ha'n Arloedh a glewas hy lev.

⁴⁵Pan esa hi ow pos hembrenkys dhe-ves dhe vos ledhys, Duw a wrug dhe'n spyrys sans a vaw yowynk, Daniel y hanow, difuna,

⁴⁶hag ev a armas gans lev ughel, ‘Glan ov vy a woes an venyn ma!’

⁴⁷Ena oll an dus a dreylyas dhodho, ow leverel, ‘Pyth yw an dra ma a leversys?’

⁴⁸Mes ev a sevis yn aga mysk ha leverel, ‘Owgh hwi mar foll, a vebyon Ysrael? A wrussowgh dampnya myrgh a Ysrael heb hy eksamnya, ha heb dyski an gwir?

⁴⁹Dehwelewgh dhe'n vreuslys, rag an re ma re dhug fals dhustuni er hy fynn.’

⁵⁰Ytho an dus oll a dhehwelis yn fysk. Ha'n henavogyon erell a leveris dhodho, ‘Deus, esedh yn agan mysk, ha'y dhisklerya dhyn; rag Duw re ros dhis an stat a henavek.’

⁵¹Yn-medh Daniel dhedha, ‘Gwrewgh aga diberth an eyl pell dhiworth y gila may hylliv aga eksamnya.’

⁵²Wosa i dh'aga diberth an eyl dhiworth y gila, ev a elwis onan anedha ha leverel dhodho, ‘Ty, gyllys koth yn tebelwrians, lemmyn diskwedhys yw dha beghosow a wrussys kyns.

⁵³Rag ty re wrug drogvreus, ha dampnya an den gwiryon, ha delivra an den kablus dhe wari, kyn lever an Arloedh, “Na wra ladha an den gwiryon hag ewnhynsek.”

⁵⁴Lemmyn ytho, mara's gwelsys yn hwir, yn-dann by gwydhenn y's gwelsys ow kowethya an eyl gans y gila?’ Yn-medh ev, ‘Yn-dann wydhenn mastik.’

⁵⁵Yn-medh Daniel, ‘Yn ewn ty re wowleveris erbynn dha benn dha honan: rag seulabrys el Duw re dhegemmeras breus Duw, hag ev a'th tregh yntra dew.’[2]

⁵⁶Ena, wosa y remova dhe gen tyller, ev a erghis an den arall dhe vos dres. Yn-medh ev dhodho, ‘A has a Kanan a-der a Yuda, tekter re'th ardhynyas, ha drokhwans re gammas dha golonn.

⁵⁷Yndella re bewgh ow tyghtya myrghes Yuda, hag yn own yth esens ow kowethya genowgh; mes ny berth myrgh a Yuda dha dhroktra.

⁵⁸Lemmyn ytho, lavar dhymm, yn-dann by gwydhenn y's kemmersys ow kowethya an eyl gans y gila?’ Yn-medh ev, ‘Yn-dann dherwenn.’

⁵⁹Yn-medh Daniel dhodho, ‘Yn ewn ty re wowleveris erbynn dha benn dha honan; rag el Dhuw a worta, ow synsi y gledha, rag dha heskenna[3] yn dew, ma'gas distruo agas dew.’

⁶⁰Ena oll an kuntelles a armas gans lev ughel, ha benniga Duw, neb a saw an re a drest ynno.

⁶¹Hag i a sevis erbynn an dhew henavek, rag Daniel a's dampnyas a fals dhustuni yn-mes aga ganow aga honan. I a wrug dhedha kepar dell vynnsens gul yn spitus dh'aga hentrevoges,

⁶²ow kul herwydh lagha Moyses, hag i a's gorras dhe'n mernans. Ha goes gwiryon a veu sawys an jydh na.

⁶³Hilkia ha'y wreg a wormolas Duw drefenn aga myrgh Susanna, gans Yoakim hy gour, hag oll an neskerens, rag ny veu travyth methus kevys ynni.

⁶⁴Yndella Daniel a dheuth ha bos meur y vri yn golok an bobel a-dhia'n jydh na hag yn-rag.