Read Kernewek Ezekiel 15 Bible Online

Ezekiel 15 - Kernewek bible

Ezekiel 15

¹Ger an ARLOEDH a dheuth dhymm, ow leverel:

²Mab den, fatell yw prenn an gwinbrenn bythwell ages pub prenn arall, skorrenn an gwinbrenn usi yn mysk gwydh an goeswik?

³A vydh prenn kemmerys dhiworto dhe wul ober? A gemmerons dhiworto ebil dhe gregi neppyth warnodho?

⁴Gorrys yw y'n tan avel keunys, ha'n tan a dheber y dhew benn ha'n kres anodho yw goleskys; yw dhe les rag ober vytholl?

⁵Otta, pan o dien ny veu devnydhys rag ober vytholl; pygemmys le — wosa tan dh'y dhybri ha'y vos goleskys — y hyll bos devnydhys arta rag ober vytholl?

⁶Rakhenna yndellma y lever an Arloedh DUW: Kepar ha prenn an gwinbrenn yn mysk gwydh an goeswik, a res vy dhe'n tan rag keunys, yndella my a re trigoryon Yerusalem.

⁷My a sett ow fas er aga fynn. Kyn skapyons dhe-ves dhiworth an tan, an tan a's deber; ha hwi a woer my dhe vos an ARLOEDH, pan settyav ow fas er aga fynn.

⁸My a wra an tir ynyalder, drefenn i dhe vos dislel, yn-medh an Arloedh DUW.