Read Kernewek Ezekiel 16 Bible Online

Ezekiel 16 - Kernewek bible

Ezekiel 16

¹Ger an ARLOEDH a dheuth dhymm, ow leverel:

²Mab den, gwra Yerusalem dhe aswonn hy thaklow kasadow,

³ha lavar, Yndellma y lever an Arloedh DUW dhe Yerusalem: Dha dhevedhyans ha'th tineythyans a veu a bow an Kananysi, dha das a veu Amoryas, ha'th vamm a veu Hittyades.

⁴Orth dha enesigeth, y'n jydh may feus genys, ny veu dha gordenn treghys, na ny veus golghys yn dowr rag glanheans, na ny veus rutys gans hoelan, na ny veus maylys yn lystennow.

⁵Ny viras lagas orthis gans piteth dhe wul ragos onan an taklow ma, na dhe gemmeres truedh ahanas. Y feus tewlys war enep an mes, yn kas ahanas[12] yn dydh dha enesigeth.

⁶My a dremenas dresos, ha'th weles ow potya a-dro y'th woes; ha my a leveris dhis y'th woes, ‘Byw!

⁷ha tev avel skyll an mes.’ Ha ty a ynkressyas ha tevi, ha dos dhe venynses.[13] Dha dhiwvronn a veu furvys, dha wols a devis, mes ty o noeth ha lomm.

⁸Ena my a dremenas dresos ha mires, hag otta, drehedhys veus dhe'n oes a gerensa. Ytho my a lesas ow lostenn warnas ha kudha dha noethedh, ha my a dos ti dhis, hag entra yn kevambos genes, yn-medh an Arloedh DUW, ha ty a dheuth ha bos dhymm.

⁹Ena my a'th vadhyas yn dowr, ha golghi dha woes dhiworthis, ha'th untya gans olew.

¹⁰My a'th tillesas gans pows vrosyes, ha gorra sandalyow a groghen morhogh warnas. My a'th vaylyas yn sendal, ha'th kudha gans owrlin.

¹¹My a'th afinas gans tegennow ha gorra breghelligow war dha dhiwla ha torgh war dha gonna.

¹²My a worras bysow war dha droen, ha skinennow war dha dhiwskovarn, ha kurun teg war dha benn.

¹³Yndella ty a veu afinys gans owr hag arghans; dha dhillas o sendal hag owrlin, ha pows vrosyes; ty a dhybris bleus fin ha mel hag olew; hag yth es teg dres eghenn, ha ty a siwenis bys yn myghternses.

¹⁴Dha hanow eth yn-mes yn mysk an kenedhlow drefenn dha dekter, rag y feu perfydh der an splannder a worris warnas, yn-medh an Arloedh DUW.

¹⁵Mes ty a fydhyas y'th tekter ha dos ha bos hora drefenn dha er-da, ha diveri dha fornikashyon war bub tremenyas, ha bos dhodho.[14]

¹⁶Ha ty a gemmeras re a'th tillas, ha gul ragos dha honan tylleryow ughel liesliw, ha gul fornikashyon warnedha. Ny dal hwarvos, na ny vydh.

¹⁷Ty a gemmeras dha degynnow teg a'm owr ha'm arghans a res dhis, ha gul ragos dha honan imajys gorow ha gul fornikashyon gansa.

¹⁸Ty a gemmeras dha bowsyow brosys dh'aga hudha, ha settya ow olew ha'm ynkys a-ragdha.

¹⁹Ha'm bara a res dhis, bleus fin hag olew ha mel, a res dhis dhe dhybri, ty a settyas a-ragdha rag sawer plegadow; hag yndella y feu, yn-medh an Arloedh DUW.

²⁰Ty a gemmeras dha vebyon ha'th vyrghes a dhineythsys dhymmo, ha'ga sakrifia dhedha dhe dhybri. A nyns o dha fornikashyon lowr?

²¹Ty a ladhas ow vebyon, ha'ga sakrifia dhedha.

²²Hag yn oll dha daklow kasadow ha'th fornikashyon ny berthsys kov a dhydhyow dha yowynkneth pan es noeth ha lomm, hag ow potya a-dro y'th woes.

²³War-lergh oll dha debelwrians — Go-jy, go-jy! yn-medh an Arloedh DUW —

²⁴ty a dhrehevis growedhva ragos, ha gul ragos tyller ughel yn pub plen.

²⁵Orth penn pub fordh ty a dhrehevis dha dyller ughel, ha gul aborrys dha dekter, hag igeri dha dreys dhe bub tremenyas, ha ty a lieshas dha fornikashyon.

²⁶Ty a wrug fornikashyon gans mebyon Ejyp, dha gentrevogyon bras aga hig, ha ty a lieshas dha fornikashyon, dhe'm provokya dhe sorr.

²⁷Awotta, my re ystynnas ow leuv warnas ha lehe dha rann a diredh, ha'th worra yn-dann vynnas an re a'th kas, myrghes an Filistysi; i a gemmeras sham a'th fordh vethus.

²⁸Ty a wrug fornikashyon gans mebyon Assyria ynwedh, rag ty dhe vos heb dha walgha; ty a wrug fornikashyon gansa ha hwath ny veus gwalghys.

²⁹Ty a lieshas dha fornikashyon bys yn Kaldea, tir an wikoryon, ha hwath ny veus gwalghys.

³⁰Ass yw toemm dha golonn gans fevyr, yn-medh an Arloedh DUW, pan wredh oll an taklow ma, ober hora meur hy maystri,

³¹ow trehevel dha wrowedhva orth penn pub fordh, hag ow kul dha dyller ughel yn pub plen. Mes nyns esta avel hora, rag ty a skonyas gober.

³²A wreg avoutres, neb a gemmer estrenyon yn le hy gorti!

³³Dhe bub hora i a re gober, mes ty a re dha rohow dhe oll dha garoryon, ha'ga arveth dhe dhones dhis a bub tenewen dhe wul fornikashyon genes.

³⁴Ty yw dihaval dhe venynes erell y'th fornikashyon, rag ny'th tynyas denvyth dhe wul fornikashyon; ty a re gober, ha nyns yw gober res dhis; ty yw dihaval.

³⁵Rakhenna, a hora, klew ger an ARLOEDH:

³⁶Yndellma y lever an Arloedh DUW: Drefenn bos dha meth diverys, ha dha noethedh diskudhys y'th fornikashyon gans dha garoryon, ha drefenn oll dha idolys kasadow, ha drefenn goes dha vebyon a resys dhedha,

³⁷rakhenna, awottavy ow kuntell oll dha garoryon a gevsys plesour gansa, hag oll myns a gersys, hag oll myns a gessys, ha my a's kuntell er dha bynn a bub tenewen, ha my a dhiskudh dha noethedh a-ragdha, hag i a wel oll dha brivita.

³⁸My a'th vreus gans breus avoutres ha'n re a skoell goes; ha my a dhre warnas an goes a sorr hag avi.

³⁹My a'th re yn aga leuv, hag i a dewl yn-nans dha wrowedhva, ha terri dha dylleryow ughel; i a dhestrypp dha dhillas, ha kemmeres dha emmweyth, hag i a'th as noeth ha lomm.

⁴⁰I a dhre routh yn-bann er dha bynn, hag i a'th labydh gans meyn, ha'th hakkya dhe demmyn gans aga kledhedhyow.

⁴¹I a lesk dha jiow gans tan, ha gul breusow er dha bynn a-wel dhe lies benyn. My a worr diwedh dhe'th fornikashyon, hag ynwedh ny redh gober arta.

⁴²My a gyv powes a'm sorr warnas, ha'm avi a dreyl dhiworthis; my a vydh kosel, ha ny vydhav serrys arta.

⁴³Drefenn na berthsys kov a dhydhyow dha yowynkneth, mes ty a'm sorras gans oll an taklow ma, otta, my ynwedh a attal dha fordh war dha benn, yn-medh an Arloedh DUW. A ny wrussys vilta dres oll dha daklow kasadow?

⁴⁴Otta, peub a lever henlavarow a lever an henlavar ma er dha bynn: ‘Kepar hag yw mamm, yndella yw hy myrgh.’

⁴⁵Ty yw myrgh dha vamm, a dhivlasas hy gorti ha'y mebyon; ty yw hwoer dha hwerydh neb a dhivlasas aga gwerti ha'ga mebyon; agas mamm o Hittyades ha'gas tas o Amoryas.

⁴⁶Dha hwoer gottha yw Samaria, hi ha'y myrghes neb a drig a'n barth kledh dhis; ha'th hwoer yowynka neb a drig a'n barth dhyghow dhis yw Sodom ha'y myrghes.

⁴⁷A ny gerdhsys yn aga fordhow ha'ga thaklow kasadow? A verr spys yth esta moy legrys agessa i yn oll dha fordhow.

⁴⁸Dell vewav, yn-medh, an Arloedh DUW, ny wrug Sodom dha hwoer na'y myrghes kepar dell wrussys, ty ha'th vyrghes.

⁴⁹Awotta anewnder Sodom dha hwoer: goeth, gwalgh a vara, hag es hebask o dhedhi hi ha dh'y myrghes; ny nerthas leuv an boghosek na'n edhommek.

⁵⁰Goethus ens, hag y hwrussons taklow kasadow a-ragov; ytho my a's removas, dell welsys.[15]

⁵¹Samaria ny wrug hanter dha beghosow; ty re lieshas dha daklow kasadow moy agessa i. Ty re wrug dhe'th hwerydh bos ewnhynsek aga semlans gans oll dha daklow kasadow a wrussys.

⁵²Ytho ty ynwedh, borth dha dhespit; ty re wrug dhe'th hwerydh bos vreusys moy ewnhynsek agesos, rag bos dha beghosow re wrussys moy kasadow ages aga feghosow i. Ytho ty ynwedh, porth dha veth, rag ty re wrug dhe'th hwerydh bos ewnhynsek aga semlans.

⁵³My a wra restorita dhedha, restorya Sodom ha'y myrghes, ha restorya Samaria ha'y myrghes, ha my a wra restorita dhiso jy war-barth gansa,

⁵⁴rag may perthi dha dhespit ha bos methek a bup-tra a wrussys, orth aga honfortya.

⁵⁵Dha hwerydh, Sodom ha'y myrghes, a dreyl dh'aga hynsa studh, ha Samaria ha'y myrghes a dreyl dh'aga hynsa studh, ha ty ha'th vyrghes a dreyl dh'agas kynsa studh.

⁵⁶A ny veu dha hwoer Sodom drog-gerys y'th anow yn dydh dha woeth,

⁵⁷kyns bos dha sherewynsi diskudhys? Lemmyn ty yw testenn a skorn dhe vyrghes Aram, hag oll hy hentrevogyon, dhe vyrghes an Filistysi — myns eus oll a-dro dhis.

⁵⁸Ty a berth keredh dha vilta ha'th oberow kasadow, yn-medh an ARLOEDH.

⁵⁹Rag yndellma y lever an Arloedh DUW: My a wra genes kepar dell wrussys, rag ty dhe dhispresya an ti, ow terri an kevambos.

⁶⁰Mes my a berth kov a'm kevambos genes yn dydhyow dha yowynkneth, ha fastya genes kevambos a dhur bys vykken.

⁶¹Ena ty a berth kov a'th fordhow ha kemmeres meth pan ressevydh dha hwerydh, an re kottha agesos ha'n re yowynka agesos. My a's re dhis avel myrghes, mes ny vydh henna drefenn ow hevambos genes.

⁶²My a fast ow hevambos genes, ha ty a woer my dhe vos an ARLOEDH;

⁶³rag may perthi kov ha bos methek, heb igeri dha anow arta drefenn dha dhisenor, pan wrav prenedh dhis rag pup-tra re wrussys, yn-medh an Arloedh DUW.