Read Kernewek Ezekiel 2 Bible Online

Ezekiel 2 - Kernewek bible

Ezekiel 2

¹Yn-medh ev dhymm: Mab den, sav war dha dreys, ha my a gews genes.

²An Spyrys a entras ynnov pan gewsis dhymm, ha'm settya war ow threys, ha my a'n klewas ow kewsel dhymm.

³Yn-medh ev dhymm: Mab den, my a'th tannvon dhe vebyon Ysrael, dhe genedhel a rebellys re rebellyas er ow fynn; i ha'ga thasow re wrug treuspass er ow fynn bys y'n jydh ma.

⁴Mebyon penn-kales yns i ha gorth aga holonn; yth esov orth dha dhannvon dhedha. Lavar dhedha, ‘Yndellma y lever an Arloedh DUW.’

⁵Hag i, mar koslowons po mar skonyons (rag chi diwostydh yns i) byttegyns i a woer y feu profoes yn aga mysk.

⁶Ha ty, A vab den, na borth own anedha na a'ga geryow. Na borth own kyn fo spern ha spedhas a-dro dhis, ha ty trigys yn mysk skorpyons. Na borth own a'ga geryow ha na borth euth a'ga fasow, rag chi diwostydh yns i.

⁷Kows ow geryow orta, mar koslowons po mar skonyons; rag chi diwostydh yns i.[2]

⁸Mes ty, A vab den, goslow orth an pyth esov orth y gewsel orthis. Na vydh rebell avel an chi diwostydh na; igor dha anow ha deber an pyth esov ow ri dhis.

⁹Ena my a viras, hag otta leuv ystynnys dhymm, hag otta, yth esa ynni rol-skrifa.

¹⁰Ena ev a's lesas a-ragov; yth esa skrif war hy dew denewen, ha skrifys warnedhi yth esa galargan ha kynvann ha guw.