Read Kernewek Ezekiel 21 Bible Online

Ezekiel 21 - Kernewek bible

Ezekiel 21

¹Ger an ARLOEDH a dheuth dhymm, ow leverel:[20]

²Mab den, sett dha fas troha Yerusalem; pregoth erbynn an sentris, ha profoes erbynn pow Ysrael,

³ha lavar dhe diredh Ysrael, Yndellma y lever an ARLOEDH: Awottavy er dha bynn; my a denn ow kledha dhiworth y woen ha treghi dhiworthis an den gwiryon ha'n tebelwas.

⁴Drefenn my dhe dreghi dhiworthis an den gwiryon ha'n tebelwas, gogledh.

⁵Ena oll kig a woer may hwrugavy, An ARLOEDH, tenna ow kledha dhiworth y woen; ny dhehwel arta.

⁶Ytho, A vab den, kyn gans diwglun ow krena, ha hanas yn hwerow a-rag aga dewlagas.

⁷Ha pan leverons dhis, ‘Prag yth esos ow hanasa?’ ty a lever, ‘Rag an nowodhow yw devedhys. Pub kolonn a deudh, ha pub leuv a vydh ydhil; pub spyrys a glamder, ha pub glin a dreyl dhe dhowr. Otta, hemma a dheu hag a hwyrvydh’, yn-medh an Arloedh DUW.

⁸Ger an ARLOEDH a dheuth dhymm, ow leverel:

⁹Mab den, profoes ha lavar, Yndellma y lever an Arloedh: Lavar: Kledha! Kledha yw lymmys, hag ynwedh rutys splann,

¹⁰Lymmys yw rag an ladhva, ha rutys splann rag may fo avel lughes. A lowenhyn yn ternwelenn ow mab? An kledha a dhispres pup-tra gwrys a brenn.

¹¹Ev a'n ros dhe vos rutys splann, rag bos dalghennys y'n leuv; lymmys yw, an kledha yw rutys splann dhe vos gorrys yn leuv an ladher.

¹²Garm hag oul, A vab den, rag yth yw erbynn ow fobel, yth yw erbynn oll pennsevigyon Ysrael. Tewlys yns dhe'n kledha war-barth gans ow fobel. Rakhenna hwett dha vordhos!

¹³Rag y fydh prevyans. Ha fatla mar kwra an kledha despitya an dernwelenn?[21] yn-medh an Arloedh DUW.

¹⁴Ytho ty, A vab den, profoes; tak palv orth palv. Gas an kledha dhe weskel diwweyth, teyrgweyth; kledha rag an re ledhys yw, kledha bras an ladhva, usi oll a-dro dhedha.[22]

¹⁵Rag may teuttho kolonnow ha'n re a goedh bos lies. Orth oll aga yetys my re worras kledha rag ladhva. Ogh, gwrys yw rag lughesi, rutys splann rag an ladhva.

¹⁶Bydh lymm, treyl dhe'n dyghow, gway dhe'n kledh, plepynag a vo ervirys rag dha vin.

¹⁷My ynwedh a dak ow diwleuv war-barth, ha gul dhe'm sorr powes. My an ARLOEDH re gewsis.

¹⁸Ger an ARLOEDH a dheuth dhymm, ow leverel:

¹⁹Ty, A vab den, gwra ragos dha honan diw fordh rag kledha myghtern Babylon dhe dhos warnedha, aga diw ow tos yn-mes a'n keth pow; gwra post-arwoedh ha'y settya orth penn an fordh dhe'n sita.

²⁰Gwra fordh rag kledha dhe dhos erbynn Rabba an Ammonysi, hag erbynn Yuda, hag erbynn Yerusalem yn hy kres.[23]

²¹Rag myghtern Babylon a sev orth diberthva an fordh, orth penn an dhiw fordh, dhe wul dewinieth. Ev a shak sethow, ev a hwila kusul orth an terafim, ev a vir orth an avi.

²²Yn y leuv dhyghow y teu koelbrenn Yerusalem, dhe igeri an ganow rag an ladhva, dhe dhrehevel an lev y'n kri a vatel, dhe settya hor'bennow erbynn an yetys, dhe grugya gweythyow-esedhva.

²³Mes y fydh haval dhe dhewinieth fals yn aga dewlagas i, an re a dos tiow; mes ev a's kovha a'ga anewnder, may fons kechys.

²⁴Rakhenna yndellma y lever an Arloedh DUW: Rag hwi dhe dhri agas kammweyth dh'agas kovadh, dre dhiskudhans agas kammweythresow, may fo gweladow agas peghosow yn oll agas drogoberow — rag hwi dhe dhri hemma dhe govadh, hwi a vydh kemmerys yn leuv an eskar.[24]

²⁵Ha ty pennsevik Ysrael, tebelwas ansans, may teuth y dhydh, termyn y gessydhyans finek,

²⁶yndellma y lever an Arloedh DUW: Diwisk an tulyfant ha kemmer dhe-ves an gurun; ny vydh par dell veu. Ughelha an isel, hag uvelha an ughel.

²⁷Magoryow, magoryow, magoryow y'n gwrav, ma na veu y hevelep, bys pan dheu ev may ma dhodho an gwir; ha my a'n re dhodho.

²⁸Ha ti, A vab den, profoes ha lavar, Yndellma y lever an Arloedh DUW a-dro dhe vebyon Ammon hag a-dro dh'aga heredh; lavar: Kledha, kledha, tennys rag ladhva, rutys splann dhe gonsumya, dhe lughesi!

²⁹Dha welesigethow yw fals ha 'th tewinieth yw gowek dh'y settya war gonnaow an debeles ansans; aga dydh re dheuth, termyn an kessydhyans diwettha.

³⁰Gorr e dh'y woen! Y'n tyller may feus formys, yn tir dha dhalleth y'th vreusav.

³¹My a dhinwa ow sorrvann warnas; gans tan ow honnar y hwithav warnas. My a'gas re yn leuv gwer vilus, skentel yn distruyans.

³²Y fydhydh keunys rag an tan, dha woes a vydh yn kres an tir; ny vydhydh kovhes na fella, rag my an ARLOEDH re gewsis.