Read Kernewek Ezekiel 23 Bible Online

Ezekiel 23 - Kernewek bible

Ezekiel 23

¹Ger an ARLOEDH a dheuth dhymm, ow leverel:

²Mab den, yth esa diw venyn, myrghes unn vamm;

³horys ens i yn Ejyp; yn aga yowynkneth yth esens horys. Ena aga diwvronn o gweskys, hag ena aga bronnow gwyrgh o palvyes, ha tethow aga gwyrghses handlys.

⁴Aga henwyn o Ohola an kottha, hag Oholiba hy hwoer. Yth esens dhymm, hag i a dhineythis mebyon ha myrghes. Yndella yw aga henwyn: Samaria yw Ohola, ha Yerusalem yw Oholiba.

⁵Ohola o hora pan o hi dhymm, ha hi a hwansa hy herysi assyriek — kasoryon,

⁶dillasys yn pann glas, governours ha kaslewydhyon, i oll gwer yowynk desiradow, marghogyon ow marghogeth war vergh.

⁷Hi a ros hy fornikashyon dhedha, flour mebyon Assyria, ha hi a omdhefolas gans oll aga idolys esa hwansek dhedha.

⁸Ny asas hy fornikashyon a-dhia hy thermyn yn Ejyp, rag yn hy yowynkneth yth esa gwer ow krowedh gensi; i a waska hy diwvronn wyrgh ha diveri aga lust warnedhi.

⁹Rakhenna my a's ros yn leuv hy herysi, yn leuv mebyon Assyria esa hwansek dhedha.

¹⁰I a dhiskudhas hy noethedh; i a gemmeras hy mebyon ha'y myrghes hag i a's ladhas gans an kledha. Hi a's tevo hanow yntra benynes, ha breus a veu gwrys er hy fynn.

¹¹Hy hwoer Oholiba a welas hemma, mes hi a veu moy legrys agessi hi yn hy lust, ha'y fornikashyon o gweth ages fornikashyon hy hwoer.

¹²Hi o hwansek dhe vebyon Assyria, governours ha kaslewydhyon, breselysi dillasys yn splann, marghogyon ow marghogeth war vergh, i oll gwer yowynk desiradow.

¹³Ena my a welas hi dhe vos defolys, an dhiw anedha y'n keth fordh.

¹⁴Mes hi a ynkressyas hy fornikashyon. Hi a welas gwer kervys war an paros, idolys an Kaldeanys, delinys yn vermeyl,

¹⁵grogysys gans grogysyow a-dro dh'aga diwglun, ha tulyfantys ow kregi war aga fennow, i oll gans semlans penngasoryon charettow, an hevelep a vebyon Babylon, may feu Kaldea tir aga dineythyans.

¹⁶Kettell y's gwelas gans hy dewlagas hi a's hwansas, ha dannvon kannasow dhedha yn Kaldea.

¹⁷Ena mebyon Babylon a dheuth dhedhi, dhe'n gweli a gerensa, hag i a's defolas gans aga lust. Wosa bos defolys gansa, hi a dreylyas dhiworta, divlasys.

¹⁸Pan esa hi ow kul hy fornikashyon yn igor, hag ow tiskudha hy noethedh, my a dreylyas dhiworti divlasys, kepar dell dreylis divlasys dhiworth hy hwoer.

¹⁹Mes hi a ynkressyas hy fornikashyon, ow perthi kov a dhydhyow hy yowynkneth, pan o hora yn pow Ejyp.

²⁰Ena hi a hwansas war-lergh hy herysi, mayth o aga halgh haval dhe galgh asenes, ha'ga dyllans haval dhe dhyllans mergh.

²¹Yndella ty a yeunis avlander dha yowynkneth, pan veu dha dethow handlys yn Ejyp, ha bronnow dha yowynkneth palvyes.

²²Rakhenna, Oholiba, yndellma y lever an Arloedh DUW: Awottavy ow movya dha gerysi er dha bynn, may treylyas dha enev dhiworta divlasys, ha my a's dre er dha bynn a bub tenewen:

²³mebyon Babylon hag oll an Kaldeanys, Pekod, ha Shoa, ha Koa, hag oll mebyon Assyria gansa, gwer yowynk desiradow, i oll governours ha rewloryon, penngasoryon charettow ha soedhogyon ughel, i oll ow marghogeth war vergh.

²⁴I a dheu er dha bynn dhiworth an gogledh[27] gans charettow ha kertys,[28] ha gans ost a boblow; i a omsett a-dro dhis gans skoes ha bokler ha basnett. My a re dhedha an gwir dhe vreusi, hag i a'th vreus war-lergh aga laghys aga honan.

²⁵My a sett ow avi er dha bynn, hag i wra dha dhyghtya yn sorr. I a dregh dha droen ha'th tiwskovarn, ha'n re gesys war dha lergh a goedh der an kledha. I a gemmer dha vebyon ha'th vyrghes, ha piwpynag yw gesys dhis a vydh konsumys gans tan.

²⁶I a dhestrypp dha dhillas dhiworthis, ha kemmeres dha emmweyth teg.

²⁷My a re diwedh dhe'th avlander ha'th fornikashyon a-dhia'th termyn yn Ejyp. Ny vydhydh ow trehevel dha dhewlagas dhedha, ha ny berthydh kov a Ejyp na fella.

²⁸Rag yndellma y lever an Arloedh DUW: Awottavy orth dha ri yn leuv an re a gesydh, yn leuv an re may treylyas dha enev divlasys dhiworta.

²⁹I a'th tyght yn envi, ha kemmeres oll frut dha lavur. I a wra dha asa lomm ha noeth, ha noethedh dha fornikashyon a vydh diskudhys, dha vilta ha'th fornikashyon.

³⁰My a dhre an taklow ma warnas drefenn dha fornikashyon war-lergh an kenedhlow, hag omdhefola gans aga idolys.

³¹Ty re gerdhas yn fordh dha hwoer; rakhenna my a re hy hanaf y'th leuv jy.

³²Yndellma y lever an Arloedh DUW: Ty a yv hanaf dha hwoer, down ha ledan; y fydh dhis rag hwarth ha ges: yma lies synsys ynno.

³³Ty a vydh leun a vedhwenep ha moredh, hanaf a euth ha terroes, hanaf dha hwoer Samaria.

³⁴Ty a'n yv, ha'y waska yn-mes; ty a'n brew yn darnow, ha ty a skward dha dhiwvronn; rag my re gewsis, yn-medh an Arloedh DUW.

³⁵Rakhenna yndellma y lever an Arloedh DUW: Rag ty dhe'm ankevi ha'm tewlel a-dryv dha geyn, porth siwyansow dha avlander ha'th fornikashyon.

³⁶An ARLOEDH a leveris dhymm: Mab den, a vreusydh Ohola hag Oholiba? Ena diskler dhedha aga gweythresow kasadow.

³⁷Rag i re wrug avoutri, hag yma goes war aga diwla. I re wrug avoutri gans aga idolys; ynwedh i re sakrifisons dhedha aga mebyon a dhineythsons dhymm, rag boes.

³⁸I re wrug hemma dhymmo vy ynwedh: i re dhefolas ow sentri ha disakra ow sabotys.

³⁹Wosa ladha aga mebyon rag aga idolys, i a dho an keth jydh na a-berth y'm sentri dh'y dhisakra. Yndella y hwre yn kres ow chi.

⁴⁰Ynwedh i a dhannvonas war-lergh gwer devedhys a bellder, may feu kannas dannvenys dhedha; ha pan dheuthons, ty a omvadhyas, ha payntya dha dhewlagas, ha gwiska gemmweyth.

⁴¹Ty a esedhas war weli splann, gans moes pareusys a-ragdho may settsys warnedhi ow ynkys ha'm olew.

⁴²Yth esa son routh dhigeudh a-dro dhedhi; Sabaysi a veu dres dhiworth an gwylvos war-barth gans gwer gemmyn, hag i a worras breghelligow war dhiwla an dhiw venyn, ha kurun deg war aga fenn.

⁴³Ena my a leveris a-dro dhedhi hi neb a veu lavurys der avoutri, ‘Lemmyn gwrens fornikashyon gensi, rag hora yw hi.’

⁴⁴Rag i re dheuth a-ji dhedhi dell dheer dhe hora. Yndella i a dheuth a-ji dhe Ohola ha dhe Oholiba, benynes avlan.

⁴⁵Mes gwer wiryon a's breus kepar hag a vreusir avoutresow ha'n re a skoell goes; rag avoutresow yns, hag yma goes war aga diwla.

⁴⁶Rag yndellma y lever an Arloedh DUW: Dro routh yn-bann er aga fynn, ha'ga delivra rag euth ha rag preydh.

⁴⁷An routh a's labydh ha'ga treghi dhe'n dor gans aga kledhedhyow; i a ladh aga mebyon ha'ga myrghes, ha leski aga chiow gans tan.

⁴⁸Yndella my a worr diwedh dhe avlander y'n tir, may fons oll benynes gwarnyes, ma na wrellons war-lergh agas avlander hwi.

⁴⁹I a attal kessydhyans agas avlander warnowgh, ha hwi a berth an kessydhyans rag peghosow agas idolys. Ena hwi a woer my dhe vos an Arloedh DUW.