Read Kernewek Ezekiel 24 Bible Online

Ezekiel 24 - Kernewek bible

Ezekiel 24

¹Ger an ARLOEDH a dheuth dhymm y'n nawves blydhen, y'n degves mis, yn degves dydh an mis, ow leverel:

²Mab den, skrif an dydhyas ma, poran an jydh ma. Myghtern Babylon a omsettyas erbynn Yerusalem poran y'n jydh ma.

³Gwra parabolenn rag an chi diwostydh ma, ha lavar dhedha, Yndellma y lever an Arloedh DUW: Sett an chek, sett an chek, diver dowr ynno ynwedh.

⁴Gorr ynno temmyn a gig, pub rann dha, an vordhos ha'n skoedh. Gwra y lenwel a eskern dewisys.

⁵Kemmer davas dhewisys, ynwedh bern an prenn[29] yn-danno; bros hi yn uskis; ha bryjyewgh hy eskern a-berth ynno.

⁶Rakhenna yndellma y lever an Arloedh DUW: Go-hi an sita woesek, kalter gans gossen ynni, ha'y wossen ny a dhiworti! Kemmer an kig dhiworti tamm ha tamm, heb tewlel koelbrenn.

⁷Rag yma an goes a skoellyas a-berth ynni; hi a'n dinewis war garrek lomm; ny'n diveris war an dor dh'y gudha gans doust.

⁸Dhe dhri ow sorr yn-bann, dhe dyli dial, my re worras an woes a skoellyas war garrek lomm, ma na vo kudhys.

⁹Rakhenna yndellma y lever an Arloedh DUW: Go-hi an sita woesek! My ynwedh a wra bern bras a brenn.

¹⁰Bern an prenn, enow an tan; kegin an kig yn ta, diver an kowl;[30] bedhes an eskern leskys.

¹¹Ena sett an chek gwag war an regydh rag may fo poeth, ha'y gober leskys, may teuttho y avlander a-berth ynno, ha may fo y wossen konsumys.

¹²My re omskwithas yn euver; ny eth a-dhiworto y wossen dew, na hwath gans tan.

¹³Y'th avlander yma fornikashyon. Drefenn my dhe assaya dha lanhe, mes ny vynnsys bos glanhes, ny vydhydh glanhes arta dhiworth dha avlander bys pan rov powes dhe'm sorr er dha bynn.

¹⁴My an ARLOEDH re gewsis. An termyn re dheuth, ha my a'n gwrav. Ny vydhav owth omwitha, na sparya, na diserri. War-lergh dha fordhow ha'th wriansow my a'th vreus, yn-medh an Arloedh DUW.

¹⁵Ger an ARLOEDH a dheuth dhymm, ow leverel:

¹⁶Mab den, awottavy ow kemmeres dhiworthis desir dha dhewlagas gans strekys; ny gynydh, na ny oelydh, na ny vydh dhis dagrow.

¹⁷Hanas — mes yn kosel; na wra kynvann rag an re varow. Fast dha dulyfant warnas ha gorr dha sandalyow war dha dreys; na gudh dha vinvlew, ha na dheber bara an gynoryon.[31]

¹⁸Ytho myttin my a gewsis orth an bobel, ha'm gwreg a verwis y'n gorthugher. Ternos myttin my a wrug par dell veu erghys dhymm.

¹⁹Ena an bobel a leveris dhymm, ‘A ny dherivydh dhyn, pyth yw an styr ragon ni, ty dhe wul yndella?’

²⁰Yn-medhav dhedha: Ger an ARLOEDH a dheuth dhymm, ow leverel:

²¹Lavar dhe ji Ysrael, Yndellma y lever an Arloedh DUW: Awottavy ow tisakra ow sentri, goeth agas nerth, desir agas dewlagas, ha delit agas enev. Agas mebyon ha'gas myrghes, a wrussowgh aga gasa, a goedh der an kledha.

²²Ha hwi a wra kepar dell wrugavy; ny gudhowgh ages minvlew na dhybri bara gynoryon.

²³Agas tulyfantys a vydh war agas pennow, ha'gas sandalyow war agas treys. Ny gynowgh na ny oelowgh, mes hwi a wra pedri yn agas kammweythresow, ha hanasa an eyl dh'y gila.

²⁴Ezekiel a vydh tokyn dhywgh; hwi a wra kepar ha pup-tra a wrug ev. Pan hwyrvydh, hwi a woer my dhe vos an Arloedh DUW.

²⁵Ha ty, A vab den, y'n jydh may hwrav vy kemmeres dhiworta aga skons, lowena aga thekter, delit aga dewlagas, desir aga enev, hag ynwedh aga mebyon ha'ga myrghes —

²⁶y'n jydh na, fowesik a dheu dhis dhe dherivas dhis an nowodhow.

²⁷Y'n jydh na dha anow a vydh igor dhe'n fowesik; ty a gews ha ny vydhydh taw na fella. Yndella ty a vydh tokyn dhedha, hag i a woer my dhe vos an ARLOEDH.