Read Kernewek Ezekiel 25 Bible Online

Ezekiel 25 - Kernewek bible

Ezekiel 25

¹Ger an ARLOEDH a dheuth dhymm, ow leverel:

²Mab den, sett dha fas troha an Ammonysi ha profoes er aga fynn.

³Lavar dhe vebyon Ammon, Klewewgh ger an Arloedh DUW: Yndellma y lever an Arloedh DUW, Drefenn ty dhe leverel, ‘Aha!’ war ow sentri pan veu disakrys, ha war dir Ysrael pan veu gwrys ynyal, ha dhe ji Yuda pan ethons yn divroedh;

⁴rakhenna awottavy orth dha ri dhe vebyon an est rag perghennogeth. I a sett aga hampow ynnos ha drehevel aga thyldow ynnos; i a dheber dha froeth, hag i a yv dha leth.

⁵My a wra Rabba peurva rag kowrvergh, hag Ammon growedhva rag deves. Ena hwi a woer my dhe vos an ARLOEDH.

⁶Rag yndellma y lever an Arloedh DUW: Drefenn ty dhe dakya diwleuv ha stankya treys, ow lowenhe gans oll an atti y'th enev erbynn pow Ysrael,

⁷rakhenna awottavy owth ystynn ow leuv er dha bynn ha'th ri avel preydh dhe'n kenedhlow. My a'th tregh dhiworth an poblow ha'th tilea dhiworth an powyow; my a'th tistru; ha hwi a woer my dhe vos an ARLOEDH.

⁸Yndellma y lever an Arloedh DUW: Drefenn Moab ha Seir dhe leverel, Otta, chi Yuda yw avel oll an kenedhlow erell,

⁹rakhenna my a iger tenewen Moab, ow talleth dhiworth an sitys yn y oryon, glori an pow, Beth-yeshimoth, Baal-meon, ha Kiryathaym.

¹⁰My a's re war-barth gans an Ammonysi dhe vebyon an est avel perghennogeth, ma na vo kovhes an Ammonysi na fella yn mysk an kenedhlow;

¹¹ha my a wra breus erbynn Moab; ena i a woer my dhe vos an ARLOEDH.

¹²Yndellma y lever an Arloedh DUW: Drefenn Edom dhe dyli dial war ji Yuda, hag y feu pur gablus pan dylis dial warnedha,

¹³rakhenna yndellma y lever an Arloedh DUW, My a ystynn ow leuv erbynn Edom, ha treghi dhiworto den ha best; ha my a'n gwra tyller a vagoryow; dhiworth Teman bys Dedan i a goedh der an kledha.

¹⁴My a dal ow dial war Edom dre leuv ow fobel Ysrael, hag i a wra yn Edom war-lergh ow sorr ha'm konnar; hag i a woer ow dial, yn-medh an Arloedh DUW.

¹⁵Yndellma y lever an Arloedh DUW: Drefenn an Filistysi dhe dyli dial, ha gans atti an enev dhe dhistrui yn eskarogeth heb diwedh;

¹⁶rakhenna yndellma y lever an Arloedh DUW, Awottavy owth ystynn ow leuv erbynn an Filistysi, hag ow treghi an Kerethysi, hag ow tistrui remenant an arvor.

¹⁷My a dal warnedha dial bras gans kessydhyans konneryek. Ena i a woer my dhe vos an ARLOEDH, pan dalav ow dial warnedha.