Read Kernewek Ezekiel 3 Bible Online

Ezekiel 3 - Kernewek bible

Ezekiel 3

¹Yn-medh ev dhymm, A vab den, deber an pyth a gevydh; deber an rol-skrifa ma, ha ke, kows dhe ji Ysrael.

²Ytho my a igeris ow ganow, hag ev a wrug dhymm dybri an rol-skrifa ma.

³Hag yn-medh ev dhymm, A vab den, gwra dhe'th torr dybri, ha lanw dha groth a'n rol-skrifa ma esov ow ri dhis. Ytho my a's dybris hag y feu y'm ganow maga hweg avel an mel.

⁴Ena yn-medh ev dhymm, A vab den, ke, deus dhe ji Ysrael ha kows gans ow geryow dhedha.

⁵Rag nyns os dannvenys dhe bobel a yeth estren ha taves kales, mes dhe ji Ysrael,

⁶a-der dhe boblow pals a yeth estren ha taves kales, ma na gonvedhydh aga geryow. Mara'th tannvonnen dhedha, i a woslowsa dhis.

⁷Mes chi Ysrael ny vynn goslowes orthis, rag ny vynnons goslowes orthiv vy, drefenn oll chi Ysrael dhe vos penn-kales ha gorth a golonn.

⁸Awotta my re wrug dha fas dhe vos kales kepar ha'ga fasow i, ha'th tal dhe vos kales kepar ha'ga thal i.

⁹Avel adamant kreffa ages kellester, re wrugavy dha dal. Na borth own anedha, na bos digolonnek drefenn aga fasow, rag chi diwostydh yns i.

¹⁰Hag yn-medh ev dhymm: Mab den, oll an geryow a gowsav orthis, kemmer i y'th kolonn, ha'ga klewes gans dha dhiwskovarn.

¹¹Ha ke, deus dhe'n dhivresow, dhe vebyon dha bobel, ha kows orta. Lavar dhedha, ‘Yndellma y lever an Arloedh DUW’, mar koslowons po mar skonyons.

¹²Ena an Spyrys a'm drehevis, ha my a glewas a-dryv dhymm son grommyans bras, pan sevis glori an ARLOEDH[3] a'y le,

¹³ha son eskelli an kreaturs bew ow tochya an eyl dh'y ben, ha son an rosow rybons, ha son grommyans bras.

¹⁴Ena an spyrys a'm drehevis hag a'm kemmeras, ha gyllys veuv yn hwerowder, yn sorr ow spyrys, ha leuv an ARLOEDH o krev warnav.

¹⁵My a dheuth dhe Tel-abib, dhe'n dhivresow trigys ryb an avon Kebar; hag ena, y'n le mayth esens trigys, my a esedhas seyth dydh dyegrys yn aga mysk.

¹⁶Dhe benn seyth dydh, ger an ARLOEDH a dheuth dhymm, ow leverel:

¹⁷Mab den, my re'th wrug goelyador rag chi Ysrael; peskweyth may klewydh ger dhiworth ow ganow, ty a re dhedha gwarnyans dhiworthiv.

¹⁸Pan lavarav dhe'n tebelwas, ‘Ty a verow yn tevri’, ha ny redh dhodho gwarnyans, na kewsel dhe warnya tebelwas dhe dreylya dhiworth y fordh dhrog may sawyo y vewnans, an tebelwas na a verow yn y anewnder, mes y woes y hwilav a'th leuv.

¹⁹Mes mar kwarnydh an tebelwas, ha ny dreyl dhiworth y sherewynsi ha'y fordh dhrog, ev a verow yn y anewnder, mes ty a dhelirv dha enev.

²⁰Ha mar treyl den gwiryon dhiworth y ewnder ha gul drog, my a worr men a drebuchya a-ragdho; ev a verow. Drefenn na'n gwarnsys, ev a verow yn y begh. Ny vydh kovhes y wiryonedh re wrug; mes y woes a hwilav a'th leuv.

²¹Mes mar kwarnydh den gwiryon rag na beggho, ha ny begh, y few yn tevri, rag ev dhe vos gwarnyes, ha ty a dhelirv dha enev.

²²Yth esa leuv an ARLOEDH warnav eno; hag ev a leveris dhymm, Sav ha ke yn-mes dhe'n nans, hag eno my a gews genes.

²³Ytho my a sevis ha mos yn-mes dhe'n nans. Hag awotta glori an ARLOEDH ow sevel ena, kepar ha'n glori a welis ryb an avon Kebar, ha my a goedhas war ow fas.

²⁴Ena an Spyrys a entras dhymm ha'm settya war ow threys, ha kewsel orthiv, ha leverel dhymm, Ke, dege dha honan a-bervedh y'th chi.

²⁵Ha ty, A vab den, i a worr warnas lovonow, ha'th kelmi gansa, ma na ylli mos yn-mes yn aga mysk.

²⁶My a wra dhe'th taves glena orth dha stevnik, may fydhydh avlavar, ha ny yllydh aga heredhi; rag chi diwostydh yns i.

²⁷Mes pan gowsav orthis, my a iger dha anow, ha ty a lever dhedha, ‘Yndellma y lever An Arloedh DUW.’ Ev neb a glew, klewes; hag ev neb a skon, skonys; rag chi diwostydh yns i.