Read Kernewek Ezekiel 30 Bible Online

Ezekiel 30 - Kernewek bible

Ezekiel 30

¹Ger an ARLOEDH a dheuth dhymm, ow leverel:

²Mab den, profoes ha lavar, Yndellma y lever an Arloedh DUW: Kynewgh, ‘Ellas rag an jydh!’

³Rag ogas yw an jydh, ogas yw dydh an ARLOEDH; y fydh dydh a gommol, prys breus an kenedhlow.

⁴Kledha a dheu erbynn Ejyp, hag y fydh angoes yn Ethiopia, pan goedh an re ledhys yn Ejyp; i a gemmer hy rychys dhe-ves, ha'y selyow a vydh terrys dhe'n dor.

⁵Ethiopia, ha Put, Lud hag oll Arabia, Libya ha mebyon pow an kevambos a goedh war-barth gansa der an kledha.

⁶Yndellma y lever an ARLOEDH: An re a skoedh Ejyp a goedh, ha goeth hy galloes a dhiyskynn; dhiworth Migdol dhe Syene i a goedh ynni der an kledha, yn-medh an Arloedh DUW.

⁷I a vydh dibobel yn mysk powyow ynyal ha'y sitys a vydh yn mysk sitys gwastys.

⁸Ena i a woer my dhe vos an ARLOEDH, pan worrav tan yn Ejyp, hag oll hy gweresoryon a vydh terrys.

⁹Y'n jydh na kannasow a yn-mes dhiworthiv yn gorholyon dhe ownekhe Ethiopia dhibreder, hag y fydh kren ynna yn dydh Ejyp, rag otta, ev a dheu.

¹⁰Yndellma y lever an ArloedhDUW: My a wra dhe routh Ejyp hedhi dre leuv Nebukadnessar myghtern Babylon.

¹¹Ev ha'y bobel ganso, an fella a'n kenedhlow, a vydh dres dhe bylla an pow, I a denn aga kledhedhyow erbynn Ejyp, ha lenwel an pow a'n re ledhys.

¹²My a wra an avonyow sygh, ha gwertha an pow yn leuv an debeles, ha gwastya an pow ha pup-tra eus ynno dre leuv estrenyon; my, an ARLOEDH, re gewsis.

¹³Yndellma y lever an ArloedhDUW: My a dhistru idolys ha ri diwedh dhe'n imajys yn Nof.[38] Ny vydh na fella pennsevik yn pow Ejyp; ha my a worr own yn pow Ejyp.

¹⁴My a wra Pathros ynyal, ha gorra tan yn Soan ha gul breusow yn No.[39]

¹⁵My a dhiver ow sorr war Sin,[40] skons Ejyp, ha treghi dhe-ves an routh a No.

¹⁶My a worr tan yn Ejyp, Sin a omwen yn payn; Fos No a vydh folsys, hag y fydh dhe No ahwer pub dydh.

¹⁷Gwer yowynk On ha Pi-beseth[41] a goedh der an kledha, hag yth ons an sitys na yn kethneth.

¹⁸Yn Tahpanhes an jydh a dewl, pan dorrav ternwelennow[42] Ejyp eno, ha goeth hy nerth dheu dhe dhiwedh ynni; kommolenn a's kudh, hag yth a hy vyrghes yn kethneth.

¹⁹My a wra breusow yn Ejyp, hag i a woer my dhe vos an ARLOEDH.

²⁰Y'n unnegves blydhen, y'n kynsa mis, yn seythves dydh an mis, ger an ARLOEDH a dheuth dhymm, ow leverel,

²¹Mab den, my re dorras bregh Faro myghtern Ejyp, hag otta nyns yw kelmys rag yaghheans na nyns yw lystennys dh'y gelmi may fo krev lowr dhe synsi kledha.

²²Rakhenna yndellma y lever an Arloedh DUW: Awottavy erbynn Faro, myghtern Ejyp. My a derr y breghow krev, an bregh krev ha'n bregh terrys, ha gul dhe'n kledha koedha dhiworth y leuv.

²³My a skatter Ejyp y'n kenedhlow ha'ga lesa der an powyow.

²⁴My a grevha breghow myghtern Babylon ha gorra ow kledha yn y leuv; mes my a derr breghow Faro, hag i a gyn a-ragdho kepar dell gyn den ledhys.

²⁵My a grevha breghow myghtern Babylon, mes breghow Faro a goedh. Ena i a woer my dhe vos an ARLOEDH, pan worrav ow kledha yn leuv myghtern Babylon, hag ev a'n ystynn erbynn pow Ejyp.

²⁶My a skatter Ejyp y'n kenedhlow ha'ga lesa der an powyow. Ena i a woer my dhe vos an ARLOEDH.