Read Kernewek Ezekiel 31 Bible Online

Ezekiel 31 - Kernewek bible

Ezekiel 31

¹Y'n unnegves blydhen, y'n tressa mis, yn kynsa dydh an mis, ger an ARLOEDH a dheuth dhymm, ow leverel,

²Mab den, lavar dhe Faro myghtern Ejyp ha dh'y routh, Piw osta haval dhodho y'th veuredh?

³Otta Assyria, kederwydhenn yn Lebanon, gans skorr teg, ow ri skeus dhe'n koes, meur hy ughelder; hy thopp a veu ynter an kommol.

⁴Dowrow a wrug dhedhi tevi bras; an downder a's gwrug ughel, gans y woverow ow resek a-dro dhe'n tyller may feu hy plynsys, ow tannvon y ganolyow yn-mes dhe oll gwydh an gwel.

⁵Rakhenna hy ughelder o brassa ages oll gwydh an mes; y skorrennow a ynkressyas, ha'y barrennow a devis hir dre reson an dowrow pals.

⁶Oll ydhyn an nevow a wrug aga neythow yn hy skorrennow, hag oll bestes an gwel a dhineythis yn-dann hy barrennow; hag yth esa oll kenedhlow meur trigys yn hy skeus.

⁷Teg o yn hy meuredh, yn hirder hy skorrennow delyek, rag hy gwreydh e yn-nans dhe dhowrow meur.

⁸An kederwydh yn lowarth Duw nyns ens hy far, nyns o sybwydh haval dh'y skorrennow; nyns o meryw kepar ha'y barrennow; nyns o gwydhenn vytholl y'n lowarth Duw haval dhedhi yn hy thekter.

⁹My a's tekhas gans hy skorrennow delyek pals, hag yth esa oll gwydh Eden yn lowarth Duw ow perthi avi orti.

¹⁰Rakhenna yndellma y lever an Arloedh DUW: Drefenn hi dhe devi ughel, ha settya hy thopp ynter an kommol, ha rag bos hy holonn goethus yn hy ughelder,

¹¹my a's ros yn leuv ledyer kenedhlow, rag hy dyghtya war-lergh hy sherewynsi. My a's tewlis yn-mes.

¹²Estrenyon dhiworth an fella a'n kenedhlow a's troghas dhe'n dor, ha'y gasa. War an menydhyow, hag yn oll an nansow y skorrennow delyek re goedhas, ha'y barrennow a wrowedh terrys yn oll goverow an norvys; hag oll poblow an norvys res eth yn-mes dhiworth hy skeus ha'y gasa.

¹³Oll ydhyn an nevow a drig war hy hyf koedhys, ha oll bestes an gwel a drig yn hy barrennow.

¹⁴Hemm yw ma na deffo an gwydh ryb an dowrow re ughel, ow settya aga thopp ynter an kommol. Na dyv gwydh nevra namoy dhe'n keth ughelder ma, oll an re a yv dowr; i oll yw destnys dhe'n mernans yn rannow isella an norvys; i a vydh yn mysk mebyon den, gans an re a dhiyskynn dhe'n pytt.

¹⁵Yndellma y lever an Arloedh DUW: Y'n jydh may tiyskynnas dhe ifarn, my a gudhas an downder gans kynvann rygdhi; my a fronnas hy avonyow ha lesta lies dowr. My a wrug dhe Lebanon kyni rygdhi, hag oll gwydh an gwel a glamderas rygdhi.

¹⁶My a wrug dhe'n kenedhlow krena dre son hy therroes pan y's dros yn-nans dhe ifarn gans an re a dhiyskynn dhe'n pytt; hag oll gwydh Eden, an flour ha'n gwella a Lebanon, oll an re a eva dowr, a veu konfortys y'n bys a-woeles.

¹⁷An re esa trigys yn hy skeus, hy heffrysysi yn mysk an kenedhlow, i ynwedh dhiyskynnas dhe ifarn gensi, dhe'n re ledhys gans an kledha.

¹⁸Piw a veu haval dhis yn glori hag yn meuredh yntra gwydh Eden? Ty a vydh dres yn-nans war-barth gans gwydh Eden dhe'n bys a-woeles; ty a wrowedh yn mysk an re antrodreghys, gans an re ledhys gans an kledha. Hemm yw Faro hag oll y routh, yn-medh an Arloedh DUW.