Read Kernewek Ezekiel 35 Bible Online

Ezekiel 35 - Kernewek bible

Ezekiel 35

¹Ger an Arloedh a dheuth dhymm, ow leverel,

²Mab den, sett dha fas erbynn menydh Seir, ha profoes er y bynn,

³ha lavar dhodho, Yndellma y lever an Arloedh DUW: Ottavy er dha bynn, A venydh Seir, ha my a ystynn ow leuv er dha bynn, ha'th wul difeyth hag ynyal.

⁴My a wra dha sitys magoryow, ha ty a vydh difeyth, ha ty a woer my dhe vos an ARLOEDH.

⁵Drefenn bos dhis eskarogeth bythkwethek, ha ty re dhelivras mebyon Ysrael dhe nerth an kledha yn termyn aga therroes, yn termyn aga hessydhyans finek,

⁶rakhenna, dell vewav, yn-medh an Arloedh DUW, my a'th dhaskorr dhe woes, ha goes a'th helgh; drefenn na wrussys kasa goes, goes a'th helgh.

⁷My a wra menydh Seir ynyalder ha difeyth, ha my a dregh dhiworto pubonan eus ow tos hag ow mos.

⁸My a lenow y venydhyow a'y re ledhys; an re ledhys gans an kledha a goedh y'th vrennow ha'th nansow, hag yn oll dha woverow.

⁹My a'th wra ynyalder bys vykken, ha ny vydh dha sitys annedhys. Ena hwi a woer my dhe vos an ARLOEDH.

¹⁰Drefenn ty dhe leverel, ‘An dhiw genedhel ma ha'n dhew bow ma yw dhymmo vy, ha ni a's erit’, kyn feu an ARLOEDH ena,

¹¹rakhenna, dell vewav, yn-medh an Arloedh DUW, my a'th tyght war-lergh dha sorr ha war-lergh dha avi a dhiskwedhsys, drefenn dha gas er aga fynn; ha my a vydh aswonnys yntredha pan wrav dha vreusi.

¹²Ha ty a woer y hwrugavy, an ARLOEDH, klewes oll dha vlasfemiow a gewssys erbynn menydhyow Ysrael, ow leverel, ‘Wastys yns; i re beu res dhyn dhe dhevorya.’

¹³Hwi a vostyas er ow fynn gans agas ganow, ha kressya agas geryow er ow fynn; my a'n glewas.

¹⁴Yndellma y lever an Arloedh DUW: Pan lowenha oll an norvys, my a'th wra ynyalder.

¹⁵Kepar dell lowenhasys erbynn eretons chi Ysrael, drefenn y vos ynyalder, yndella my a wra dha dhyghtya; ty a vydh ynyalder, menydh Seir, hag Edom kowal. Ena i a woer my dhe vos an ARLOEDH.