Read Kernewek Ezekiel 37 Bible Online

Ezekiel 37 - Kernewek bible

Ezekiel 37

¹Yth esa warnav leuv an ARLOEDH, hag ev a'm dug mes yn spyrys an ARLOEDH, ha'm settya yn kres an nans; y feu leun a eskern.

²Hag ev a wrug dhymm tremena dresta a-derdro. Hag otta, fest lies ens i war enep an nans, ha pur sygh ens.

³Ha dhymmo y leveris, ‘A vab den, a yll an eskern ma bewa?’ Yn-medhav, ‘Arloedh DUW, ty a woer.’

⁴Ev a leveris dhymm, ‘Gwra profoesa war an eskern ma, ha lavar dhedha: A hwi eskern sygh, klewewgh ger an ARLOEDH.

⁵Yndellma y lever an Arloedh DUW dhe'n eskern ma: Otta, my a dhre anall ynnowgh, ha hwi a vew.

⁶Ha my a worr warnowgh giow, ha gul kig dhe devi warnowgh, ha'gas kudha gans kneus; ha my a worr ynnowgh anall ha hwi a vew. Ena hwi a woer my dhe vos an ARLOEDH.’

⁷Ytho my a brofoesas, kepar dell veu erghys dhymm. Ena y feu tros, ha my ow profoesa, hag otta son rugla, ha'n eskern a dheuth war-barth, an eyl askorn dh'y gila.

⁸My a viras, hag otta giow ha kig a dheuth yn-bann warnedha, ha kneus a's kudhas a-wartha, saw ynna nyns esa anall.

⁹Ev a leveris dhymm, ‘Profoes dhe'n anall, gwra profoesa, A vab den, ha lavar dhe'n anall: Yndellma y lever an Arloedh DUW: Deus dhiworth an peswar gwyns, A anall, hag anella war an dus ledhys ma, may fons bew.’

¹⁰Ytho my a brofoesas kepar dell erghis dhymm, ha'n anall a dheuth a-berth ynna, hag i a wrug bewa, ha sevel war aga threys, lu fest bras.

¹¹Ena yn-medh ev dhymm, ‘A vab den, an eskern ma yw chi Ysrael oll yn tien. Otta, i a lever, “Sygh yw agan eskern, ha kellys yw agan govenek. Treghys dhe-ves on ni.”

¹²Rakhenna gwra profoesa ha leverel dhedha, Yndellma y lever an Arloedh DUW: Otta, yth esov owth igeri agas bedhow, ha my a'gas drehav mes a'gas bedhow, ow fobel vy, ha'gas dri bys yn pow Ysrael.

¹³Ha hwi a woer my dhe vos an ARLOEDH, pan igorav agas bedhow, ha pan y'gas drehavav mes a'gas bedhow, ow fobel.

¹⁴Ha my a worr ow spyrys ynnowgh, ha hwi a vew, ha my a'gas sett yn agas tiredh agas honan. Ena hwi a woer my, an ARLOEDH, dhe gewsel, ha my a'n kollenow’, yn-medh an ARLOEDH.

¹⁵Ger an Arloedh a dheuth dhymm, ow leverel,

¹⁶Ha ty, A vab den, kemmer dhis dha honan unn prenn ha skrif warnodho, ‘Rag Yuda, ha rag mebyon Ysrael y gowetha.’ Ena kemmer unn prenn arall ha skrif warnodho, ‘Rag Yosep, prenn Efraym, ha rag oll chi Ysrael y gowetha.’

¹⁷Ha gwra aga junya an eyl gans y gila dhe vos unn prenn, may fons onan y'th leuv.

¹⁸Pan wra mebyon dha bobel leverel dhis, ‘A ny dhiskwedhydh dhyn pyth yw styr hemma?’

¹⁹lavar dhedha, Yndellma y lever an Arloedh DUW: Otta, my a gemmer prenn Yosep usi yn leuv Efraym, ha loethow Ysrael y gowetha ha'ga junya gans prenn Yuda ha'ga gul dhe vos unn prenn, hag i a vydh onan y'm leuv.

²⁰Y fydh an prennyer, may skrifydh warnedha, a-rag aga dewlagas.

²¹Lavar dhedha, Yndellma y lever an Arloedh DUW: Ottavy ow kemmeres mebyon Ysrael yn-mes a'n kenedhlow mayth ethons, ha my a's kuntell a bub tu, ha'ga dri dh'aga thiredh aga honan.

²²My a's gwrav unn genedhel y'n tir war venydhyow Ysrael, hag unn myghtern a vydh myghtern dhedha i oll, ha ny vydhons arta diw genedhel.

²³Ny omdhefolons nevra namoy gans aga idolys, na gans aga thaklow kasadow, na gans oll aga threuspassow. My a's saw dhiworth oll aga gwriansow dislel may peghsons ynna, ha'ga glanhe. Ena i a vydh ow fobel, ha my a vydh aga Duw.

²⁴Ow gwas Davydh a vydh myghtern warnedha, hag y fydh unn bugel dhedha i oll. I a gerdh war-lergh ow breusow, ha gwaytyas gwitha ow ordenansow.

²⁵I a drig y'n tir a res vy dhe'm gwas Yakob, mayth esa agas tasow trigys ynno. I ha'ga mebyon, ha mebyon aga mebyon a drig ynno bys vykken, ha Davydh ow gwas a vydh pennsevik dhedha bys vynitha.

²⁶My a wra gansa kevambos kres; y fydh kevambos gansa bys vykken. My a's fastyav ha'ga moghhe, ha my a worr ow sentri yn aga mysk bys vynnari.

²⁷Ow thrigva a vydh gansa; my a vydh aga Duw, hag i a vydh ow fobel.

²⁸Ena an kenedhlow a woer my, an ARLOEDH, dhe sanshe Ysrael, pan vydh ow sentri yn aga mysk bys vykken.