Read Kernewek Ezekiel 42 Bible Online

Ezekiel 42 - Kernewek bible

Ezekiel 42

¹Ena ev a'm dros yn-mes dhe'n klos a-ves, troha'n gogledh, ha'm dri dhe'n helyow a-dal an garth a-rag an drehevyans y'n gogledh.

²Y hirder o kans kevelin yn tenewen an gogledh, ha'y les hanter-kans kevelin.

³Y'n ugens kevelin esa dhe'n klos a-bervedh, hag a-dal leur-leghveyn an klos a-ves, yth esa tremenvaow yn tri nivel, haval an eyl dh'y gila.

⁴A-rag an helyow yth esa kerdhva, deg kevelin hy les ha kans kevelin y hirder, ow mires orth an klos a-bervedh.[50] Yth esa aga darasow troha'n gogledh.

⁵An helyow gwartha o moy ynn es an helyow yn goeles ha kres an drehevyans, rag an tremenvaow a gemmeri moy spas dhiworta.

⁶Rag yth esens yn tri nivel, ha nyns esa dhedha kolovenyow avel kolovenyow an klos a-ves; rakhenna helyow an nivelyow isel ha kres o le aga braster dhiworth an leur hag yn-bann.

⁷Yth esa fos a-ves, kettuel gans an helyow, troha'n klos a-ves a-dal an helyow, hanter-kans kevelin y hirder.

⁸Rag hirder an helyow y'n klos a-ves o hanter-kans kevelin, mes a-rag an tempel kans kevelin ens i.

⁹Yn-dann an helyow ma yth esa entrans dhiworth an est rag tus ow mos ynna dhiworth an klos a-ves.

¹⁰Orth dalleth fos an klos troha'n dyghow,[51] ow mires troha'n garth ha'n drehevyans, yth esa helyow

¹¹gans tremenva a-ragdha. Haval ens i dhe'n helyow troha'n gogledh. Gans an keth hirder ha les ha gans an keth fordhow yn-mes, an keth aray ha'n keth darasow

¹²o an helyow troha'n soth. Yth esa daras orth dalleth an dremenva, an dremenva a-rag an fos kehaval troha'n est ow mos a-ji.

¹³Ena yn-medh ev dhymm, ‘Helyow an gogledh ha helyow an dyghow a-rag an garth yw helyow sans may hyll an oferysi dybri an taklow an moyha sans. Ena i a sett an taklow an moyha sans, an offrynn greun, an offrynn pegh ha'n offrynn kammweyth, rag an tyller yw sans.

¹⁴Pan dheu an oferysi a-ji, nyns ons yn-mes dhiworth an tyller sans bys y'n klos a-ves, mes ena i a sett aga dillas may fenystrons ynna, rag sans yns; i a wisk dillas arall kyns mos dhe dyller an bobel.’

¹⁵Wosa gorfenna musura parth a-ji an tempel, ev a'm dros yn-mes troha'n yet a vir troha'n est, ha'y musura oll a-dro.

¹⁶Ev a vusuras tenewen an est gans an gordenn-vusura, pymp kans kevelin a-dro gans an gordenn-vusura.

¹⁷Ev a vusuras tenewen an gogledh, pymp kans kevelin a-dro gans an gordenn-vusura.

¹⁸Ev a vusuras tenewen an dyghow, pymp kans korsenn gans an gorsenn-vusura.

¹⁹Ena eva dreylyas dhe'n howlsedhes ha musura, pymp kans kevelin gans an gordenn-vusura.

²⁰Ev a'n musuras war an peswar tenewen. Yth esa dhodho fos oll a-dro pymp kans kevelin hy hirder, ha pymp kans kevelin hy les, dhe wul diberth ynter an sans ha'n ansans.