Read Kernewek Ezekiel 44 Bible Online

Ezekiel 44 - Kernewek bible

Ezekiel 44

¹Ena ev a'm dros dhe yet an sentri a-ves, a vir troha'n est; hag yth o degeys.

²Yn-medh an ARLOEDH dhymm: An yet ma a vydh degeys; ny vydh igerys, ha ny wra denvyth entra dredhi; rag an ARLOEDH, Duw Ysrael res entras dredhi. Rakhenna y fydh degeys.

³Ny yll nagonan marnas an pennsevik y honan esedha ynni dhe dhybri bara a-rag an ARLOEDH; ev a enter dre bortal an yet, ha mos yn-mes dredho.

⁴Ena ev a'm dros a-rag an tempel dre yet an gogledh. My a viras, hag otta, glori an ARLOEDH ow lenwel tempel an ARLOEDH; ha my a goedhas war ow fas.

⁵An ARLOEDH a leveris dhymm: Mab den, gwra attendya, ha mir gans dha dhewlagas ha klew gans dha dhiwskovarn ha my a gews dhis a-dro dhe oll ordenansow tempel an ARLOEDH, hag oll y laghys; ha merk yn ta entrans an tempel, hag oll an fordhow yn-mes a'n sentri.

⁶Lavar dhe'n chi diwostydh, dhe ji Ysrael, Yndellma y lever an Arloedh DUW: Bedhes diwedh dhe'th weythresow kasadow, a ji Ysrael,

⁷ow tri y'n sentri estrenyon, antrodreghys aga holonn, hag antrodreghys aga hig, ow tefola ow chi, owth offrynna dhymm ow boes, an blonek ha'n goes. Hwi re dorras ow hevambos, yn oll agas taklow kasadow.

⁸Ny withsowgh charj a'm taklow sans, mes hwi re settyas erell dhe witha charj a'm sentri.

⁹Yndellma y lever an Arloedh DUW: Ny dheu y'm sentri estren vyth, antrodreghys y golonn na antrodreghys y gig, na hwath an estrenyon usi yn mysk mebyon Ysrael.

¹⁰Mes an Levysi, an re yw gyllys pell dhiworthiv, ow mos yn sowdhan dhiworthiv war-lergh aga idolys pan eth Ysrael yn sowdhan — i a berth aga hessydhyans.

¹¹I a vydh menystrys y'm sentri, gans charj a yetys an tempel, hag ow servya y'm tempel; i a ladh an offrynn leskys ha'n sakrifis rag an bobel, hag i a sev a-ragdha ha'ga servya.

¹²Rag i dhe venystra dhedha a-rag aga idolys, ha gul dhe ji Ysrael trebuchya yn kammhynseth, rakhenna my re dos er aga fynn, yn-medh an Arloedh DUW, hag i a berth aga hessydhyans.

¹³Ny dhons nes dhymm, dhe servya dhymm avel oferysi, na dos nes dhe oll ow thaklow sans, na dhe'n tyller an moyha sans; mes i a berth aga meth, drefenn an taklow kasadow a wrussons,

¹⁴Mes my a re dhedha charj a'n tempel, rag oll y ober, ha pup-tra eus dhe vos gwrys ynno.

¹⁵Mes an oferysi leviek, mebyon Sadok, an re a withas charj a'm sentri pan eth mebyon Ysrael yn sowdhan dhiworthiv, i a dheu nes dhymm dhe'm servya, hag i a sev a-ragov dhe offrynna dhymm blonek ha goes, yn-medh an Arloedh DUW.

¹⁶I aga honan a vydh owth entra y'm sentri, hag i aga honan a dheu nes dhe'm moes dhe menystra dhymm, hag i a with ow charj.

¹⁷Pan dhons dre yetys an klos a-bervedh, i a vydh gwiskys yn dillas a lien; ny dheu gwlan warnedha hag i ow menystra orth yetys an klos a-bervedh, po a-ji dhe'm tempel.

¹⁸Y fydh tulyfantys a lien war aga fenn, ha lavrek a lien war aga dhiwglun; ny omwrogysons gans travyth a wra dhedha hwysa.

¹⁹Pan ons yn-mes dhe'n klos a-ves, dhe'n bobel, i a dhiwisk aga dillas mayth esens ow menystra ynna, ha'ga gorr y'n helyow sans, hag i a wisk dillas arall ma na sakrons an bobel gans aga dillas.

²⁰Ny dreghons blew aga fenn dhe vos blogh, na gasa aga gols dhe vos hir; mes i a dregh gols aga fenn gans rach.

²¹Ny wra oferyas vyth eva gwin pan enter an klos a-bervedh.

²²Ny dhemmedh gwedhwes, na benyn dhidhemmedhys, mes gwyrghes a has chi Ysrael, po gwedhwes neb yw gwedhwes oferyas.

²³I a dhysk dhe'm pobel dissernya ynter an sans ha'n ansans, ha diskwedhes dhedha dissernya ynter an avlan ha'n glan.

²⁴Yn ken a lagha i a sev yn breus, hag i a vreus herwydh ow breusow vy. I a with ow lagha ha'm ordenansow rag oll ow goelyow apoyntys, hag i a with ow sabotys sans.

²⁵Ny omdhefolons, ow tos nes dhe dhen marow; mes mars yw mamm po tas, mab po myrgh, broder po hwoer na's teves gour, i a yll omdhefola.

²⁶Wosa bos glanhes, i a reken seyth dydh ragdho.

²⁷Y'n jydh may teu y'n sentri, y'n klos a-bervedh, dhe venystra y'n sentri, ev a offrynn y offrynn pegh, yn-medh an Arloedh DUW.

²⁸Hemma a vydh eretons dhedha: my yw aga eretons. Ny rowgh dhedha perghennogeth yn Ysrael; my yw aga ferghennogeth.

²⁹I a yll dybri an offrynn greun, an offrynn pegh ha'n offrynn kammweyth; ha pup-tra sakrys yn Ysrael a vydh dhedha.

³⁰An kynsa frut a oll an kynsa frut a bub kinda, ha pub offrynn a bub kinda dhiworth oll agas offrynnow a vydh dhe'n oferysi; hwi a re dhe'n oferyas an kynsa rann a'gas toes, may powesso bennath war dha ji.[53]

³¹Ny dheber an oferysi travyth a verwis a'y honan, na preydh skwardys gans edhen na best.