Read Kernewek Ezekiel 46 Bible Online

Ezekiel 46 - Kernewek bible

Ezekiel 46

¹Yndellma y lever an ARLOEDH: yet an klos a-bervedh, a vir troha'n est, a vydh degeys y'n hwegh dydh a lavur; mes yn dydh an sabot y fydh igerys, hag yn dydh an loer nowydh.

²An pennsevik a dheu a-ji dre bortal an yet dhiworth an tu a-ves, ha sevel ryb post an yet. An oferysi a bareus y offrynn leskys ha'y offrynnow kres, hag ev a omblek orth treudhow an yet. Ena ev a yn-mes, mes ny vydh an yet degeys kyns an gorthugher.

³Pobel an tir ynwedh a omblek orth daras an yet na a-rag an ARLOEDH y'n sabotys hag y'n loeryow nowydh.

⁴Ha'n offrynn leskys a wra an pennsevik y dhre dhe'n ARLOEDH yn dydh an sabot a vydh hwegh oen heb namm, ha hordh heb namm.

⁵An offrynn greun gans an hordh a vydh unn efa, ha'n offrynn greun gans an oen a vydh herwydh y vodh, war-barth gans hin a oyl rag pub efa.

⁶Yn dydh an loer nowydh ev a brovi tarow ha hwegh oen ha hordh; i a vydh heb namm.

⁷Hag ev a brovi offrynn greun unn efa rag an tarow hag efa rag an hordh, ha rag an eyn herwydh y vodh, war-barth gans hin a oyl rag pub efa.

⁸Pan dheu an pennsevik a-ji, ev a dheu dre bortal an yet, hag ev a yn-mes y'n keth fordh.

⁹Pan dheu pobel an tir a-rag an ARLOEDH y'n goelyow apoyntys, neb a dheu a-ji dre yet an gogledh dhe wordhya, ev a omdenn dre yet an soth; ha neb a dheu a-ji dre yet an soth, ev a omdenn dre yet an gogledh; ny wra ev dehweles der an yet may teuth a-ji dredhi, mes omdennes der an yet usi a-dal dhedhi.

¹⁰Pan dhons a-ji, an pennsevik a dheu yn aga mysk, ha pan omdennons, ev ynwedh a omdenn.

¹¹Y'n goelyow ha'n solempnitys an offrynn greun gans tarow a vydh efa, ha gans hordh efa, ha gans oen herwydh an galloes, war-barth gans hin a oyl rag pub efa.

¹²Pan wra an pennsevik provia offrynn bolonjedhek, offrynn leskys po offrynn kres, avel offrynn bolonjedhek dhe'n ARLOEDH, an yet a vir troha'n est a vydh igerys ragdho; hag ev a offrynn y offrynn leskys ha'y offrynnow kres dell wra yn dydh an sabot. Ena ev a omdenn, ha wosa ev dhe omdenna, an yet a vydh degeys.

¹³Ty a brovi oen a unn bloedh heb namm rag offrynn leskys dhe'n ARLOEDH pub dydh; pub myttin ty a'n provi.

¹⁴Ty a brovi offrynn greun ganso pub myttin, unn hweghves rann a efa, hag unn tressa rann a hin a oyl rag glybya an bleus fin, avel offrynn greun dhe'n ARLOEDH, avel ordenans bys vykken.

¹⁵I a brovi an oen ha'n offrynn greun ha'n oyl pub myttin, rag offrynn leskys pub-dydhyek.

¹⁶Yndellma y lever an Arloedh DUW: Mar re an pennsevik ro dhiworth y eretons dhe onan a'y vebyon, henna a vydh dh'y vebyon ev ynwedh; y fydh aga ferghennogeth dre eretons.

¹⁷Mes mar re ro dhiworth y eretons dhe onan a'y wesyon, y fydh dhodho bys vlydhen y livreson; ena ev a dhehwel dhe'n pennsevik. Ny vydh y eretons marnas rag y vebyon..

¹⁸Ny wra an pennsevik kemmeres travyth a eretons an bobel, orth aga thewlel mes a'ga ferghennogeth; ev a re eretons dh'y vebyon yn-mes a'y berghennogeth y honan, ma na vo nagonan a'm pobel diberthys dhiworth y berghennogeth.

¹⁹Ena ev a'm dros der an entrans ryb tenewen an yet troha'n helyow sans rag an oferysi, a vir troha'n gogledh; hag ottena tyller y'n tenewen west anedha.

²⁰Yn-medh ev dhymm, Hemm yw an tyller may frojyons ynno an offrynn kammweyth ha'n offrynn pegh, ha may pebons an offrynn greun, ma na's drons yn-mes dhe'n klos a-ves, ha sakra an bobel.

²¹Ena ev a'm dros yn-mes dhe'n klos a-ves, ha'm ledya dhe beder kornell an klos; hag yn pub kornell a'n klos yth esa klos arall.

²²Y'n peder kornell a'n klos yth esa klosyow byghan, dewgens aga hirder ha deg warn ugens aga les.

²³Yth esa rew a veyn a-dro dhe bubonan a'n peswar klos, gans oelesow rag bryjyon, gwrys yn-dann an rewyow oll a-dro.

²⁴Yn-medh ev dhymm, An re ma yw an keginow may hwra an re a menyster y'n tempel bryjyon ynna sakrifis an bobel.