Read Kernewek Ezekiel 48 Bible Online

Ezekiel 48 - Kernewek bible

Ezekiel 48

¹An re ma yw henwyn an loethow. Dhiworth or an gogledh, war fordh Hethlon, dhe Lebo-hamath, bys Hasar-enan, usi war or Damaskus troha'n gogledh, ryb Hamath: dhiworth tenewen an est dhe'n west: y fydh unn rann dhe Dan.

²Ryb or Dan, dhiworth tenewen an est bys tenewen an west, unn rann dhe Asher.

³Ryb or Asher dhiworth tenewen an est bys tenewen an west, unn rann rag Naftali.

⁴Ryb or Naftali, dhiworth tenewen an est bys tenewen an west, unn rann dhe Manasse.

⁵Ryb or Manasse, dhiworth tenewen an est bys tenewen an west, unn rann dhe Efraym

⁶Ryb or Efraym, dhiworth tenewen an est bys tenewen an west, unn rann dhe Rewben.

⁷Ryb or Rewben, dhiworth tenewen an est bys tenewen an west, unn rann dhe Yuda.

⁸Ryb or Yuda, dhiworth tenewen an est bys tenewen an west, y fydh an offrynn a offrynnowgh, pymp mil warn ugens y les, ha'y hirder kepar ha'n rannow erell, dhiworth tenewen an est bys tenewen an west; ha'n sentri a vydh y'n kres anodho.

⁹An offrynn a offrynnowgh dhe'n ARLOEDH a vydh pymp mil warn ugens y hirder ha deg mil y les.

¹⁰An re ma a vydh an offrynn sans rag an oferysi: y'n gogledh, pymp mil warn ugens, hag y'n howlsedhes deg mil y les, hag y'n est deg mil y les, hag y'n soth pymp mil warn ugens y hirder; ha'n sentri a vydh y'n kres anodho.

¹¹Y fydh rag an oferysi sakrys, mebyon Sadok, a withas ow charj, ha nag ethons yn sowdhan, dell wrug an Levysi.

¹²Y fydh dhedha avel offrynn arbennik dhiworth offrynn sans an tir, tyller moyha sans, ryb or an Levysi.

¹³Ryb or an oferysi y fydh offrynn dhe'n Levysi pymp mil warn ugens y hirder ha deg mil y les. Oll an hirder a vydh pymp warn ugens, ha'n hirder deg mil.

¹⁴Ny werthons travyth anodho, na'y geschanjya. Ny'n statyons, rag an gwella tir yw, ha sans dhe'n ARLOEDH.

¹⁵An pymp mil yn les yw gesys, ha'n pymp warn ugens yn hirder, a vydh tyller na veu sakrys rag an sita dhe wul devnydh anodho, rag annedhow, ha rag peurvaow. An sita a vydh y'n kres anodho.

¹⁶An re ma a vydh hy musuryow: yn tenewen an gogledh pymp kans ha peswar mil, yn tenewen an soth, pymp kans ha peswar mil, yn tenewen an est pymp kans ha peswar mil, hag yn tenewen an west pymp kans ha peswar mil.

¹⁷Y fydh peurva dhe'n sita: y'n gogledh dew kans ha hanter-kans, y'n soth dew kans ha hanter-kans, y'n est dew kans ha hanter-kans, hag y'n west dew kans ha hanter-kans.

¹⁸Remenant an hirder ryb an offrynn sans a vydh deg mil y'n est, ha deg mil y'n west; y fydh ryb an offrynn sans. Y askorr a vydh boes rag oberoryon an sita.

¹⁹Oberoryon an sita dhiworth oll loethow Ysrael a wra y gonedha.

²⁰Oll an offrynn a vydh pymp mil warn ugens orth pymp mil warn ugens, pedrek. Ty a offrynn an offrynn sans war-barth gans perghennogeth an sita.

²¹An remenant war dhew denewen an offrynn sans ha perghennogeth an sita a vydh rag an pennsevik. Y fydh owth ystynn dhiworth pymp mil warn ugens an offrynn troha or an est, ha troha'n west a-dal an pymp mil warn ugens bys or an west, kettuel gans rannow an loethow; y fydh rag an pennsevik. An offrynn sans gans an sentri a vydh y'n kres anodho.

²²Perghennogeth an Levysi ha perghennogeth an sita a vydh yn kres an pyth usi dhe'n pennsevik. Perghennogeth an pennsevik a vydh ynter or Yuda hag or Benyamin.

²³Remenant an loethow: y fydh dhe Benyamin unn rann, dhiworth tenewen an est bys yn tenewen an west.

²⁴Ryb or Benyamin, dhiworth tenewen an est bys tenewen an west, unn rann dhe Simeon.

²⁵Ryb or Simeon, dhiworth tenewen an est bys tenewen an west, unn rann dhe Yssakar.

²⁶Ryb or Yssakar, dhiworth tenewen an est bys tenewen an west, unn rann dhe Zebulun.

²⁷Ryb or Zebulun, dhiworth tenewen an est bys tenewen an west, unn rann dhe Gad.

²⁸Ryb or Gad dhe denewen an soth, an or a vydh dhiworth Tamar dhe dhowrow Meribath-kadesh, ena ryb an avon bys an Mor Bras.

²⁹Hemm yw an tir a wredh y ranna avel eretons ow tewlel prenn rag loethow Ysrael, ha'n re ma yw aga rannow, yn-medh an Arloedh DUW.

³⁰An re ma yw an fordhow yn-mes a'n sita: yn tenewen an gogledh, yw peswar mil ha pymp kans orth musur,

³¹yetys an sita a vydh war-lergh henwyn loethow Ysrael, teyr yet y'n gogledh, yet Rewben onan, yet Yuda onan, yet Levi onan.

³²Yn tenewen an est, yw peswar mil ha pymp kans, teyr yet: yet Yosep onan, yet Benyamin onan, yet Dan onan.

³³Yn tenewen an soth, yw peswar mil ha pymp kans orth musur, teyr yet, yet Simeon onan, yet Yssakar onan, yet Zebulun onan.

³⁴Yn tenewen an west, yw peswar mil ha pymp kans orth musur, teyr yet, yet Gad onan, yet Asher onan, yet Naftali onan.

³⁵An kompas yw etek mil. Ha hanow an sita a-dhia'n jydh na a vydh: Yma an ARLOEDH Ena.[58]