Read Kernewek Ezekiel 5 Bible Online

Ezekiel 5 - Kernewek bible

Ezekiel 5

¹Ha ty, A vab den, kemmer kledha lymm, kemmer e avel altenn barver, ha gwra e dhe bassya war dha benn ha war dha varv; ena kemmer mantol ha rann an blew.

²Ty a worr tressa rann anodho yn tan yn kres an sita, wosa bos gorfennys dydhyow an esedhva; ha kemmer tressa rann ha gwask gans an kledha a-dro dhe'n sita; ha tressa rann a skattrydh dhe'n gwyns, ha my a denn an kledha war aga lergh.

³Mes kemmer alena niver byghan a vlewennow, ha'ga helmi yn lappys dha dhillasenn.

⁴Ena kemmer moy anedha ha'ga tewlel yn kres an tan, ha'ga leski y'n tan. Alena tan a yn-mes dhe oll chi Ysrael.

⁵Yndellma y lever an Arloedh DUW: Homm yw Yerusalem; my re's settyas yn mysk an kenedhlow, gans gwlasow oll a-dro dhedhi.

⁶Mes hi re rebellyas erbynn ow breusow moy ages sherewynsi an kenedhlow, hag erbynn ow ordenansow moy ages an gwlasow usi a-dro dhedhi; rag i re dhenaghas ow breusow ha ny gerdhsons y'm ordenansow.

⁷Rakhenna yndellma y lever an Arloedh DUW: Drefenn bos agas balghder brassa ages an kenedhlow usi a-dro dhis, ha ny gerdhsowgh y'm ordenansow ha ny wrussowgh ow breusow, ha ny wrussowgh hwath war-lergh breusow an kenedhlow usi a-dro dhywgh;

⁸rakhenna yndellma y lever an Arloedh DUW: Mir, my ow honan, yth esov er dha bynn, ha my a wra breusow a-berth ynnos a-wel dhe'n kenedhlow.

⁹My a wra ynnos an pyth na wrug vy bythkweth, ha ny wrav vy travyth avello nevra arta, drefenn oll dha daklow kasadow.

¹⁰Rakhenna tasow a dheber mebyon a-berth ynnos, ha mebyon a dheber aga thasow; ha my a wra breusow ynnos, ha skattra oll an remenant ahanas dhe oll an gwynsow.

¹¹Rakhenna, dell vewav, yn-medh an Arloedh DUW, drefenn ty dhe dhefola ow sentri gans oll dha daklow vil ha gans oll dha daklow kasadow, ytho my a'th tivarv; ow lagas ny gemmer pita, hag ynwedh ny gemmerav truedh.

¹²Tressa rann ahanowgh a verow dre bla po mos dhe goll dre dhivoetter a-berth ynnos; tressa rann a goedh der an kledha a-dro dhis; ha tressa rann a skattrav dhe oll an gwynsow ha tenna an kledha war aga lergh.

¹³Ena ow sorr a vydh kowlwrys, ha'm konnar er aga fynn a wrav dhe bowes, ha my a vydh diellys; hag i a woer my, an ARLOEDH, dhe gewsel y'm avi, pan wrav vy kowlwul ow honnar er aga fynn.

¹⁴Ha my a'th wrav dhe vos tyller a vagoryow ha skorn yn mysk an kenedhlow usi a-dro dhis, yn golok oll an dremenysi

¹⁵Ty a vydh skorn, ha tont, ha bysna hag euth dhe'n kenedhlow a-dro dhis, pan wrav breusow er dha bynn yn sorr hag yn konnar hag yn keredhyow konneryek. My, an ARLOEDH, re gewsis.

¹⁶Pan dhannvonav an tebel sethow a dhivoetter er agas pynn[5] rag distruyans, my a's tannvon dh'agas distrui. My a ynkress divoetter warnowgh ha terri agas lorgh bara.

¹⁷My a dhannvon divoetter ha tebel vestes er agas pynn, hag i a'th wra anvap. Plag ha goes a dremen dresos, ha my a dhre kledha warnas. My, an ARLOEDH, re gewsis.