Read Kernewek Ezekiel 7 Bible Online

Ezekiel 7 - Kernewek bible

Ezekiel 7

¹Ger an ARLOEDH a dheuth dhymm, ow leverel:

²Ha ty, A vab den, yndellma y lever an Arloedh DUW dhe bow Ysrael: Diwedh! an diwedh a dheuth war beswar korn an tir.

³Lemmyn an diwedh yw devedhys warnas ha my re dhannvonas ow sorr er dha bynn; ha my a'th vreus war-lergh dha fordhow, ha dha gessydhya rag oll dha daklow kasadow.

⁴Ny gemmer ow lagas pita ahanas, ha ny'th sparyav, rag my a attal dhis drefenn dha fordhow, ha'th taklow kasadow a-berth ynnos. Ena hwi a woer my dhe vos an ARLOEDH.

⁵Yndellma y lever An Arloedh DUW: Anfeusi, unn anfeusi, otta re dheuth!

⁶Diwedh re dheuth, re dheuth an diwedh ha difuna er dha bynn; otta re dheuth!

⁷An vreus re dheuth dhis neb eus trigys y'n tir. An termyn re dheuth, ogas yw an jydh — yma skruth, a-der garm lowen y'n menydhyow.

⁸Lemmyn a verr spys my a dhinwa ow honnar warnas, ha'y kowlwul ow sorr er dha bynn; my a'th vreus war-lergh dha fordhow, hag attyli dhis rag oll dha daklow kasadow.

⁹Ny gemmer ow lagas pita ahanas, na ny'th sparyav; my a attal dhis war-lergh dha fordhow, ha'th taklow kasadow usi a-berth ynnos. Ena hwi a woer my dhe vos an ARLOEDH, usi ow kweskel.

¹⁰Ott an jydh! Otta re dheuth! An vreus res eth yn-mes; an welenn re vleujyowas, balghder re eginas.

¹¹Freudh re devis avel gwelenn a sherewynsi; ny vydh gesys nagonan anedha, nagonan a'ga routh, na travyth a'ga golusogneth, na travyth a bris ynna.

¹²An termyn re dheuth, devedhys yw an jydh. Na lowenhes an prener, ha na wres an gwerther kyni, rag yma sorr war oll an routh anedha.

¹³Rag ny wra an prener pe dhe'n gwerther, hedre vons aga dew hwath yn few; rag ny vydh an welesigeth erbynn an routh daskelwys. Drefenn y anewnder, ny yll nagonan gwitha y vewnans.

¹⁴I re hwythas an hirgorn ha pareusi pup-tra; mes nyns a denvyth dhe'n vatel, rag yma ow sorr war oll an routh anedha.

¹⁵An kledha a-ves, ha'n plag ha'n divoetter a-ji: neb eus y'n gwel a verow der an kledha, ha neb eus y'n sita, divoetter ha plag a'n deber.

¹⁶Peub yw gesys a skap, hag i a vydh y'n menydhyow kepar ha kelemmi an nansow, i oll owth hanasa, peub yn y anewnder.

¹⁷Oll an dhiwla a vydh dinerth, hag oll an dhewlin a vydh kepar ha dowr.[8]

¹⁸I a wisk yskar, ha kren a's kudh. Meth a vydh dhe bub fas, ha moelder war oll aga fennow.

¹⁹I a dewl aga arghans y'n stretys, ha'ga owr a vydh pyth avlan. Ny yll aga arghans na'ga owr aga delivra yn dydh konnar an ARLOEDH. Ni yllons kavoes lowr rag aga enev, na lenwel aga thorr, rag y feu sklander a's ledyas yn anewnder.

²⁰Goeth a's tevo yn tekter aga thegennow ha gansa i a wrug aga imajys kasadow, aga thaklow kasadow; rakhenna my a's gwra mostedhes ragdha.

²¹My a'n re yn dorn estrenyon avel preydh, ha dhe debeles an norvys avel da pyllys, hag i a'n defol.

²²My a dreyl ow fas dhiworta, hag i a dhefol ow thresor; ladron a dheu ynni, hag i a's defol.

²³Gwra an kadon,[9] rag an tir yw leun a skoellya goes, ha'n sita yw leun a freudh.

²⁴My a dhre an gwettha a'n kenedhlow hag i a erit aga chiow; my a wra diwedh dhe woeth an re grev, ha'ga sentris a vydh defolys.

²⁵Angoes a dheu, hag i a hwila kres, mes ny'n kevons.

²⁶Anfeusi war anfeusi a dheu, hag y fydh hwedhel war hwedhel. I a hwila gwelesigeth dhiworth profoes; dyskans a'n lagha gans an oferyas a vydh kellys, ha kusul dhiworth an henavogyon.

²⁷An myghtern a gyn, ha'n pennsevik a vydh gwiskys yn euth; diwla pobel an tir a gren. My a's dyght war-lergh aga fordh, ha my a's breus war-lergh aga breusow. Ena i a woer my dhe vos an ARLOEDH.