Read Kernewek Ezekiel 8 Bible Online

Ezekiel 8 - Kernewek bible

Ezekiel 8

¹Y'n hweghves blydhen, y'n hweghves mis, yn pympes dydh an mis, ha my owth esedha y'm chi, ha henavogyon Yuda owth esedha a-ragov, leuv an Arloedh DUW a goedhas warnav ena.

²My a viras, hag otta hevelep kepar ha semlans gour. Dhiworth an rann a hevelis bos y dhiwglun bys an leur y feu tan, ha dhiworth y dhiwglun war-vann kepar ha'n semlans a splannder, avel amber ow lentri.

³Ev a ystynnas furv leuv ha'm kemmeres er kudynn a wols ow fenn. An spyrys a'm drehevis ynter an nor ha'n nev, ha'm dri dhe Yerusalem yn gwelesigethow Duw, dhe dharas an yet a-bervedh, a vir troha'n gledhbarth, ple'th esa imaj an avi, a brovok dhe avi.

⁴Hag otta, yth esa ena glori Duw Ysrael, kepar ha'n welesigeth a welis y'n nans.

⁵Ena yn-medh ev dhymm, ‘Mab den, drehav dha dhewlagas war-tu ha'n gledhbarth.’ Ytho my a dhrehevis ow dewlagas war-tu ha'n gledhbarth, hag otta, a'n barth kledh dhe yet an alter yth esa idol an avi ma y'n entrans.

⁶Ena yn-medh ev dhymm, ‘Mab den, a welydh pandr'a wrons, an taklow vil bras usi chi Ysrael ow kul omma, dhe'm pellhe dhiworth ow sentri? Mes ty a wel taklow vil hwath brassa.’

⁷Ena ev a'm dros dhe dharas an klos. My a welas, hag awotta, toll y'n fos.

⁸Ena yn-medh ev dhymm, ‘Mab den, pal der an fos.’ Ytho my a balas der an fos, hag awotta, daras.

⁹Hag yn-medh ev dhymm, ‘Ke a-ji ha gwel an taklow vil ha kasadow esons ow kul omma.’

¹⁰Ytho my eth a-ji ha gweles, hag otta pub furv a gramvil ha best kasadow, hag oll idolys chi Ysrael, kervys war an paros a-derdro.

¹¹Hag yth esa deg ha tri-ugens gour dhiworth henavogyon chi Ysrael ow sevel a-ragdha, ha Yaazania mab Shafan ow sevel yn aga mysk. Ha peub a'n jeva y ynkyslester yn y leuv, hag ethenn kommolenn an ynkys a yskynnas.

¹²Ena yn-medh ev dhymm, ‘A welsys, A vab den, an pyth usi henavogyon chi Ysrael ow kul y'n tewlder, peub yn chambouryow y imajys? Rag yn-medhons, “An ARLOEDH ny'gan gwel, an ARLOEDH re forsakyas an tir.” ’

¹³Hag yn-medh ev dhymm, ‘Ty a wel taklow vil hwath brassa esons orth aga gul.’

¹⁴Ena ev a'm dros dhe dharas yet chi an ARLOEDH usi a'n gledhbarth, hag ottena an benynes owth esedha, owth oela rag Tammuz.

¹⁵Ena yn-medh ev dhymm, ‘A welydh hemma, mab den? Ty a wel taklow vil hwath brassa es an re ma.’

¹⁶Ena ev a'm dros dhe'n klos a-bervedh a ji an ARLOEDH; hag otta, orth daras tempel an ARLOEDH, ynter an yet ha'n alter, yth esa a-dro dhe bymp gour warn ugens, gans aga heynow troha tempel an ARLOEDH ha'ga fasow troha'n est, owth omblegya dhe'n howl y'n est.

¹⁷Ena yn-medh ev dhymm, ‘A welsys, mab den? Yw ev tra drufel rag chi Yuda, i dhe wul an taklow vil re wrussons omma? Rag i re lenwis an tir a freudh, ha'm serri hwath moy. Ottensi ow korra skorrenn dh'aga throen.

¹⁸Ytho my a ober yn sorr; ny gemmer ow lagas truedh na ny's sparyav. Kyn krions y'm diwskovarn gans lev ughel ny woslowav orta.’