Read Kernewek Daniel 10 Bible Online

Daniel 10 - Kernewek bible

Daniel 10

¹Y'n tressa blydhen[21] a Syrus, myghtern Persia, y feu diskwedhys ger dhe Daniel, neb o henwys Belteshassar. Gwir o an ger na: kas vras. Ev a gonvedhas an ger — an welesigeth a'n styryas.

²Y'n dydhyow na, yth esen vy, Daniel, ow kalari dre deyr seythunweyth.

³Boes sawrys ny dhybryn, ny entra y'm ganow na kig na gwin, ha ny wren vy omuntya gans oyl, bys diwedh an teyr seythun.

⁴An peswora dydh warn ugens a'n kynsa mis, pan esen war lann an avon vras, homm yw an Tigris,

⁵y trehevis ow dewlagas, ha mires, hag otta unn gour gwiskys yn lien, y dhiwglun grogysys gans owr pur a Ufaz.

⁶Y gorf o avel owrven, y dremmynn o haval dhe lughesenn, y dhewlagas avel faglennow a dan; y dhiwvregh ha'y dhewdroes a wolowi avel brons splann, ha son y lev avel tros routh.

⁷Ha my, Daniel unnsel a welas an welesigeth; an dus esa genev ny welsons an welesigeth, mes kren bras a goedhas warnedha, hag y teghsons rag omgudha.

⁸Ytho y feuv gesys ow honan, ow kweles fisment a veu treylys warnav dhe dhiswrians, ha ny'm bo nerth namoy.

⁹Ena my a glewas y lev ow kewsel; ha kettell glewis son y eryow, y koedhis yn transyek war ow fas, ha'm fas orth an dor.

¹⁰Hag awotta dorn orth ow thochya, ha'm settya ow krena war ow dewlin ha palvow ow diwleuv.

¹¹Hag y leveris dhymm, ‘Daniel, karadow, attend an geryow a gowsav orthis, ha sav yn-bann, rag lemmyn yth ov dannvenys dhis.’ Hag ev ow leverel hemma dhymm, my a sevis yn-bann yn unn grena.

¹²Hag y leveris dhymm, ‘Na borth own, Daniel, rag a-dhia'n kynsa dydh may hworrsys dha vrys dhe gonvedhes, hag omuvelhe a-rag dha Dhuw, re beu klewys dha eryow, ha devedhys ov drefenn dha eryow.

¹³Pryns[22] ruvaneth Persia a sevi er ow fynn dre unn jydh warn ugens; mes Mighal, onan a'n kynsa prynsys, a dheuth rag ow gweres, ha my a'n gasas ena gans pryns ruvaneth Persia.

¹⁴Devedhys ov rag gul dhis konvedhes an pyth a hwyrvydh dhe'th pobel yn diwedh an dydhyow, rag bos an welesigeth rag an dydhyow a dheu.’

¹⁵Hag ev ow kewsel genev a-dro dhe'n maters ma, my a dreylyas ow fas orth an dor ha bos avlavar.

¹⁶Hag otta, onan haval dhe vab-den a dochyas ow diwweus; hag my a igoras ow ganow ha kewsel. Dhodho ev neb esa ow sevel a-ragov y leveris, ‘Ow arloedh, drefenn an welesigeth re dheuth gloesow warnav, ha ny'm beus nerth namoy.

¹⁷Fatell yll gwas ow arloedh kewsel gans ow arloedh omma? Nyns eus nerth vyth ynnov lemmyn, ha nyns eus anall gesys dhymm.’

¹⁸Arta ev neb o haval dhe dhen a'm tochyas ha'm kennertha.

¹⁹Yn-medh ev, ‘Na borth own, A wour karadow; kres re bo genes; bydh krev, ha bydh pur grev.’ Kettell gewsis orthiv, y feuv kennerthys, hag y leveris, ‘Re gowsso ow arloedh, rag ty re'm kennerthas.’

²⁰Hag y leveris ev, ‘A wodhes prag re dheuth dhis? Lemmyn y tehwelav rag omladh erbynn pryns Persia; ha pan vydhav gyllys, otta, y teu pryns Pow Grek.

²¹Mes my dhisplet dhis an pyth yw skrifys yn lyver an gwiryonedh. Nyns eus nagonan a sev yn krev genev erbynn an re na, marnas Mighal agas pryns.