Read Kernewek Daniel 4 Bible Online

Daniel 4 - Kernewek bible

Daniel 4

¹Nebukadnessar an myghtern, dhe oll an poblow, an kenedhlow ha'n tavosow trigys y'n norvys oll: Pals re bo agas kres![8]

²Da yw genev diskwedhes an arwoedhyow ha'n anethow re wrug Duw Ughella ragov.

³Ass yw bras y arwoedhyow, ass yw krev y anethow! Y vyghternses yw myghternses a dhur bys vykken, ha'y vestrynses a henedh dhe henedh.

⁴Yth esen vy, Nebukadnessar, attes y'm chi, hag ow floryshya y'm palys.

⁵Hunros a welis hag a wrug own dhymm; prederow war ow gweli ha gwelesigethow ow fenn a'm euthega.

⁶Rag hemma my a wrug ordenans may fe dres a-ragov oll an dus fur a Babylon, rag may tiskwetthens dhymm styr an hunros.

⁷Ena y teuth an hudoryon, an worhenysi, an Kaldeanys, ha'n goelyogyon; ha my a dherivas dhedha an hunros, mes ny yllens diskwedhes dhymm y styr.

⁸Ha wortiwedh y teuth a-ragov Daniel, henwys Belteshassar war-lergh hanow ow duw, mayth usi ynno spyrys an duwow sans; ha'n hunros a-ragdho a dherivis:

⁹‘A Belteshassar, mester an hudoryon, yth aswonnav bos ynnos spyrys an duwow sans, ha nag eus kevrin re gales ragos. Preder an pyth a welis y'm hunros, ha lavar dhymm y styr.

¹⁰An gwelesigethow y'm penn war ow gweli: Yth esen ow mires, hag otta gwydhenn yn kres an dor, ha meur o hy ughelder.

¹¹An wydhenn a dheuth ha bos bras ha krev, ha'y barr a dhrehedhas dhe nev, hag yth o gweladow bys penn an norvys oll.

¹²Teg o hy del, ha leun o hi a frut, hag ynni yth esa boes rag peub-oll. Yn-danni y hwre bestes gwyls kavoes skeus, hag yth esa ydhyn an ebron trigys yn hy skorrow; dhiworti y fedha megys pub kig.

¹³‘Yth esen war ow gweli ow mires orth gwelesigethow ow fenn, hag ottena goelyador, sans hogen, ow tiyskynna a nev.

¹⁴Ev a armas yn fen, ow leverel, “Hakkewgh an wydhenn dhe'n leur, ha treghewgh hy skorrow dhe-ves; kryghyllewgh hy delyow kwit ha skoellewgh hy frut; fies an bestes a-dhanno, ha'n ydhyn mes a'y skorrow.

¹⁵Mes gas kyf hy gwreydh y'n dor, kelmys gans kyngel a horn ha brons, yn gwels yr an gwel. Gans gluth an nev re bo ev glybys, ha re bo y rann gans an bestes yn gwels an dor.

¹⁶Re bo treylys y vrys dhiworth brys den, ha re bo res dhodho brys best; ha re dremenno warnodho seyth seson.

¹⁷Dre ordenans an woelysi yw an vreus, ha dre gows an syns yw an ervirans, rag may konvettho an re vew bos an Ughella rewler yn gwlaskor mab-den; hag ev a's re dhe'n neb a vynn, hag a sett warnedhi an isella a dus.”

¹⁸‘An hunros ma a welis vy, myghtern Nebukadnessar. Ty, A Belteshassar, deriv hy styr, rag na ylli oll an dus fur y'm ruvaneth diskwedhes dhymm hy styr; mes ty a yll, rag bos ynnos spyrys an duwow sans.’

¹⁹Ena Daniel, henwys Belteshassar, a veu skruthys pols, ha'y brederow a'n ownhas. An myghtern a worthybis ow leverel, ‘A Belteshassar, na vydh ownhes gans an hunros ha'y styr.’ Belteshassar a worthybis ow leverel, ‘Ow arloedh, re bo an hunros rag an re a'th kas, ha'y styr rag dha eskerens!

²⁰An wydhenn a welsys, hag a devis krev, ha'y barr a dhrehedhas dhe'n nevow, hag yth o gweladow y'n norvys oll,

²¹ha teg o hy del ha leun o hi a frut, hag ynni yth esa boes rag peub-oll, hag yn-danni y triga bestes gwyls ha war hy skorrow yth esedha ydhyn an ebron:

²²ty yw, A vyghtern, neb yw tevys krev, ha dha veuredh re devis ha drehedhes dhe'n nevow, ha'th vestrynses bys finweth an norvys.

²³Ha'n pyth re welas an myghtern, goelyador, sans hogen, ow tiyskynna a nev ha leverel, “Hakk an wydhenn dhe'n leur, ha'y distrui; mes gas kyf hy gwreydhyow y'n dor, kelmys gans kyngel a horn ha brons, yn gwels yr an gwel: gans gluth an nev re bo ev glybys, ha re bo y rann gans bestes gwyls erna dremenno warnodho seyth seson” —

²⁴ottomma an styr, A vyghtern: ordenans an Ughella yth yw, hag yw devedhys erbynn ow arloedh an myghtern,

²⁵may fi fesys pell dhiworth tus, ha'th annedh a vydh gans bestes gwyls, gwrys dhe dhybri gwels avel oghen, ha glybys gans gluth an nevow. Warnas y tremen seyth seson, bys pan gonvydhydh bos an Ughella rewler yn gwlaskor mab-den, hag y's re dhe neb a vynno.

²⁶Ha dell o erghys gasa kyf gwreydhyow an wydhenn, y fydh dha ruvaneth sur ragos wosa ty dhe aswonnvos an rewl a nev.

²⁷Ytho, A vyghtern, re bo ow husul degemmeradow dhis; gorfenn dha beghosow dre wul gwiryonses, ha'th gorthter dre dhiskwedhes tregeredh dhe'n voghosogyon, rag may fo dha siwenyans martesen hirhes.’

²⁸Oll hemma a goedhas war Nebukadnessar an myghtern.

²⁹Orth penn dewdhek mis, yth esa ev ow kerdhes ev war do an palys ryel yn Babylon.

³⁰An myghtern a gewsis ow leverel, ‘A nyns yw homma Babylon veur, hag a dhrehevis vy avel chi ryel dre nerth ow galloes, ha rag enor ow meuredh?’

³¹Pan esa an geryow hwath yn ganow an myghtern, y koedhas lev a'n nevow: ‘Dhis y leverir, A Nebukadnessar an myghtern: gallas an ruvaneth dhiworthis,

³²hag i a'th fes pell dhiworth tus, ha'th annedh a vydh gans an bestes gwyls, hag i a'th wra dhe dhybri gwels avel oghen; warnas y tremen seyth seson bys pan wodhvydhydh bos an Ughella rewler yn gwlaskor mab-den, hag ev a's re dhe neb a vynno.’

³³Y'n eur na an ger a veu kewerys rag Nebukadnessar. Fesys veu dhiworth tus, hag ev a dhybri gwels avel oghen; glybys o y gorf gans gluth an nevow, bys pan devis y vlew avel pluv eryon, ha'y ewines avel ewines ydhyn.

³⁴Orth diwedh an dydhyow, my, Nebukadnessar, a dhrehevis ow dewlagas dhe nev, ha'm skians a dheuth arta dhymm. My a vennigas an Ughella, ha gul gormel ha gologhas dhe'n neb a vew bys vykken. Rag y vestrynses yw mestrynses a bes vynitha, ha'y wlaskor a dhur a henedh dhe henedh;

³⁵ha pub annedhyas a'n norvys yw reknys avel mann; kepar dell vynno y hwra yn mysk lu an nev, hag yn mysk annedhysi an norvys; ny yll denvyth lettya y dhorn na leverel dhodho, ‘Pandr'a wredh?’

³⁶Yn keth prys na y tehwelis dhymm ow skians; ha rag enor ow myghternses, ow meuredh ha'm splannder a dhehwelis dhymm. Ow husulyoryon ha'm arlydhi a'm hwila, hag y feuv daskorrys y'm myghternses, ha moy a veuredh a veu keworrys warnav.

³⁷Lemmyn yth esov vy, Nebukadnessar, ow praysya, owth ughelhe hag owth enora Myghtern nev, rag gwiryon yw oll y weythresow hag ewn y hynsyow, hag y hwoer iselhe an re a gerdh yn goeth.