Read Kernewek Daniel 5 Bible Online

Daniel 5 - Kernewek bible

Daniel 5

¹Belshassar an myghtern[9] a wrug kevewi bras rag mil a'y arlydhi, hag eva gwin a-rag an mil.

²Pan dastyas an gwin, Belshassar a worhemmynnis may fe dres an lestri owr hag arghans a gemmersa Nebukadnessar y das yn-mes a'n tempel yn Yerusalem, rag dhiworta mayth effa an myghtern ha'y arlydhi, y wragedh, ha'y iswragedh.

³Ena y feu dres an lestri owr re biens kemmerys yn-mes a'n tempel a ji Duw yn Yerusalem; ha dhiworta yth evas an myghtern ha'y arlydhi, y wragedh, ha'y iswragedh.

⁴I a evas gwin, ha gormel an duwow a owr hag arghans, brons, horn, prenn ha men.

⁵Desempis yth omdhiskwedhas bysies dorn den, ow skrifa war blaster fos palys an myghtern, a-dal an kantoler; ha'n myghtern a welas palv an dhorn ow skrifa.

⁶Ena liw an myghtern a dreylyas, y brederow a'n troblas, mellow y dhiwglun a omlowsyas, ha'y dhewlin a gnoukyas an eyl orth y gila.

⁷An myghtern a armas yn ughel rag dri an worhenysi, an Kaldeanys, ha'n goelyogyon. Ev a leveris dhe'n dus fur a Babylon, ‘Seul a rettyo an skrif ma, hag a dhiskwettho dhymm y styr, a vydh gwiskys yn purpur, gans kadon owr a-dro dh'y gonna, hag a vydh an tressa rewler y'n ruvaneth.’

⁸Ena y teuth oll tus fur an myghtern, mes ny wodhyens redya an skrif na, na diskwedhes y styr dhe'n myghtern.

⁹Ena y feu myghtern Belshassar troblys dres eghenn, hag y liw a dreylyas; ha'y arlydhi o ankombrys.

¹⁰An vyghternes, dre reson geryow an myghtern ha'y arlydhi, a dheuth a-ji dhe hel an kevewi. Ha'n vyghternes a leveris, ‘A vyghtern, bys vykken re vewi! Na wrello dha brederow dha drobla, ha na wrello dha liw treylya:

¹¹yma y'th ruvaneth gour hag ynno spyrys an duwow sans. Yn dydhyow dha das y feu kevys ynno golow, skians ha furneth, avel furneth an duwow. Myghtern Nebukadnessar, dha das, a'n gwrug penn an hudoryon, an worhenysi, an Kaldeanys, ha'n goelyogyon;

¹²rag y feu kevys spyrys bryntin, godhvos, ha skians dhe styrya hunrosow, dhe glerhe kevrinyow ha dhe dhigelmi kudynnow ynno — yn Daniel, neb o henwys Belteshassar gans an myghtern. Lemmyn re bo Daniel gelwys, hag ev a wra diskwedhes an styr.’

¹³Ena Daniel a veu dres a-rag an myghtern. Ha'n myghtern a leveris dhe Daniel, ‘Osta Daniel, onan a'n dhivresow a Yuda, neb a veu dres a Yuda gans ow thas, an myghtern?

¹⁴Re glewis ahanas bos ynnos spyrys an duwow sans, hag yma kevys ynnos golow ha skians ha furneth bryntin.

¹⁵Lemmyn an dus fur, an worhenysi a veu dres a-ragov rag redya an skrif ma ha diskwedhes dhymm y styr; mes ny wodhyens diskwedhes styr an mater.

¹⁶Mes my re glewas ahanas, ty dhe wodhvos ri styryow ha digelmi kudynnow. Ytho mar kyllydh redya an skrif ha diskwedhes dhymm y styr, y fydhydh gwiskys yn purpur, gans kadon owr a-dro dhe'th konna, hag y fydhydh an tressa rewler y'n ruvaneth.’

¹⁷Ena Daniel a worthybis a-rag an myghtern, ‘Dha rohow re bons ragos jy dha honan, ha ro dha bewasow dhe gen dhen; byttegyns my a red an skrif dhe'n myghtern, ha diskwedhes dhodho y styr.

¹⁸A vyghtern, an Duw Ughella a ros dhe'th tas Nebukadnessar myghternses ha meuredh hag enor ha splannder;

¹⁹ha drefenn an meuredh na hag a veu res dhodho, oll an poblow, kenedhlow ha tavosow a grena ha kavoes own a-ragdho. Neb a vynna, ev a ladha; ha neb a vynna, ev a synsi yn few; neb a vynna, ev a ughelhi; ha neb a vynna, ev a iselhi.

²⁰Mes pan veu ughelhes y golonn ha kaleshes y spyrys, may tyghtyas gans goeth, y feu tennys a'y dron ryel, ha'y enor a veu degemmerys dhiworto.

²¹Ev a veu herdhys pell a vab-den, ha'y vrys a veu gwrys avel best, ha'y annedh o gans an asenes gwyls; i a ros dhodho gwels dhe dhybri avel oghen, ha glyb o y gorf gans gluth a nev, bys pan gonvedhas bos an Duw Ughella ow rewlya gwlaskor mab-den, hag a sett warnodho neb a vynn.

²²Ha ty, y vab, Belshassar, ny wrussys iselhe dha golonn jy kyn hwodhves oll hemma,

²³mes ty a omughelhas erbynn Arloedh an nevow. Lestri y ji re beu dres a-ragos, ha ty ha'th arlydhi, dha wragedh, ha'th iswragedh re evas gwin dhiworta; ha ty re wormolas an duwow a arghans hag owr, brons, horn, prenn ha men, neb na welons na klewes na godhvos; mes an Duw mayth usi dha anall yn y dhorn, hag oll dha hynsyow, ny wrussys y enora.

²⁴‘Rakhenna dhiworto y feu dannvenys palv an dhorn, hag y feu gwrys an skrif ma.

²⁵Ottomma an skrif a veu gwrys: MENE, MENE, TEKEL ha PARSIN.[10]

²⁶Ottomma styryans an mater: MENE, Duw re niveras dha ruvaneth, ha gorra gorfenn warnedhi;

²⁷TEKEL, ty re beu poesys y'n vantol ha kevys re skav;

²⁸PERES, dha ruvaneth yw rynnys ha res dhe'n Medys ha dhe'n Persianys.’

²⁹Ena Belshassar a worhemmynnis, hag i a wiskas Daniel gans purpur, gans kadon owr a-dro dh'y gonna, hag i a wrug gwarnyans yn y gever, may fedha an tressa rewler y'n ruvaneth.

³⁰An keth nos na y feu ledhys Belshassar, myghtern an Kaldeanys,

³¹ha Darius an Med a dhegemmeras an ruvaneth, hag ev a-dro dhe dhew vloedh ha tri-ugens.[11]