Read Kernewek Daniel 7 Bible Online

Daniel 7 - Kernewek bible

Daniel 7

¹Y'n kynsa blydhen[14] a Belshassar myghtern Babylon, Daniel a welas Daniel hunros ha gwelesigethow yn y benn, hag ev a'y wrowedh yn y weli. Ena ev a skrifas an hunros, ha derivas an mater yn kott.

²Daniel a leveris: My a welas y'm gwelesigeth y'n nos, hag ottena an peswar gwyns a nev ow kul freudh y'n mor bras;

³hag a-ves a'n mor y teuth yn-bann peswar best bras, pub huni dihaval an eyl dh'y gila.

⁴An kynsa o kepar ha lew, hag a'n jevo eskelli er. Ha my ow mires, y dhiwaskell a veu dibluvys, hag y feu sevys dhiwar an dor ha gorrys dhe sevel war y dhewdroes avel den; ha kolonn den a veu res dhodho.

⁵Hag ottena best arall, an nessa, kepar hag ors. Omdhrehevys veu war unn denewen, hag yn y anow ynter y dhyns yth esa teyr asenn; hag i a leveris dhodho, ‘Sav yn-bann; deber meur a gig.’

⁶Wosa henna my a viras, hag ottena onan arall, kepar ha lewpard, ha war y geyn peder askell edhen; peswar penn a'n jevo an best ma ha galloes dhe rewlya a veu res dhodho.

⁷Wosa henna my a welas yn gwelesigethow an nos, hag ottena peswora best, euthyk ha vil ha krev dres eghenn; yth esa dhodho dyns bras a horn; ev a dhybris ha terri. An remenant ev a stankyas gans y dhewdroes. Dihaval o ev dhe oll an bestes kyns, ha deg korn a'n jevo.

⁸Ha my ow prederi a-dro dhe'n kern, otta, y sevis yn aga mysk onan moy, onan byghan, ha tri a'n kern kynsa a veu diwreydhys a-ragdho; hag otta, y'n korn ma lagasow avel lagasow tus, ha ganow ow leverel taklow meur.

⁹Ha my ow mires, yth esa tronys settys yn-bann, ha'n Koth a'n dydhyow a esedhas; kann avel an ergh o y wisk, ha'y wols avel gwlan glan;[15] flammow tan o y dron ha dhodho rosow a dan ow tewi.

¹⁰Liv a dan a resa ha tardha dhiworto; milvil a'n servya, hag yth esa ow sevel dheragdho deg milweyth deg mil. An vreuslys a esedhas, ha'n lyvrow a veu igerys.

¹¹Ena my a besyas mires, drefenn lev an geryow meur a leveri an korn. My a viras bys pan veu ledhys an best, ha'y gorf distruys ha res dhe flammow an tan.

¹²Dhiworth remenant an bestes y feu aga mestrynses kemmerys dhe-ves, mes aga bewnans a veu hirhes dre dermyn ha seson.

¹³My a welas yn gwelesigethow an nos, ottena yn mysk kommol an nev yth esa onan avel Mab an den ow tos; ev a dheuth bys y'n Koth a'n dydhyow hag i a'n hembronkas yn y ogas.

¹⁴Ha dhodho y feu res mestrynses, hag enor ha myghternses; hag oll an poblow, kenedhlow ha tavosow a'n servyas. Y vestrynses yw mestrynses a dhur bys vykken a ny dremen dhe-ves, ha'y ruvaneth ny vydh distruys.

¹⁵Ha my, Daniel, o prederus ow spyrys ynnov, ha gwelesigethow ow fenn a'm trobla.

¹⁶My a dheuth nes dhe onan esa ow sevel ena, ha govynn dhiworto an gwiryonedh a-dro dhe oll a hemma. Ev a gewsis orthiv, hag a wrug dhymm godhvos styr an kas:

¹⁷‘An bestes bras ma, peswar aga niver, a styr peswar myghtern neb a wra sevel a'n dor;

¹⁸mes syns an Ughella a dhegemmer an wlaskor, hag i a bew an wlaskor bys vykken ha bynnari.’

¹⁹Ena my a vynnas godhvos an gwiryonedh a-dro dhe'n peswora best, hag o dihaval dhe'n re erell, euthyk dres eghenn gans y dhyns a horn ha'y ewines a vrons, hag a dhybris an remenant, ha'y derri, ha'y stankya gans y dhewdroes;

²⁰hag a-dro dhe'n deg korn war y benn, ha'n korn arall hag a sevis hag a-ragdho y koedhas tri anedha; an korn esa dhodho lagasow ha ganow a leveri taklow meur, neb a heveli bos brassa ages an re erell.

²¹Ha my ow mires, y hwrug an korn ma kas gans an syns, hag a dryghis warnedha,

²²bys pan dheuth an Koth a'n dydhyow, may feu breus res dhe syns an Ughella, ha'n prys devedhys may hwrug an syns degemmeres an wlaskor.

²³Yndellma y leveris: ‘An peswora best a styr an peswora gwlaskor y'n norvys, hag a vydh dihaval dhe oll an gwlaskordhow erell; hi a wra devorya oll an norvys, ha'y stankya ha'y derri dhe demmyn.

²⁴Ha'n deg korn a styr deg myghtern, neb a wra sevel yn-mes a'n wlaskor; hag onan arall a wra sevel war aga lergh, dihaval dhe'n re gynsa, hag ev a dhre tri myghtern dhe'n dor.

²⁵Ev a lever geryow erbynn an Ughella ha tormentya[16] syns an Ughella, ha gwaytyas chanjya an sesonyow ha'n lagha. Hag i a vydh res yn y dhorn bys termyn, ha termynyow, ha hanter termyn.

²⁶An vreuslys a wra esedha, ha'y vestrynses a vydh kemmerys dhe-ves, rag bos treghys ha distruys bys y'n diwedh.

²⁷Ha'n wlaskor ha'n mestrynses ha meuredh an gwlaskordhow yn-dann oll an nev a vydh res dhe bobel syns an Ughella. Y wlaskor a vydh gwlaskor a dhur bys vykken, hag oll an rewloryon a wra y servya hag orto bos gostydh.’

²⁸Ottomma diwedh an mater. My, Daniel, o troblys yn fen gans ow frederow, ha'm liw a janjyas, mes my a withas an dra y'm brys.