Read Kernewek Daniel 9 Bible Online

Daniel 9 - Kernewek bible

Daniel 9

¹Yn kynsa blydhen Darius, mab Ahasuerus, a has an Medys, neb a veu gwrys myghtern war wlaskor an Kaldeanys,

²yn kynsa blydhen y reyn, my, Daniel, a gonvedhas der an lyvrow bos niver an vlydhynyow rag kowlwul gwastyans Yerusalem, herwydh ger an ARLOEDH dhe Yeremia an profoes, deg blydhen ha tri-ugens.

³Ena my a dreylyas ow thremmynn troha'n Arloedh Duw, orth y hwilas dre bysadow ha dre aspysadow, gans penys, ha gans yskar ha lusu.

⁴Pysi war an ARLOEDH ow Duw ha konfessya a wrug, ow leverel, ‘Ogh Arloedh, an Duw meur hag euthyk, neb a with an kevambos ha tregeredh rag an re a'n kar ha gwitha y worhemmynnow,

⁵ni re beghas ha gul drog, ha gul kammweythres, ha rebellya, ow treylya dhiworth dha worhemmynnow ha'th vreusow.

⁶Ny woslowsyn orth dha servysi an brofoesi, neb a gewsi y'th hanow dh'agan myghternedh, dh'agan prynsys ha dh'agan tasow, ha dhe oll an bobel a'n pow.

⁷‘Dhiso jy, A Arloedh, yma ewnder, mes dhyn ni yma meth a'n fas, dell eus y'n jydh hedhyw, dhe dus Yuda, dhe annedhysi Yerusalem, ha dhe Ysrael oll, an re ogas ha'n re bell, yn keniver pow may mons fesys genes, drefenn an trayson re wrussons er dha bynn.

⁸Dhyn ni, A ARLOEDH, yma meth a'n fas, dh'agan myghternedh, dh'agan prynsys ha dh'agan tasow, drefenn ni dhe begha er dha bynn.

⁹Dhe'n Arloedh agan Duw yma truedh ha gevyans; rag ni re rebellyas er y bynn,

¹⁰ha fyllel dhe woslowes orth lev an ARLOEDH agan Duw, dhe gerdhes yn y laghys hag a worras dheragon dre leuv y servysi an brofoesi.

¹¹‘Ysrael oll re dorras dha lagha ha treylya dhe-denewen, ow nagha goslowes orth dha lev. Diverys warnan yma'n molleth ha'n ti hag yw skrifys yn lagha Moyses gwas Duw, rag ni re beghas er y bynn.

¹²Ev re gollenwis y eryow kewsys er agan pynn, hag erbynn agan breusysi neb a'gan breusis, ow tri warnan droglamm bras, rag yn-dann oll an nevow ny veu gwrys kepar dell veu gwrys yn Yerusalem.

¹³Dell veu skrifys yn lagha Moyses, yma koedhys oll an droglamm ma warnan; mes ny dhiserrsyn tremmynn an ARLOEDH agan Duw, ow treylya dhiworth agan kammweyth hag ow konvedhes dha wiryonedh.

¹⁴Yndella an ARLOEDH a woelyas, ow hwilas chons dhe dhri an droglamm warnan; rag gwiryon yw an ARLOEDH agan Duw yn y weythresow oll, ha ny woslowsyn orth y lev.

¹⁵‘Ha lemmyn, A Arloedh agan Duw, neb re hembronkas dha bobel yn-mes a bow Ejyp dre leuv grev, hag a wrug dhe'th hanow bos gerys-da avel y'n jydh hedhyw, pegha re wrussyn, ha gul yn trog.

¹⁶A Arloedh, herwydh oll dha weythyow gwiryon, re bo treylys, my a'th pys, dha sorr ha'th konnar dhiworth dha sita Yerusalem, dha venydh sans; rag a-barth agan peghosow, hag a-barth kammweyth agan tasow, Yerusalem ha'th pobel re dheuth bismer dh'agan kentrevogyon.

¹⁷Lemmyn, agan Duw, goslow orth pysadow dha was, hag orth y aspysadow, ha gwra may tewynno dha fas war dha sentri forsakys, a-barth an Arloedh.

¹⁸Ow Duw, ro dha skovarn ha klewes; igor dha dhewlagas ha mir orth agan ahwer, hag orth an sita may feu dha hanow gelwys warnedhi; nyns yw drefenn agan gwiryonses ni may profyn agan aspysadow a-ragos, mes drefenn dha druedh bras.

¹⁹A Arloedh, klew! A Arloedh, gyv! A Arloedh, attend ha gwra; na wra hokya, a'th govis jy dha honan, ow Duw, rag henwys yw dha sita ha'th pobel gans dha hanow.’

²⁰Ha my ow kewsel hag ow pysi, hag ow yes ow feghes ha peghes ow fobel Ysrael, hag ow profya ow aspysadow a-rag an ARLOEDH ow Duw, a-barth menydh sans ow Duw;

²¹pan esen ow leverel ow fysadow, an gour Gabriel, neb re welsen kyns y'n welesigeth, a dheuth dhymm ow nija uskis orth prys offrynn an gorthugher.

²²Ev a dheuth dhe gewsel genev, ow leverel,[19] ‘A Daniel, devedhys ov yn-mes rag ri dhis furneth dhe gonvedhes.

²³Orth dalleth dha aspysadow, ger a dheuth yn-mes, ha devedhys ov dh'y dherivas dhis, rag meurgerys os; ytho gwra vri a'n ger ha konvedh an welesigeth:

²⁴‘Deg seythun ha tri-ugens yw ervirys rag dha bobel, ha rag dha sita sans, rag gorfenna an treuspass, rag gorra sel war beghes, ha gul prenedh rag kammweyth; rag dro ewnder hag a dhur bys vykken, ha selya an welesigeth profoesek, ha rag untya an tyller an moyha sans.

²⁵Godhvydh ytho ha konvedhes: a-dhia dhyllans an ger rag daswul ha dastrehevel Yerusalem bys devedhyans an pryns untys, y fydh seyth seythunweyth; ha dre dhiw seythun ha tri-ugens y fydh dastrehevys gans plenys ha gans pollgleudh, mes yn prys a ankres.

²⁶Ha wosa an dhiw seythun ha tri-ugens, an den untys a vydh treghys dhe-ves, ha ny'n jevydh travyth; ha pobel an pryns usi ow tos a wra distrui an sita ha'n sentri. Hy diwedh a dheu dre liv, ha bys y'n diwedh y fydh bresel, ha terroes yw ordenys.

²⁷Ha fastya ambos a wra ev gans lies dre unn seythun; mes yn kres an seythun na y hwra ev dhe sakrifis hag offrynn hedhi; hag y'n tempel y fydh pyth kasadow an difeythter[20] bys may fo an diwedh ordenys diverys war an distruer.’