Read Kernewek Bel ha'n Dhragon 1 Bible Online

Bel ha'n Dhragon 1 - Kernewek bible

Bel ha'n Dhragon 1

¹Wosa myghtern Astyages dhe vos kuntellys dh'y dasow, Syrus an Persian a dhegemmeras y vyghterneth.[1]

²Daniel a veu keskoweth a'n myghtern, hag enorys dres oll y gowetha.

³Y feu idol dhe'n Babylonianys henwys Bel, hag y feu spenys ragdho pub dydh dewdhek bushel a vleus fin, ha dew-ugens davas, ha hwegh firkin[2] a win.

⁴An myghtern a wre y enora, ha mos pub dydh dh'y wordhya; mes Daniel a wordhya y Dhuw y honan.

⁵Yn-medh an myghtern dhodho, ‘Prag na wordhydh Bel?’ Ev a worthybis, ‘Rag ny wordhyav idol gwrys gans leuv, mes an Duw bew, neb a formyas nev ha nor, ha may ma dhodho mestrynses war oll kig.’

⁶Yn-medh an myghtern dhodho, ‘A ny dybydh Bel dhe vos duw bew? A ny welydh kemmys a dheber hag a yv pub dydh?’

⁷Daniel a vinhwarthas ha leverel, ‘Na vydh toellys, A vyghtern; rag nyns yw hemma marnas pri a-ji, ha kober a-ves, ha bythkweth ny dhybris nag eva travyth.’

⁸Ytho serrys veu an myghtern, hag ev a elwis y oferysi ha leverel dhedha, ‘Mar ny leverowgh dhymm piw yw neb a dheber an vytel ma, hwi a verow; mes mar tiskwedhowgh Bel dh'aga dybri, Daniel a verow, rag ev re vlasfemyas erbynn Bel.’

⁹Yn-medh Daniel dhe'n myghtern, ‘Bedhes kepar dell leversys.’ Yth esa deg oferyas ha tri-ugens dhe Bel, heb rekna gwragedh ha fleghes.

¹⁰An myghtern a dheuth gans Daniel bys yn chi Bel,

¹¹hag yn-medh oferysi Bel, ‘Otta, yth eson ni ow mos yn-mes, mes ty, A vyghtern, sett an boes, ha kemmysk an gwin ha'y dhesedha. Dege an daras, ha'y selya gans dha vysow-sel. Deus ternos, ha mar ny gevydh pup-tra dybrys gans Bel, ni a verow; poken Daniel, neb a wowleveris er agan pynn.’

¹²Mes nyns ens i troblys, rag yn-dann an voes i re wrussa entrans kudh, ha dredho i a dheuth a-ji pup-prys dh'aga devorya.

¹³Ytho, pan ethons yn-mes, an myghtern a worras an boes a-rag Bel.

¹⁴Ena Daniel a worhemmynnis dh'y servysi may trollens lusu, hag i a's skattras der an tempel oll yn golok an myghtern y honan; hag ow mos yn-mes i a dhegeas an daras, ha'y selya gans bysow-sel an myghtern.

¹⁵Mes an oferysi a dheuth y'n nos, herwydh aga us, gans aga gwragedh ha'ga fleghes, hag i a dhybris hag eva pup-tra.

¹⁶Ternos an myghtern a sevis a-varr, ha Daniel ganso,

¹⁷hag yn-medh an myghtern, ‘Yw an selyow dien, Daniel?’ Yn-medh ev, ‘Dien, A vyghtern.’

¹⁸Ena kettell veu an darasow igerys, an myghtern a vires orth an voes ha kria gans lev ughel, ‘Meur osta a Bel, ha genes nyns eus toell vytholl.’

¹⁹Daniel a hwarthas, ha synsi an myghtern ma na allas mos a-ji, hag yn-medh, ‘Mir orth an leur, ha merk, piw dhodho yw an olow treys ma.’

²⁰Yn-medh an myghtern, ‘My a wel an olow treys a wer, a venynes hag a fleghes.’

²¹Ena an myghtern o serrys. Ev a dhalghennas an oferysi ha'n benynes ha'ga fleghes, hag i a dhiskwedhas dhodho an darasow kudh dredha may teuthons a-ji, ha konsumya pup-tra esa war an voes.

²²Ytho an myghtern a's gorras dhe'n mernans, hag ev a ros Bel dhe Daniel, neb a'n distruis, ha'y dempel.

²³Yth esa ena dragon vras, ha'n Babylonianys a's gordhya.

²⁴Yn-medh an myghtern dhe Daniel, ‘Ny yllydh leverel, nag yw hemma duw bew. Ytho gwra hy gordhya.’

²⁵Yn-medh Daniel, ‘An Arloedh ow Duw y hwordhyav, rag Duw bew yw ev. Mes ty, A vyghtern, ro dhymm kummyas, ha my a ladh an dhragon, heb kledha na lorgh.’

²⁶Yn-medh an myghtern, ‘My a re dhis kummyas.’

²⁷Ena Daniel a gemmeras pyg ha soev ha blew ha'ga bryjyon war-barth ha gul pellennow; hag ev a's gorras yn ganow an dhragon. Wosa aga dybri, an dhragon a dardhas igor. Yn-medh ev, ‘Ottena an taklow esowgh orth aga gordhya.’

²⁸Pan glewas an Babylonianys henna, i a's teva sorr bras, hag i a guntellas war-barth erbynn an myghtern, ow leverel, ‘An myghtern re dheuth ha bos Yedhow. Ev re dorras Bel dhe'n dor, ha ladha an dhragon, ha gorra an oferysi dhe'n mernans.’

²⁹Yn-medhons, hag i ow mos dhe'n myghtern, ‘Delirv dhyn Daniel, poken ni a'th ladh jy ha'th teylu.’

³⁰An myghtern a welas i dh'y waska yn ter, ytho konstrynys veu dhe dhelivra Daniel dhedha.

³¹I a dewlis Daniel yn fow an lewyon, hag yth esa ena hwegh dydh.

³²Yth esa seyth lew y'n fow, hag yth esens ow ri dhedha pub dydh dew korf marow ha diw dhavas. Mes lemmyn ny vons res dhedha, may hallens devorya Daniel.

³³Lemmyn yth esa yn Yudi Habakkuk an profoes. Ev a vrojyas iskell ha brewi bara yn bolla. Yth esa ow mos dhe'n gwel, dh'y ri dhe'n vysoryon.

³⁴Hag el an Arloedh a leveris dhe Habakkuk, ‘Dog an boes usi genes dhe Babylon, dhe Daniel yn fow an lewyon.’

³⁵Yn-medh Habakkuk, ‘Arloedh, bythkweth ny welis Babylon, ha ny wonn an fow.’

³⁶Ena el an Arloedh a gavas dalghenn yn topp y benn, ha'y dhoen er gols y benn, ha'y worra yn Babylon a-ugh an fow, gans son hwyth y anall.

³⁷Ena Habakkuk a armas, ‘Daniel, Daniel, kemmer an boes a wrug Duw y dhannvon dhis.’

³⁸Yn-medh Daniel, ‘Ty re borthas kov ahanav, A Dhuw, ha ny forsaksys an re a'th kar.’

³⁹Ena Daniel a sevis ha dybri, hag el Duw a dhaskorras Habakkuk hware dh'y dyller y honan.

⁴⁰An myghtern a dheuth y'n seythves dydh dhe gyni Daniel. Ev a dheuth dhe'n fow ha mires ynno, hag otta, yth esa Daniel owth esedha ena.

⁴¹Ena an myghtern a grias gans lev ughel ha leverel, ‘Meur osta, Arloedh, Duw Daniel, ha nyns eus arall saw ty.’

⁴²Ena ev a'n tennas yn-bann, ha tewlel y'n fow an re a assaysens y dhistrui, ha hware devorys vons a-ragdho.