Read Kernewek Hosea 1 Bible Online

Hosea 1 - Kernewek bible

Hosea 1

¹Ger an ARLOEDH hag a dheuth dhe Hosea mab Beeri, yn dydhyow Uzzia, Yotham, Ahaz, Hezekia, myghternedh Yuda, hag yn dydhyow Yeroboam mab Yoash, myghtern Ysrael.

²Hemm yw dalleth ger an ARLOEDH dhe Hosea. An ARLOEDH a leveris dhe Hosea, ‘Ke, kemmer dhis dha honan gwreg a fornikashyon ha fleghes a fornikashyon, a-ban wrug an tir fornikashyon meur, ow tiberth dhiworth an ARLOEDH.’

³Ytho ev eth ha kemmeres Gomer myrgh Diblaym, ha hi a omdhuk ha dineythi dhodho mab.

⁴An ARLOEDH a leveris dhodho, ‘Hanw e Yezreel, rag hwath pols byghan kessydhya a wrav chi Yehu drefenn ladhva Yezreel, ha gorra diwedh dhe vyghterneth chi Ysrael.

⁵Y'n jydh na my a wra dralya gwarak Ysrael yn glynn Yezreel.’

⁶Hi a omdhuk arta, ha dineythi myrgh. An ARLOEDH a leveris dhodho, ‘Hanw hi Lo-ruhama,[1] rag ny gemmerav vy truedh a ji Ysrael byth moy, na ny wrav vy aga gava mann.

⁷Mes my a gemmer truedh a ji Yuda, ha'ga sawya der an ARLOEDH aga Duw, ha ny's sawyav gans gwarak, na kledha, na kas, na mergh, na marghogyon.’

⁸Wosa didhena Lo-ruhama, hi a omdhuk ha dineythi mab.

⁹Ena an ARLOEDH a leveris, ‘Hanw e Lo-ammi,[2] a-ban nyns owgh hwi ow fobel, ha nyns ov vy agas Duw.’

¹⁰Hwath y fydh niver fleghes Ysrael avel tewes an mor, na yll bos musurys na niverys. Y'n tyller may feu leverys dhedha, ‘Nyns owgh hwi ow fobel’, y fydh leverys dhedha, ‘Mebyon an Duw bew.’ [3]

¹¹Fleghes Yuda ha fleghes Ysrael a vydh kuntellys war-barth, hag apoyntya a wrons unn penn ha dos yn-bann dhiworth an tir, rag meur a vydh dydh Yezreel.