Read Kernewek Hosea 11 Bible Online

Hosea 11 - Kernewek bible

Hosea 11

¹Pan veu Ysrael flogh my a'n karas, hag yn-mes a Ejyp my a elwis ow mab.

²Dhe voy y hwrugavy aga gelwel, dhe bella yth ethons dhiworthiv,[26] ow sakrifia dhe Baalim, hag ow leski offrynnow dhe imajys.

³My a dhyskas dhe Efraym kerdhes, orth y gemmeres er y dhiwvregh; mes ny wodhyens my dh'aga sawya.

⁴My a's tennas gans kerdyn denel, gans lovonow kerensa; hag yth en vy kepar ha neb a dhrehav an yew a'ga honna, ha my a blegyas dh'y vaga.

⁵Ny dhehwel dhe bow Ejyp, mes Assyria[27] a vydh y vyghtern, rag i a skonyas a dhehweles dhymm.

⁶An kledha a wra troyllya erbynn y sitys, ha distrui an varrys a'y yetys,[28] ha'ga dybri drefenn aga thowlow.

⁷Ow fobel yw ervirys dhe dreylya ahanav vy. I a elow war-vann,[29] mes ny wra ev aga ughelhe.

⁸Fatell y'th hepkorrav, Efraym? Fatell y'th taskorrav, Ysrael? Fatell y'th wrav avel Adma? Fatell y'th hworrav avel Seboim? Ow holonn re dreylyas a-ji dhymm, oll ow thruedh re dhewis.

⁹Ny gowlwrav ow honnar fell; ny dhehwelav dhe dhistrui Efraym: rag Duw ov vy a-der gour; an Sans yn agas mysk, ha ny dhov vy yn sorr.

¹⁰I a gerdh war-lergh an ARLOEDH; Ev a wra usa avel lew. Pan wra ev usa, fleghes an howlsedhes a gren.

¹¹I a gren avel edhen yn-mes a Ejyp, avel kelemmi yn-mes a Assyria. My a wra dhedha triga yn aga threvow, yn-medh an ARLOEDH.

¹²Efraym a'm kylghyas gans gowyow, ha chi Ysrael gans gil. Hag yma Yuda hwath ow mos a-dro gans Duw drefenn y vos len gans an syns.[30]