Read Kernewek Hosea 12 Bible Online

Hosea 12 - Kernewek bible

Hosea 12

¹Kowethya a wra Efraym gans an gwyns,[31] ha helghya gwyns an howldrevel oll an jydh, ha kressya gowyow ha freudh. I a wra kevambos gans Assyria hag olew yw degys dhe Ejyp.

²An ARLOEDH a'n jeves dadhel gans Yuda, hag ev a gessydh Yakob herwydh y fordhow; ev a attal dhodho wriansow.

³Y'n brys ev a synsis y vroder er an seudhel, hag yn y grevder ev a strivyas gans Duw.

⁴Ev a strivyas gans an el ha prevaylya; ev a oelas hag a bysis favour dhiworto. Ev a'n kavas yn Bethel, hag ena y kewsis ganso:[32]

⁵an ARLOEDH, Duw an luyow, an ARLOEDH yw y hanow a govadh.

⁶Ytho treyl dhe'th Duw, gwith tregeredh ha breus, ha gorta dha Dhuw pup-prys.

⁷An marchont a'n jeves fals vantol yn y leuv; ev a gar toella.

⁸Yn-medh Efraym, ‘Yn hwir rych ov vy, my re drovyas pythow; yn oll ow lavur ny gevons ynnov kammhynseth, yw pegh.’

⁹My re beu an ARLOEDH dha Dhuw a-ban veus yn pow Ejyp; my a'th wra arta dhe driga yn tyldow kepar hag yn dydhyow an kuntellyans.[33]

¹⁰My re gewsis dre'n brofoesi, ha my re ros gwelesigethow pals; ha dre leuv an brofoesi my re gewsis yn parabolennow.

¹¹Eus droktra yn Gilead? Yn hwir yth yns i koegyon! A sakrifions terewi yn Gilgal? Aga alteryow ynwedh a vydh avel kals meyn war fynnglow an gwel.

¹²Yakob a fias dhe bow Aram, Ysrael a servyas rag gwreg, ha rag gwreg y hwithas deves.

¹³Ha dre brofoes an ARLOEDH a dhros Ysrael mes a Ejyp, ha dre brofoes y feu gwithys saw.

¹⁴Efraym re'n sorras yn hwerow; rakhenna y Arloedh a wra gasa warnodho y gabel-goes, ha daskorr dhodho y geredh.