Read Kernewek Hosea 14 Bible Online

Hosea 14 - Kernewek bible

Hosea 14

¹Dehwel, Ysrael, dhe'n ARLOEDH dha Dhuw; rag ty re drebuchyas yn dha gammhynseth.

²Kemmerewgh genowgh hwi geryow, ha dehwelewgh dhe'n ARLOEDH. Leverewgh dhodho, ‘Gav pub kammhynseth, ha degemmer an pyth yw da, rag may attyllyn frut agan diwweus.

³Ny wra Assyria agan sawya; ny wren ni marghogeth war vergh. Ny leveryn arta “Agan duwow” dhe ober agan diwla, rag ynnos jy y kyv an omdhivas truedh.’

⁴My a wra aga sawya dhiworth aga dislelder, ha'ga hara heb ahwer, rag ow sorr re dreylyas anodho.

⁵My a vydh avel an gluth dhe Ysrael; ev a wra bleujyowa avel an lili, ha dannvon y wreydh yn-nans kepar ha kederwydh Lebanon.

⁶Y skyll a dyv, ha'y dekter a vydh avel an olewbrenn, ha'y ethenn a vydh kepar ha kederwydh Lebanon.

⁷Arta y trigons yn y skeus. I a wra ys dhe devi. I a wra bleujyowa avel an gwinbrenn; y vri a vydh avel gwin Lebanon.

⁸A Efraym, pandr'yw imajys hwath dhymmo vy? My a worthyp dhodho, ha'y witha. My yw avel merywenn las; dha frut a dheu a-dhiworthiv.

⁹Piw yw skentel? Re gonvettho an taklow ma. Piw yw doeth? Re's godhvo. Fordhow an ARLOEDH yw ewn, an re wiryon a gerdh ynna, mes drogoberoryon a drebuch ynna.