Read Kernewek Hosea 7 Bible Online

Hosea 7 - Kernewek bible

Hosea 7

¹Peskweyth may fynnav sawya Ysrael, ena kammhynseth Efraym yw diskudhys, ha droktra Samaria. I a wra gil, lader a dheu, para a raven y'n stret.

²Ny brederons yn aga holonn my dhe govhe oll aga droktra. Lemmyn yma aga oberow oll a-dro dhedha; ymons dherag ow fas.

³I a heudhha an myghtern der aga droktra, ha pennternedh der aga gowyow.

⁴I oll yw avoutroryon, avel forn toemmhes gans peber, neb a astel dhe wul dhe'n tan difuna wosa ev dhe doesa toes, bys pan dhrehaffo.

⁵Yn dy'goel agan myghtern an bennternedh a veu klav gans toemmder an gwin; ev a ystynnas y dhiwla gans an re a wra ges.

⁶Rag aga holonn yw avel forn, hag i dheu nes ow kontrewaytya; aga sorr a gosk oll an nos; myttin ev a dhew avel flamm a dan.

⁷I oll yw mar doemm avel forn, hag i a dhevoryas aga breusydhyon. Oll aga myghternedh re goedhas, ha ny wra nagonan anedha gelwel warnav.

⁸Efraym yw kemmyskys gans an kenedhlow; Efraym yw torth na veu treylys.

⁹Estrenyon re dhevoryas y nerth, ha ny woer. Blew loes yw lesys warnodho, ha ny woer.

¹⁰Goeth Ysrael a dhest er y bynn, mes ny dhehwelsons dhe'n ARLOEDH aga Duw, na ny'n hwilsons, yn despit dhe henna oll.

¹¹Efraym yw kepar ha kolomm, gokki ha heb kolonn; i a elow dhe Ejyp ha mos dhe Assyria.

¹²Hag i ow mos, my a dewl ow roes warnedha; avel ydhyn an nevow my a's dre yn-nans. My a's keredh pan y's klewav ow hesya.

¹³Go-i, rag i re fias ahanav vy! Terroes dhedha, rag i re rebellyas er ow fynn! My a's dasprenas hag i a wowleveris er ow fynn.

¹⁴Ny garmsons dhymm yn aga holonn, hag i ow kyni war aga gweli. I a omhakkyas rag greun ha gwin nowydh, ha kildenna a-dhiworthiv vy.

¹⁵My a nerthas ha krevhe aga diwvregh, mes i a breder dhe wul droktra er ow fynn.

¹⁶Treylya a wrons — a-der war-vann; avel gwarak lows yns i. Aga fennsevigyon a goedh der an kledha drefenn anvri aga thaves. Yndella tus a wra ges anedha yn gwlas Ejyp.