Read Kernewek Hosea 8 Bible Online

Hosea 8 - Kernewek bible

Hosea 8

¹Gorr hirgorn dhe'th hanow; ev a varges avel er a-ugh chi an ARLOEDH, rag i dhe derri ow hevambos, ha rebellya erbynn ow lagha.

²I a wra garma dhymmo vy, ‘Ow Duw: ni, Ysrael, a'th aswonn!’

³Ysrael re naghas dader; eskar a wra y helghya.

⁴I re wrug myghternedh, mes nyns yns i ahanav; i re wrug pennternedh, heb godhvos dhymm. Gans aga arghans ha'ga owr y hwrussons imajys may fens kisys.

⁵Ev re naghas dha leugh,[18] Samaria! Ow sorr a loskas er aga fynn. Pes termyn ny allons kavoes glander?

⁶Rag dhiworth Ysrael yth yw! Ser a'n gwrug, ha nyns yw Duw. Leugh Samaria a vydh skyrr.

⁷I re hasas an gwyns, ha mysi an korwyns. Garrow an ys ny's teves penn; ny wra bleus. Mar kwrello greun, ena estrenyon a wra y lenki.

⁸Ysrael yw kollenkys; lemmyn yth yns i yn mysk an kenedhlow kepar ha lester diles.

⁹Rag gyllys yns yn-bann dhe Assyria, avel asen gwyls digoweth. Efraym re arvethas keryadesow.[19]

¹⁰Kynth arvethsons yn mysk an kenedhlow, lemmyn my a wra aga huntell, hag i a hedh pols byghan a untya myghtern ha pennternedh.[20]

¹¹Kyn hwrug Efraym lies alter rag offrynn peghes, i res eth ha bos alteryow rag peghes.

¹²Kyn skrifav ragdho ordenansow diniver ow lagha, akontys yns avel neppyth astranj.

¹³I a sakrifi rohow dhymmo vy, i a dheber an kig; mes an ARLOEDH ny gemmer plesour ynna. Lemmyn ev a berth kov a'ga sherewneth, ha kessydhya aga feghosow: dhe Ejyp y tehwelons.

¹⁴Ysrael re ankovas y Wrier, ha re dhrehevis palesyow; ha Yuda re wrug lies sita gerys. Mes my a dhannvon tan yn y sitys a dhevor y gastylli.